ดอ โฆว 40

ลอง อาโยว นับ ดี กาลาง ปี อึณบาว อี

1วาย อัน ตี อึณ มึห ดา อู วี, อัน มูห ดา อี ดัว ปี ดี เดียง ดี คูนดีคัม อี อึบ มืง แอฆึบ. อึณ บอ มึห ปอ อู วี, อัน มูห ดา อี โบง คามูน อาดา คูนดีคัม. ฆาย อา วี โบง อี ตู ล็อะ น็อห คูนดีคัม. 2ปัน ตี คูนดีคัม บอ รู ดี ฆาย อา วี. 3อัน บอ คร็อง ฆาย แคง กาปึม อี มูห กาปึม อาโพวทีบ. อึณ มูห โดง กอย อาโยว ตึอน. 4อามู อามาด คูนดีคัม ตึอน ยี จัร อาโยว วี บัร ฆาย อา วี ตึอน.

5วาย อัน ตี อาว เหลณ, ฆาย อา วี บอ ดา อี ดัว ปี ดี เดียง ดี คูนดีคัม บอ ดา อี โบง คามูน อาดา คูนดีคัม, ฆาย บอ อึณบาว แคง หมึร. อู วี อึณบาว อู โมยว.

6ซีณวัห ดอ วี ตัห อาโยว, วี ยอด ฆาย, อัน บอ ยึร, นา ฆาย อาว ดาคึย. 7อัน วี ดีหมอด ฆาย ต็อห, “เหมา อึณปาย ปี ตู ดาคึย บาย อาตึร?”

8ฆาย วี ต็อห, “ยาย แฮะ อึณบาว. อึณ ยี ตู มึห อาเซ อี ปึอน กาลาง ลอง ดาง อัน ดี ยาย.” อาโยว วี ต็อห, “เฌาพรา นับ ดี กาลาง ลอง ดาง ปี อึณบาว บาย. แตห บาย กาลาง ดี โอว, แตห โอว โทม.”

9ปัน ตี ดา อี ดัว ปี ดี เดียง ดี คูนดีคัม, อัน วี กาลาง ปี อึณบาว อัน, แตห อาโยว โทม. อัน ต็อห, “ดอ อึณบาว โอว, อึณ บอ มึห เฮ มางูน กอย ดี อาต โอว. 10เฮ ตี มึห รา อัน โอย รา. ดอน รา วี มึห โบห ดึม, แฮะ ฮอต บอ วี บรัห อู เฌณ บอ มึห เบล อัน. 11โอว ยี มึห ดี โฆ็ง ซีลัยะ ปี เดียง คูนดีคัม. โอว บอ ดึห เบล มางูน ตึอน, เนียะ แตห อึม อัน เลห แคง ซีลัยะ คูนดีคัม. แฮะ ฮอต โอว วี ดัว ซีลัยะ, แตห คูนดีคัม เดียง.”

12อัน แฮะ ฮอต กาลาง ปาย ตี อาโยว วี ต็อห, “ลอง ดาง อัน, อึณ ปาย นี. รา เฮ โอย รา, เฆ ปี โอย ซีแง. 13ฮี โนะ โอย ซีแง, คูนดีคัม ดี บลัวะ แวน ปี ลูต แม, ดัว แม วี โบง ฆาน แม. ปัน ตี แม ดี วี ดัว ซีลัยะ ปี ดี เดียง ดี อัน, แตห อึณ ปี ปี ดึอม โบง แม ดี อัน. 14เซ แม แฮะ กอย ดาคึย, แตห แม วี โหลห โอว, แตห แม วี กาลาง ดี คูนดีคัม ลอง โอว, แตห แม เทว ดี จอย โอว เลห แคง กาปึม นี. 15คา อาต นู, เฆ แฮะ เหมต โอว แคง มืง แฮแบร ตึอน, ตึย โอว ฌัม ดี นี. แฮะ ฮอต ฌัม ดี นี, โอว ตู โบง มาเซ อี กาอาบ คร็อง แคง กาปึม.”

16วาย อัน ตี ดา อี โบง คามูน ปี โฮม คูนดีคัม ตึอน, อัน บอ ยึร, ลอง ดาง อัน แปะ แฮะ กาลาง อาโยว แฮะ หมึอม. อัน วี กาลาง ดี อาโยว, “นี, อึณ มูห ปี อึณบาว โอว. โอว แฮะ มึห มานา โอย บลัะ ดาง แดง ฆีณ โอว. 17แคง มานา อี กอย นา แดง อึณ มึห คามูน แบน โมยว แบน โมยว. เฆ มาซีม ยี ตัห โฮม คามูน ตี แดง ฆีณ โอว.”

18อาโยว ตึอน วี ต็อห, “ลอง ดาง อัน ตี, อึณ ปาย นี. มานา โอย บลัะ ปี โอย ซีแง. 19วาย แฮะ ฮอต โอย ซีแง, คูนดีคัม ดี แดบ แวน ฆีณ แม, วี ฮอย โดว แม ดี ร็อง, แตห เฆ มาซีม ตัห โฮม ยัง แม.”

20วาย อัน ตี บอ ฌัม โอย ซีแง, อึณ มูห ซีแง ฆึอด คูนดีคัม ตึอน. อัน วี โบง บลอย ตาง, เฮียง แดเจณ อัน ดอน อี โฮม โบม. อัน วี แดะ ดา อี ดัว ปี ดี เดียง ดี อัน ฆาย ดา อี โบง คามูน, แตห ฆาย ตัห โดง กอย อัน. 21อัน วี แตห ดา อี ดัว ปี ดี เดียง ดี อัน วี โบง ฆาน อัน ปี คา อาต, แตห อัน วี ดัว ซีลัยะ ดี คูนดีคัม, แตห อัน เดียง. 22ดา อี โบง คามูน อาดา คูนดีคัม, คูนดีคัม วี แตห อี แดบ แวน ฆีณ อัน, แตห อึณ วี แบน โตต ดอน โมยว ปี แปะ แฮะ กาลาง อาโยว ตึอน.

23วาย อัน ตี ดา อี ดัว ปี ดี เดียง ดี คูนดีคัม, อัน ตู วี โหลห อาโยว. อัน แฮะ วี ปีว โตต ลอง อาโยว.

Currently Selected:

ดอ โฆว 40: pce

Highlight

Copy