ISihlabelelo Sezihlabelelo 6
6
Abangani:
1 Uyephi othandiweyo wakho,
wena omuhle kakhulu
phakathi kwabesifazane na?
Ushonephi othandiweyo wakho
sikufunise?
Intombi:
2 Othandiweyo wami
wehlele esivandeni sakhe,
emibhedeni yamakha,
welusele ezivandeni,
ukuze akhe iminduze.
3 Mina ngingowothandiweyo wami,
nothandiweyo wami ungowami.
Welusela phakathi kweminduze.
Insizwa Itusa Ubuhle Bentombi Yayo
Insizwa:
4 Sithandwa sami,
umuhle njengeThirisa,
uyabukeka njengeJerusalema,
uyahlonipheka njengempi.
5 Susa amehlo akho kimi,
ngokuba ayangisanganisa,
izinwele zakho
zifana nomhlambi wezimbuzi
wehla entabeni yakwaGileyadi.
6 Amazinyo akho
afana nomhlambi wezimvukazi
zikhuphuka kade zigezwa,
zinamaphahla, kungekho neyodwa
efelweyo kuzo.
7 Njengocezu lwehananadi,
zinjalo izihlathi zakho
ngale kwemvakazi yakho.
8 Ondlunkulu bangamashumi
ayisithupha,
izancinza zingamashumi
ayisishiyagalombili,
izintombi azinakubalwa.
9 Kodwa ijuba lami,
opheleleyo wami,
munye qhwaba;
uzelwe yedwa kunina,
uyikhethelo lalowo owamzalayo.
Amadodakazi ambona qede
ambize ngobusisiweyo,
ondlunkulu nezancinza
bambona maqede bamhashe.
Abangani:
10 Ngubani lo obukeka
njengentathakusa,
omuhle njengenyanga,
okhanya njengelanga,
ohlonipheka njengempi na?
Insizwa:
11 Ngehlele esivandeni samantongomane
ukuyobona izithelo eziluhlaza
esihosheni,
nokubona ukuthi
ngabe umvini usuqhakazile
namahananadi asekhahlele.
12Ngingazelele nje ukulangazelela kwami
kwangibeka ezinqoleni zempi,
zabantu benkosana yami.
Abangani:
13 Buya, buya mShulami!
Buya, buya ukuze sikubuke!
Insizwa:
Yini enizoyibona
kumShulami na?
Kunjengokusina phakathi
kwamaqembu amabili.
Currently Selected:
ISihlabelelo Sezihlabelelo 6: ZUL20
Highlight
Share
Copy
Want to have your highlights saved across all your devices? Sign up or sign in
Bible in isiZulu 2020 © Bible Society of South Africa 2020. Digital Version © Bible Society of South Africa 2020. All rights reserved. www.biblesa.co.za.
Bible in isiZulu 2020 with Deuterocanonical Books © Bible Society of South Africa 2020. Digital Version © Bible Society of South Africa 2020. All rights reserved. www.biblesa.co.za.
