यूहन्ना 11

लाजर गा गुजू

1बैतनिय्याह गाँव गेन थंदळ मिठाच लाजर जीमू गा म्या कोरो बिमारजे। देटेन बैतनिय्याह गाँव गा डा डेनेन मरियम एठा दियागा बोकाजाई टे मार्था थंदळ डा। 2एटेन डीका मरियम होय, डीचनी बादोन प्रभु गा नंगान महेंगा सुकींज सुनूम येंडाके डा एठा हेजा हुफटे दियागा नंगा ओजोके डा। इनिजाका डाईटे लाजर बिमार के डा। 3मेटे दियागा बोकाजाई टे टाकु यीशु के खाबोर कुल्के, “प्रभु, आजुमे डीचके आम प्यारबा होय डीच बिमार के होय।” 4इनी अजोम्टे यीशु नी मंडीके, “इनी बिमारी गुजून बान स्यागु, पेनो परमेश्वर गा महिमा गा घल्जी होय, ताकी दियागा द्वारा परमेश्वर गा कोणटे गा महिमा डायु।” 5यीशु मार्था एठा दियागा बोकाजाई टे एठा लाजर टे प्यारबा डा। 6पेनो जब यीशु नी आजुम्के कि लाजर बिमार के होय, मेटे जो जगान डीच डा, देटेन बरी दिन एठा थंदळके। 7बरी दिन गा बादोन डीचनी चेलाकू टे मंडीके, “हेजे, आबु यहूदिया जिल्हा गेन बो।” 8चेलाकूनी दियाटे कोम्बाराके, “हे गुरु, आए भी मेटे यहूदी अगुवाकु आमके घोटा लेलाचा लक्के डा, एठा चोच फिरभी आम डेनका सेने चाहतावा होय?” 9यीशु नी जवाब जीके, “चोच दिन गा बारह घंटा बान थंदळ? अगर जेका दिनेन सेने मेटे खेडा बान जोम, चोयाकी डीच दुनिया गा उजाला डूगुवा होय। 10पेनो अगर जेका रातो सेने, मेटे खेडा जोम्बा होय, चोयाकी दिया मेरान तुनिका उजाला बाऊ होय।” 11डीचनी इनी बातो मंडीके एठा डेगा बादोन दिकुटे मंडी लज्जे, “आलेगा सोपती लाजर गिटेचके होय, पेनो इंज डीचके बिबीट सेने लक्के मेना।” 12मेटे चेलाकूनी दियाटे मंडीके, “हे प्रभु, अगर देटेन गिटेन होय, मेटे साजाऊवा। 13यीशु नी मेटेनी दियागा गुजू गा बारेन मंडीके डा: पेनो दिकु समझातिंजे कि डीचनी दुनूमेन गिटीच गा बारेन मंडीके डा।” 14मेटे यीशु नी दिकुटे सफाका मंडीके, “लाजर गोएन होय। 15इंज आपेगा घल्जी खुशीके मेना कि इंज देटेन बान डा, देटे आपे विश्वास डाए। पेनो नका हेजे, आबु दियागा मेरान बो।” 16मेटे थोमा नी जो दिदुमुस मंडीवा होय, हेजा गा सेंग्गो गा चेलाकू टे मंडीके, “हेजे, आबु भी दिया सेंग्गोन गुजू बो।”

