यूहन्ना 9

जनम गा अंधळा के दोडो होळा

1म्या दिन जब यीशु हेजा गा चेलाकू सेंग्गोन चेल्के डा, मेटे डीचनी म्या कोरो डोकेनेच, जो जनम टे अंधळा डा। 2दियागा चेलाकूनी टे कोम्बाराके, “हे गुरु, जेगा पापो गा वोजीटे इनी कोरो अंधळा डाएन इनी कोरोनी या इनीज्गा आंटे-बाटे नी पापो डाके?” 3यीशु नी जवाब जीके, “न मेटे डीचनी पापो डाके डा, न इनिजगा आंटे-बाटे नी पेनो येटेन इनिघल्जी अंधळा जनम डाएन कि परमेश्वर शक्तीगा कामय दियेन ओटजू होना। 4डीचनी इंज्के कुल्लेमी होय, इंजेन जलदिका दियागा कामय के पुपरा जरुरी होय। देटेन रातो हेजे मिनी होय डेन जेकाभी कामय बान दडा। 5जब टाएन इंज दुनिया गेन मेना, मेटे टाएन इंज दुनिया गा उजाला मेना।” 6इनी मंडीटे डीचनी ओटेन लिंजेन उलीच बेचके एठा उलीच टे कासा गा गुली आरुके एठा डी अंधळा कोरो गा मेडेन येंडाटे। 7दियाटे मंडीके, “सेने एठा अमा म्वार शीलोह (शीलोह गा अर्थ कुलकेमिनी) तलाव गेन अबुंज्की।” इनिघल्जी डीचनी ओलेडो अबुंज्के एठा दोडो लज्जे एठा हिराके। 8मेटे कोरो मेराकू एठा अलग्गो कुरकू दिकुनी पेला डीचके भिको आसी टे डोकेनेच डा, इनिज दियाटे मंडी लज्जे, “चोच येटेन डीचका बाऊ, जो अंधळा डा एठा भिको आसी डा?” 9अदा कुरकू नी मंडीके, “येटेन डीचका होय,” दूसराकु नी मंडीके, “बाने, पेनो दिया रोंगो होय।” डीचनी मंडीके, “इंज डीचका मेना।” 10मेटे दिकु दियाटे कोकाम्बारा लज्जे, “आम टोनोगो दोडो लज्जे?” 11डीचनी जवाब जीके, “यीशु जीमू गा म्या कोरोनी कासा गुली आरुके एठा डीके इंजा मेट लिंजेन येंडाटे इंज्के मंडीके, ‘सेने एठा अमा म्वार शीलोह गा तलाव गेन अबुंज्की।’ इंज्नी तलाव गेन ओलेडो अबुंज्के एठा दोडो लज्जे।” 12दिकुनी दियाटे कोम्बाराके, “देटेन कोरो तुंगानके होय?” डीचनी मंडीके, “इंज बान हाडाई।”

