यूहन्ना 10

ताठया एठा मेंडाकू गा उदाहरण

1“इंज आपेटे सच्चो-सच्चो मंडीवा मेना कि जो जेकाभी दराजोटे मेंडाकू खुलीन मु बाने, पेनो तुनिका दूसरा कोंटे पेळेचबा होय, देटेन चोर एठा डाकु होय। 2पेनो मेंडाकू ताठया दराजोटे मुवा होय। 3दिया घल्जी जगली मिठाच दराजो खुल्लाएबा होय एठा मेंडाकू दियागा आवाज आजोम्बा होय, एठा देटेन हेजा मेंडाकू के जीमू रिमटे हाकोवा होय एठा बल्लान सकुवा होय। 4एठा जब देटेन हेजा सेबाई मेंडाकू के बल्लान ओठकुवा होय, मेटे देटेन दिकुगा सम्मा-सम्मा सेंद्रावा होय, एठा मेंडाकू दियागा टाऊ-टाऊ सेनेवा होय, चोयाकी मेंडाकू दिकु दियागा आवाज चिनाएवा होय। 5पेनो दिकु दूसरा गा टाऊटे बान सेने, दियाटे लेंक्कीन साळुपबा, चोयाकी मेंडाकू दूसराकु गा आवाज बान चिचाना।” 6यीशु नी दिकुटे इनी उदहारण मंडीके, पेनो दिकु बान समजातिंजडुका कि दियागा मंडी गा मतलब चोच डा।

यीशु अच्छा ताठया

7मेटे यीशु नी दिकुटे डाबोलटे मंडीके, “इंज आपेटे सच्चो-सच्चो मंडीवा मेना, कि मेंडाकू घल्जी दराजो इंज्का मेना। 8जोभी हेन, दिकु सेबाईकु चोर एठा डाकुकू होय पेनो इंजा मेंडाकूनी दिकुगा बान आजोम। 9दराजो इंज्का मेना, इंजा द्वारा तलान हेजेमिंकू के परमेश्वर उध्दार डाएवा एठा दिकु तलान-बल्लान हेजे-सेनेवा एठा जोमा घल्जी आटा जेबा। 10चोर सिराप मेंडाकू के चुचीरी, घोगेच एठा नशो गा घल्जी हेजेवा होय। इंज इनिघल्जी हेन कि मेंडाकू आए टेमो जीटा थंदळकु एठा पूरा रोंगो टे जीटा थंदळकु। 11अच्छा ताठया इंज मेना, अच्छा ताठया मेंडाकू घल्जी खुद इच्छाटे गुजूवा होय। 12भाळन डोके नौकार जब डोंगोरा सिटाकुके हेजे डोकुवा मेटे साळुपजुवा। देटेन मेंडाकू के आराकुवा चोयाकी देटेन दिकुगा ताठया बाऊ होय एठा मेंडाकू दियागा बाऊ होय। इनिघल्जी डोंगोरा सिटाकु दिया लिंजेन हमला डाएवा होय एठा घोंजा चिगळ-बिगळेवा होय। 13देटेन इनिघल्जी साळुपबा होय कि देटेन मुंजीरी मिठाच होय एठा दियेन मेंडाकू चिंता बाने। 14-15अच्छा ताठया इंज मेना, जो रोंगो बाटे इंज्के हाडाई होय एठा इंज बाटे के हाडाई मेना, डीका रोंगो इंज इंजागा मेंडाकू के हाडाई होय एठा इंजा मेंडाकू इंज्के हाडाई होय एठा इंज दिकु घल्जी गुजू गेन तैयारके मेना। 16इंजा येठाभी मेंडाकू होय, जो इनी मेंडाकू खुली गा बाने, इंजेन दिकुके भी सा जरुरी होय, दिकु इंजा आवाज के चिनाएवा, मेटे म्याका घोंजा म्याका ताठया थंदळवा। 17बाटे इंजाटे प्यार दडावा होय, चोयाकी इंज खुद गा इच्छाटे गुजूवा मेना ताकी इंज डाबोलटे जीटायु। 18जेका इंजा जान इंजा रुटे बाने, बनकी इंज डीचके इंजा मर्जी टे जेबा मेना। इंजेन डीचके जान जिऊ गा हाक होय, एठा जान डाबोलटे सा गा हाक होय। चोयाकी येटेन डीका हुकूम होय जो इंजेन इंजा बाटे टे घटाके होय।” 19इनी बातो गा वोजीटे यहूदी कुरकू टे डाबोलटे मतभेद ओटजे। 20दिकुटे तलाटे घोनेच कुरकू मंडी लज्जे, “दियेंनी भूतो होय, एठा देटेन पागल होय, दियागा चोया आजोम्बा होय।” 21दूसराकु नी मंडीके, “इनी बातो भूतो घाईके कोरो गा बान डाऊ साकतावा। म्या भूतो चोलाकाभी म्या अंधळा कोरो के दोडो शक्ती बान जिऊ साकतावा।”