यीशु, डाबोलटे जीटाऊ एठा जीवन

17जब यीशु बैतनिय्याह गाँव गेन हेन मेटे इनी मालूमजे कि लाजर के उफुन दिन पेलाका गळातिंज केनेच होय। 18बैतनिय्याह गाँव यरूशलेम शहर मेरान अंदाजोटे आफाई किलोमिटर लेंक्कीन डा। 19घोनेचका यहूदी कुरकू मार्था एठा मरियम गा मेरान दिकिंज गा डाईटे गा बारेन तसल्ली जिऊ हेन डा। 20मार्था नी यीशु गा हेजे गा खाबोर आजुमटे दियाटे मिलातिंजू ओले, पेनो मरियम उरान सुबानकेका। 21मार्था नी यीशु टे मंडीके, “हे प्रभु, आमेन येटेन थंदळ होना डा, मेटे इंजा डाई गुजू बान डा। 22आए भी इंजेन मालूम मेना कि जो चोचकाभी आम परमेश्वर टे आसेवा, परमेश्वर आमके जेबा।” 23यीशु नी दियाटे मंडीके, “अमा डाई गोएन मिठाच जाटे जीटाऊवा।” 24मार्था नी दियाटे मंडीके, “इंजेन मालूम मेना न्याय गा दिनेन जब हार जेकाभी डाबोलटे जीटाऊवा मेटे देटेन डाबोलटे।” 25यीशु नी दियाटे मंडीके, “इंज डीच मेना जो गोएन कुरकू के डाबोलटे जीटाकुवा मेना, एठा जीवन इंज्का मेना, जो जेकाभी इंजा लिंजेन विश्वास दडावा होय देटेन अगर गोएन भी मका जीटाका थंदळवा। 26एठा जो इंजा लिंजेन विश्वास दडावा होय एठा जीटाका होय देटेन चोलाकाभी बान गुजू, चोच आम इनी बातो लिंजेन विश्वास दडावा होय?” 27डीचनी दियाटे मंडीके, “हां, हे प्रभु, इंज विश्वास डाके मेना, कि परमेश्वर गा कोणटे मसीह जो दुनिया गेन नी हेजेमिठाच डा देटेन आमका होय।”

लाजर गा जीटाऊ

28इनी मंडीटे देटेन ओले, एठा हेजा बोकाजाई टे मरियम के हाकोटे मंडीके, “गुरु येटेनेचका होय एठा आमके हाको लक्के होय।” 29देटेन अजोम्टेका तुरुटो बिटजे डो दियागा मेरान हेन। 30यीशु आए भी गाँव टे भल्लानके डा, डीका जगान के डा, येटेन मार्था नी दियाटे मिलातिंजके डा। 31मेटे यहूदी कुरकू जो मरियम गा सेंग्गोन उरा गेन डा, डीचके तसल्ली जिऊ लक्के डा। दिकुनी डोके कि डीच जलदिका बिटजे डो बल्लान चेल्के डा। इनिघल्जी डी कुरकू इनी मंडीटे दियागा टाऊ-टाऊ ओले, कि डीच जाम घल्जी कब्र कोनेन चेल्के डा। 32जब मरियम देटेन आदिरजे येटेन यीशु डा, मेटे डीचके धोटेका दियागा नंगा लिंजेन बोचोएन डो मंडीके, “हे प्रभु, अगर आम एटेन थंदळके धारे, मेटे इंजा डाई बान गुजू।” 33जब यीशु नी डीचके एठा डी यहूदी कुरकू के जो दियागा सेंग्गोन हेन डा, जाम टे डोकेकु डा मेटे देटेन भेबाव परेशान जे एठा डाबोलटे गहरा कासु गेल्ला डीचनी दिकुटे कोम्बाराके, 34“आपेनी डीचके तोटेन डोकेनेच होय?” दिकुनी दियाटे मंडीके, “हे प्रभु, बो डो डोगेच।” 35यीशु जम्बे। 36मेटे यहूदी कुरकू मंडी लज्जे, “डोगे, देटेन दियाटे टोनोगो प्यार दडा डा।” 37पेनो दिकुटे तलाटे चोटोकु नी मंडीके, “डीचनी कुरकू के दोडो होळाकेकु, देटेन लाजर के गुजूटे बचातिंजेज डा।” 38यीशु भेबाव परेशान टे गहरा कासु सेंग्गोन कब्र कोनेन हेन, देटेन म्या गुफा डा एठा म्या घोटा मुगा दराजोन डोके डा। 39यीशु नी मंडीके, “घोटा टूले।” डी गोएन मिठाच गा बोकाजाई टे मार्था मंडी लज्जे, “हे प्रभु, दियाटे नका मेटे सुकींज हेजेवा होय, चोयाकी दिया गुजू गा उफुन दिन डाएन।” 40यीशु नी दियाटे मंडीके, “चोच इंज्नी अमाटे बान मंडीडुका डा कि अगर आम विश्वास डोएबा, मेटे परमेश्वर गा महिमा के डोगेवा।” 41मेटे दिकुनी घोटाके डी मर्गो टे म्याधेळेनके देटेन गोएन कोम्बोर डोके डा, डाबोलटे यीशु नी मठा धोटे मंडीके, “हे बाटे, इंज अमागा धन्यवाद डाएवा कि आमनी इंजा आजोम्जे होय। 42एठा इंज मालूम डा कि आम हमेशा इंजा आजोम्बा होय, पेनो जो गर्दी आसो-पासोन टेंगेनके होय, दिकुगा वोजीटे इंज खट्टेका मंडीके, देटेन कि दिकु विश्वास डाए कि आमनी इंज्के कुल्लेमी होय।” 43इनी मंडीटे डीचनी खट्टेका हाकोके, “हे लाजर, ओडे।” 44जो गोएन डा, देटेन गगाळातिंज गा कपळे गा पट्टीनौर डा सेंग्गोन ओटके एठा दिया म्वार कपळे गा पट्टी टे टोलके डा। यीशु नी दिकुटे मंडीके, “कब्र गा कपळे कोलाकी।”

