ดอ โฆว 39

ลอง อาโยว ตัห กอย มืง แอฆึบ

1อาโยว ตึอน ยี แฮะ ฌัม มืง แอฆึบ, อึณ มึห ดูอี แอฆึบ อู วี, อัน จืร อาโพวทีบ. อัน มูห อามู อามาด คูนดีคัม. อัน บอ มูห ดา โบว อี อึบ ดา ซึก อี บัร โฮว คูนดีคัม. อัน วี จึห อาโยว ตึอน ดี ดูอี อาซามาน อี แฮะ ตึย อัน ฌัม แคง มืง แอฆึบ.

2เฌาพรา ยี กอย รึม โดบ อาโยว, แตห อัน แป ดี โบง โตต แคะ ปี จัร เฆ อัน โบง. อัน มืร กอย แคง กาง ดา กาณา อัน. 3ดา กาณา อัน บอ ยึร, เฌาพรา กอย รึม โดบ อาโยว, แตห อัน แป โตต ปี โบง อัน. 4ปัน ตี ดา กาณา อัน กอ อึง อาโยว, แตห อัน แบน แดเจณ อี จอย อัน. แฮะ ฮอต อัน บอ แตห อาโยว อึบ โตต แคง กาง อัน. บอ ดูอี บอ โกรวกราม อัน, อาโยว อึบ โตต. 5อู ซีณ ดอ แบน อาโยว ดา อี อึบ โตต แคง กาง อาโพวทีบ ตึอน, เฌาพรา ม็องการา แตห กาง ตี โกบ มึห อาโยว ตึอน. แคะ ปี มึห อาโพวทีบ, แคะ กอย แคง กาง, แคะ กอย โดง นา อัน, เฌาพรา ม็องการา แตห โตต ดอน โมยว. 6อาโพวทีบ อาว ฮู โลว โบง มาเซ แคง กาง อัน. อาโยว โบง ซีคยา โตต ดอน โมยว. อึณ ฆีด มี ปี ดี โฮม อัน, อัน โลว กาลาง มาเซ ปี ม็อก อัน.

7อาโยว ตึอน ยี ชีด กาเซา, บอ โดว บอ นา อัน. ปัน ตี อาว เหลณ, อีบึณ ดา กาณา อัน ตึอน, อัน บอ อึง อาโยว, มึห น็อห ซี ปึอน อัน. อัน ต็อห, “แตห แม ลาย โอว.”

8อาโยว ยี ต็อห, “อาว ปึอน โบง ปาย ตี. ดา กาณา โอว หณึม โอว, แฮะ แตห โอว โบง โตต ดอน โมยว แคง กาง อัน. 9อัน แฮะ แตห โอว มึห ปวน แคง กาง อัน. อัน มืร ตู โฆรบ อูน มาเซ. อึณ ยี มูห แม, อีบึณ อัน, อัน แฮะ โฆรบ อูน. เหมา โอว ดี ปาย ดี โบง นา ตู หมึอม ดี อัน? บอ เฌาพรา ดี ดัม หมาบ ดี โอว, เซ โอว โบง ปี หมาณ แม.” 10อัน แฮะ ฮอต ต็อห ปาย ตี อีบึณ ดา กาณา อัน ตึอน วี หมาณ ปาย ตี แบน ซีแง แบน ซีแง. อาโยว ยี ตู โทม โฆรห ตี, ตู ฮาว โดง อีด อัน, ตู กอย รึม โดบ อัน.

11อึณ บอ มึห อู ซีแง, อาโยว แฮะ ตัห ลึบ แคง กาง, แตห อัน โบง ฆาน อัน. อึณ ตู มึห อาเซ กอย รึม โดบ อัน แคง กาง. 12ดอ อัน ตี อีบึณ ดา กาณา อัน บอ ดืด อาโยว ต็อห, “แตห แม ลาย โอว.” อาโยว ยี เตา เลห นา เรต อู เฌณ. อีบึณ ตึอน บอ ปึอน ดี ปา ครึง อัน.

13อัน บอ ยอด อัน ปึอน ดี ปา ครึง อาโยว ดี แด อัน, 14อัน วี ดัด แดะ หมาย อัน ตัห โดง กอย อัน. อัน วี ต็อห ดี เฆ, “นี, แตห เบ ยอด. แดเจณ อี มูห อาโมยว แฮแบร ปี แดะ ดา กาณา เบ, อัน แฮะ ตัห โดง อีด โอว, ต็อห ดี ลาย โอว. โอว ยี ดัด ตาง. 15ดอ ยึร อัน โอว ดัด ตาง, อัน วี แวน ครึง อัน ดี ตี, ฮาว เตา เลห นา เรต กาง อู เฌณ.”

16ปัน ตี อัน วี เบลห อูน ครึง อาโยว, แตห ดา กาณา อัน วี ตัห. 17อัน วี กาลาง ดี อีมาย อัน ปี ปี กาลาง อัน ดี หมาย ตึอน. อัน ต็อห, “แม แฮะ ดึห แดเจณ อาโมยว แฮแบร ตึอน ตัห ฌัม กาง เอ, แตห อัน ลาย เย อีบึณ. อัน แฮะ ตัห ลึบ โดง อีด โอว. 18โอว ยี ดัด ตาง, แตห อี ตัห จอย โอว. ปัน ตี อัน แวน ครึง อัน, แตห อึณ กอย ดี โคบ โอว, แฮะ ฮอต, อัน ฮาว เตา เลห ตัะ กาง.”

19ดา กาณา อัน วี โทม โฆรห ปี กาลาง อีบึณ อัน, ปี พยาก อัน อาโยว, อัน บอ รู กาเซา. 20ปัน ตี ดา กาณา วี เหมต อาโยว, คร็อง อัน แคง กาปึม อี มูห โดง ปี คร็อง เฆ หมาย คูนดีคัม.

21ดอ กอย อาโยว แคง กาปึม ตึอน, เฌาพรา วี กอย รึม โดบ อัน, ตู แวน อัน. เฌาพรา โบง แตห ดูอี บัร กาปึม มึห น็อห โวว อาโยว, โบง นา หมึอม ดี อัน. 22ดูอี บัร กาปึม บอ แตห อาโยว วี อึบ เฆ ดูอี ดอน อี อี กอย แคง กาปึม ตึอน. มาเซ ปี โลว โบง เฆ, อัน วี แตห อาโยว จัร อี เฮา โบง. 23ดูอี บัร กาปึม, อัน อาว ฮู โบง มาเซ. อัน แตห อาโยว อึบ เฆ อี กอย แคง กาปึม ดอน อี. อัน แฮะ นับ, เฌาพรา แฮะ กอย รึม โดบ อาโยว, แตห อัน แป โตต แคะ ปี โบง อัน.

Currently Selected:

ดอ โฆว 39: pce

Highlight

Copy