यहूदिकु गा बान विश्वास

22यरूशलेम शहर गेन स्थापना गा तिवार#10:22 स्थापना गा तिवार हार साल डीसंबार गेन झुपळी गा तिवार गा बरी महिना बादोन हेजे डा डीके उजाला गा तिवार भी मंडी मेना होय चोयाकी कुरकू इकुगा घोनेच दिवा जुजूल डा। डाएन एठा राराम मोसम गा टेमो डा। 23एठा यीशु यरूशलेम गा मंदिर गा दरोमेन डीके सुलैमान गा उसरी मेंबा होय इखाट लक्के डा। 24मेटे यहूदी कुरकू नी डीचके हेन डो घेरायेनेच एठा कोम्बाराके, “आमनी आलेके खाट मुश्किल गेन डोकेमी होय। नका आलेके सफारुपोटे घाले चोच आम मसीह होय?” 25यीशु नी दिकुके जवाब जीके, “इंज्नी आपेटे मंडीके, एठा आपे विश्वास दडाका बाने, जो कामय इंज इंजागा बाटे गा हाक दडावा मेना दिकु इंजा का गवाही जेबा होय। 26पेनो आपे इनिघल्जी विश्वास बान दडा चोयाकी इंजागा मेंडाकू तलाटे बाऊ होय, डेनोगोका इंज्नी मंडीके। 27इंजा मेंडाकू इंजा आवाज आजोम्बा होय, इंज दिकुके हाडाई मेना। इंज मेंडाकू इंजा टाऊटे सेंद्रवा होय। 28इंज दिकुके हमेशा गा जीवन जेबा मेना, एठा दिकु चोलाकाभी नाशोऊ बाने, जेकाभी दिकुके इंजा मेराटे रुटे बाने। 29इंजा बाटे नी डीचनी दिकुके इंज्के जिलेकु होय, देटेन सेबाईकु टे खाट होय। एठा जेकाभी दिकुके इंजा बाटे टे रुटिकु बाने। 30इंज एठा इंजा बाटे म्याका होय।” 31म्या बार डाबोलटे यहूदी कुरकू नी डीचके घोटा टे लेलाचा घल्जी घोटा टुलजे। 32एने लिंजेन यीशु नी दिकुटे मंडीके, “इंज्नी आपेके इंजा बाटे कोनेटे घोनेच्का भला कामय घल्के होय, डे तलाटे तुनी कामय घल्जी आपे इंज्के घोटा टे लेलाचावा होय?” 33यहूदी कुरकू नी डीचके जवाब जीके, “भला कामय घल्जी आले आमके घोटा लेलाचा बाने, बनकी परमेश्वर गा खिलाफबेन गा वोजीटे एठा इनिघल्जी कि आम कोरो मका भी आम खुदके परमेश्वर मंडी गा दवा दडावा होय।” 34यीशु नी दिकुके जवाब जीके, “चोयाकी पवित्र ग्रंथ गेन बान ओलडुका ‘इंज्नी मंडीके, आम गोमेच होय?’” 35एठा आपेन मालूम होय कि पवित्र ग्रंथ बदलाऊ बाने। इनिघल्जी दियागा कुरकू गा अधिकारीकु के परमेश्वर मंडीके होय। 36जब इंज इनी मंडीवा मेना, “इंज परमेश्वर गा कोण मेना।” मेटे आपे इंज्के चोया मंडीवा होय, “आम परमेश्वर गा खिलाफबेन दडावा होय।” इंज डीचका मेना डीचके इंजा बाटे नी अलग्गो केमी एठा इंज्के दुनिया गेन कुल्लेमी होय। 37अगर “इंजा बाटे गा कामय बान दडा टासो, मेटे इंजा विश्वास बाकी दडा। 38पेनो अगर इंज इनी कामय दडावा मेना, मेटे चाहे इंजा विश्वास बाकी भी दडा, पेनो डी कामय लिंजेन विश्वास डाए। ताकी आपे चिनाए एठा समझातिंजे कि बाटे इंजेन थंदळवा होय एठा इंज बाटेन थंदळवा मेना।” 39मेटे दिकुनी डाबोलटे डीचके उठा गा कोशिश डाके। पेनो देटेन दिकुटे लेंक्कीन ओले। 40डाबोलटे यीशु यरदन गडा गा हुधेळेदेन डी जगा गेन ओले येटेन यूहन्ना बपतिस्मा जिऊमिठाच पेला बपतिस्मा जीव डा एठा यीशु डीगान का थंदळके। 41चोटोका कुरकू दिया मेरान हेजे डा डो मंडी डा, “यूहन्ना बपतिस्मा जिऊमिठाच नी तुनिका अचम्बो कामय बान घालडुका, पेनो जो चोचकाभी यूहन्ना बपतिस्मा जिऊमिठाच इनिज्का गा बारेन मंडीके डा देटेन सेबाईका सच्चो डा।” 42एठा देटेन घोनेच कुरकू नी दिया लिंजेन विश्वास डाके।

Currently Selected:

यूहन्ना 10: GOKNT

Highlight

Copy