यीशु गा खिलाफबेन आईडया

45मेटे जो यहूदी कुरकू मरियम टे मिलातिंजू हेन डा, दिकुनी यीशु गा इनी कामय डोके, दिकु तलाटे घोनेचकु का नी दिया लिंजेन विश्वास डाके। 46पेनो दिकु तालाटे चोटोकु नी फरीसि कुरकू गा मेरान ओलेडो यीशु गा कामय गा खाबोर घाल्के। 47येने लिंजेन मुख्यायाजक कुनी एठा फरीसि कुरकू खाटसभा गा कुरकू जमाटे कोम्बाराके, “आले चोच डाएवा इनी कोरो मेटे घोनेचका अचम्बो कामय घालेवा होय। 48अगर आबु डीचके आए बान रोराकातिंज बाने होय, मेटे हार जेकाभी मसीह गा रुपोन दिया विश्वास दडा लज्जूवा। एठा रोम शहर गा कुरकू हेजेवा डो आलेगा जगा, मंदिर एठा आलेगा देशो के नाशोएवा।” 49मेटे दिकु तलाटे कैफा जीमू गा म्या कोरो जो सभा गा सदस्यकु तलाटे म्याखोम डा, एठा डी साल गा खाटयाजक डा, डीचनी मंडीके, “आपे चोचका बान मालूम। 50एठा न येटेन समझातिंजुवा होय, कि आपे घल्जी भला होय, कि कुरकू घल्जी म्या कोरो घोजे एठा आलेगा जाटो नाशोऊ बाकी।” 51इनी बातो डीचनी हेज खुद टे बान मंडीडुका, पेनो डी साल गा खाटयाजक गा रुपोन, डीचनी इनी भविष्यवाणी डाके, कि यीशु इस्राएल देशो गा कुरकू घल्जी गुजूवा। 52पेनो सिर्फ दिकु घल्जी का बाने। देटेन परमेश्वर गा दूसरा कोणकु घल्जी भी गुजूवा जो इनी दुनिया गेन बिगळातिंज्के होय ताकी दिकुके जमाकुवा। 53इनिघल्जी डीका दिन टे यहूदी अगुवाकु यीशु के घोगेच योजना दडा लज्जे। 54इनी बुरी योजना गा वोजीटे यीशु डी टेमो टे यहूदी जिल्हा गेन खुल्ला रुपोटे बान इखाट डुका। पेनो देटे टे सुनसान जगा मेरान एप्रैम जिल्हा गा म्या पूरा गेन ओले। एठा हेजा चेलाकू गा सेंग्गोन डेनका थंदळ लज्जे। 55यहूदी कुरकू फसह गा तिवार गा टेमो मेरान डा, घोनेच कुरकू आसो-पासो गा गाँव टे यरूशलेम शहर गेन चोखाराऊ रिवाज गा रोंगो हेज खुदके चोखाराए। 56दिकु यीशु घगाटा एठा यरूशलेम गा मंदिर गेन टेंगेनटे इकुका मंडी लज्जे, “आपेन चोच सामझातिंजूवा होय? चोच देटेन तिवार गेन बान हेजे?” 57मुख्यायाजककु एठा फरीसि कुरकू नी यीशु के बंदी आरु गा हुकूम जीके डा, कि जो जेकान भी यीशु गा बारेन पता टाकु टासो, देटेन दिकुके घाले, ताकी डीचके गिरफ्तार गा घल्जी।

Currently Selected:

यूहन्ना 11: GOKNT

Highlight

Copy