ISihlabelelo Sezihlabelelo 7
7
Ubuhle Bentombi Esinayo
1 Zaze zazinhle izinyawo zakho ezimbadadeni,
wena ndodakazi yesikhulu!
Amathanga akho ayizindilinga
anjengemihlobiso,
umsebenzi wezandla zengcweti.
2Inkaba yakho iyisitsha esiyindilinga
esingalintuli iwayini elixutshiweyo,
isisu sakho simbulungene okwendundumana kakolo,
ebiyelwe ngeminduze.
3 Amabele akho amabili anjengamazinyane amabili,
amaphahla ayizixhumo zensephe.
4 Intamo yakho ifana nombhoshongo
wophondo lwendlovu,
amehlo akho afana namachibi aseHeshibhoni,
ngasesangweni eBhathi Rabhimi;
ikhala lakho linjengombhoshongo waseLebhanoni,
obhekene neDamaseku.
5 Ikhanda lakho linjengeKharimeli,
nomyeko okulo usabukhwebezane,
inkosi ibambeke njengomthunjwa emiyekweni.
Insizwa Ikhuluma Ngothando Lwayo
Insizwa:
6 Umuhle ngokubabazekayo wena sithandwa,
futhi uyangenamisa!
7Isiqu sakho sifana nesihlahla sesundu,
namabele akho afana namahlukuzo alo.
8 Ngithi:
“Ngizokhwela esihlahleni sesundu,
ngibambelele emagatsheni aso.”
Ngiyakucela, sengathi isifuba sakho
singafana namahlukuzo omvini,
nephunga lokuphefumula kwakho
lifane namahhabhula,
9 nolwanga lwakho lufane newayini elihle,
elehla kabushelelezi kothandiweyo wami,
lewuka ezindebeni nasemazinyweni.
Insizwa:
10 Mina ngingowothandiweyo wami,
naye uyangilangazelela.
11Woza, wena othandiweyo wami,
siye endle,
silale emizaneni.
12 Masivuke ekuseni siye ezivinini,
siyobona ukuthi umvini usuqhakazile,
nezimbali zawo sezivulekile,
nokuthi amahananadi asekhahlele.
Kulapho ngiyokunikeza khona uthando lwami.
13 Amamandragora athaphuka iphunga elimnandi,
ngaseminyango yethu
kukhona zonke izinhlobo zezithelo zekhethelo,
ezintsha nezindala,
engizibekele wena, othandiweyo wami.
Currently Selected:
ISihlabelelo Sezihlabelelo 7: ZUL20
Highlight
Share
Copy
Want to have your highlights saved across all your devices? Sign up or sign in
Bible in isiZulu 2020 © Bible Society of South Africa 2020. Digital Version © Bible Society of South Africa 2020. All rights reserved. www.biblesa.co.za.
Bible in isiZulu 2020 with Deuterocanonical Books © Bible Society of South Africa 2020. Digital Version © Bible Society of South Africa 2020. All rights reserved. www.biblesa.co.za.