फरीसिकू द्वारा सजाऊ गा दोडोवा

13-14जो दिन यीशु नी कासा गुली आरुके एठा डी कोरो के सजाकेनेच, देटेन परमेश्वर गा चोखरा दिन डा। इनिघल्जी कुरकू डी कोरो के फरीसि कुरकू गा मेरान साईय्येनेच। 15डाबोलटे फरीसि कुरकू नी भी दियाटे कोम्बाराके, “आम चोथान टे दोडो लज्जे?” डीचनी दिकुटे मंडीके, “डीचनी इंजा मेडेन कासा येंडाके, डाबोलटे इंज्नी अबुंज्के एठा आए दोडोवा मेना।” 16एने लिंजेन फरीसि कुरकू मंडी लज्जे, “डी कोरो डीचनी येनेगो डाके परमेश्वर गा कोनेटे बाने, चोयाकी देटेन परमेश्वर गा चोखरा दिन बान ममानातिंज।” दूसराकु नी मंडीके, “इनिजगा रोंगो पापी कोरो इनी रोंगो गा चिन्हा चोफर टे डाएवा होय?” इनिघल्जी बारेन साटे फुट डाएन। 17दिकुनी डी अंधळा टे डाबोलटे मंडीके, “डीचनी आमके दोडो गा घल्जी शक्ती जीके होय, आम दियागा बारेन चोच मेंबा होय?” डीचनी मंडीके, “देटेन परमेश्वर गा कोनेटे मंडीमिठाच होय।” 18-19पेनो यहूदी अगुवाकुन विश्वास बान दडुका कि देटेन अंधळा डा एठा आए दोडोवा होय, जब टाएन दिकुनी दियागा आंटे-बाटे के दियागा मेट खुल्लाएन डा हाकोटे दिकुटे कोम्बाराके, “चोच इनिज आपेगा कोण होय, डीचके आपे मंडीवा कि अंधळा डाके डा? डाबोलटे आए चोफर टे दोडोवा होय?” 20दियागा आंटे-बाटे नी जवाब जीके, “आलेनी हाडाई होय कि एटेन आलेगा कोण होय एठा अंधळा डाके डा। 21पेनो आलेनी इनी बान हाडाई कि आए चोफर टे दोडोवा होय, एठा न इनी हाडाई होय, कि जेनी डीचके दोडो गा घल्जी शक्ती जीके होय, देटेन खुद जवाब जिऊ घल्जी समाझदार होय। दियाटेका कोम्बाराए, देटेन हेजा बारेन खुद का मंडेबा।” 22इनी बातो दियागा आंटे-बाटे नी इनिघल्जी मंडीके, चोयाकी दिकु यहूदी अगुवा टे हिगरा डा। चोयाकी यहूदी अगुवाकु म्या मुठ्ठोएन डा, कि अगर जेकाभी यीशु लिंजेन विश्वास डाए कि मसीह होय, मेटे डीचके आराधना जगा टे बल्लान ओटकेच। 23इनी वोजीटे दियागा आंटे-बाटे नी मंडीके, “देटेन प्रश्न जवाब जिऊ काफी समाझदार होय, दियाटेका कोम्बाराए।” 24मेटे यहूदी अगुवाकु नी डी कोरो के जो अंधळा डा दूसरा बार हाकोटे दियाटे मंडीके, “सच्चो मंडीटे परमेश्वर के स्तुति डाए, आलेनी हाडाई होय कि देटेन कोरो पापी होय।” 25डीचनी जवाब जीके, “इंज बान हाडाई कि देटेन पापी होय या बाने। इंज म्या बातो हाडाई मेना कि इंज अंधळा डा, पेनो आए दोडोवा होय।” 26दिकुनी दियाटे डाबोलटे कोम्बाराके, “डीचनी अमा सेंग्गोन चोच डाके? डीचनी आमके चोफर टे सजाकेमी?” 27डीचनी दिकुटे मंडीके, “इंज आपेटे मंडीके मेना एठा आपेनी आजुम्के, नका दूसरा बार चोया आजोम्बा होय? चोच आपे भी दियागा चेलाकू आरु चाहतावा होय?” 28मेटे दिकुनी डीचके भला-बुरा मंडीटेका मंडीके, “आमका दियाका चेला होय, आलेनी मूसा गा चेलाकू होय। 29आले मालूम होय कि परमेश्वर नी मूसा टे बातो डावे, पेनो इनी कोरो के बान हाडाई कि देटेन तुंगाटे हेजेवा होय।” 30डीचनी दिकुके जवाब जीके, “एटेन नी अचम्बो गा बातो होय कि आपे बान हाडाई कि देटेन तुंगाटे हेजेवा होय, लेकिन डीचनी इंजा मेट सजाके। 31आलेनी हाडाई होय कि परमेश्वर पापीकु गा बान आजोम। पेनो अगर जेका परमेश्वर गा भक्त होय एठा दियागा इच्छा लिंजेन सेंद्रावा होय, मेटे देटेन दियागा आजोम्बा होय। 32जब टे दुनिया सृष्टि डाके डा, येटेन चोलाकाभी आजोमेन बान हेजडुका कि जेकानी भी जनम गा अंधळा के मेटके दोडो होळाकेनेच होय। 33अगर इनी कोरो परमेश्वर गा कोंटे बाने धारे, मेटे चोचकाभी बान दडा साकतावा।” 34दिकुनी डीचके जवाब जीके, “आमनी मेटे बिलकुल पापो गेन डाके होय, आम आलेके चोच इथूवा होय?” मेटे दिकुनी डी कोरो के महासभा टे बल्लान ओटकेनेच।

आत्मिक अंधापना

35जब यीशु नी आजुम्के कि दिकुनी डीचके बल्लान ओटकेनेच होय। जब यीशु डी अंधळा कोरो टे मिलातिंजे मेटे दियाटे कोम्बाराके, “चोच आम परमेश्वर गा कोणटे लिंजेन विश्वास दोडोवा होय?” 36डीचनी जवाब जीके, “हे श्रीमान, इंज्के घाले कि देटेन परमेश्वर गा कोंटे जे होय ताकी इंज दिया लिंजेन विश्वास डोएबा।” 37यीशु नी दियाटे मंडीके, “इंज परमेश्वर गा कोणटे मेना, आम पेलाका इंज्के डोकेमी होय एठा इंज डीचका मेना जो आए अमाटे बातो लक्के होय।” 38डीचनी मंडीके, “हे प्रभु, इंज अमा लिंजेन विश्वास दडावा मेना।” एठा डीचनी दियागा नंगा साब्बे। 39एठा यीशु नी मंडीके, “इंज इनी दुनिया गेन न्याय दडा घल्जी हेन मेना। अंधळाकु दोडोवा एठा जो कुरकू दोडोवा होय डी कुरकू अंदळाऊबा।” 40जो फरीसि कुरकू दियागा सेंग्गोन डा, दिकुनी इनी बातो आजुमटे दियाटे कोम्बाराके, “चोच आम मंडी लक्के कि आलेभी अंधळा होय?” 41यीशु नी दिकुटे मंडीके, “अगर आपे अंधळा धारे मेटे पापो बान आरु डा पेनो आए मंडीवा होय कि आले दोडोवा होय, इनिघल्जी आपेके मापोकोम बाने।”

Currently Selected:

यूहन्ना 9: GOKNT

Highlight

Copy