ดอ โฆว 41

ลอง อาโยว กาลาง ลอง ดาง ปี อึณบาว คูนดีคัม

1อึณ วี โนะ ปอ อา ซีนัม. ดอ อัน ตี คูนดีคัม แคง มืง แอฆึบ แฮะ อึณบาว. ดอ อึณบาว อัน, อัน กอย ดี โคบ แบลง อึม นีลา. 2อึณ บอ มึห มามัก บู โดว อี เลห ตัห แคง อึม. เฆ แฮะ ฆลัณ กาเซา, ฮูน เฆ บอ ชีด. เฆ วี จูห ดี โฮม เปต. 3วาย อัน ตี อึณ วี มึห มามัก ปอ บู โดว, เลห ตัห แคง อึม. เฆ ยี คยา กาเซา, อาว ชีด. เฆ วี ตัห กอย รึม บาง อึม ตึอน โดบ เฆ มามัก อี ฆลัณ. 4เฆ มามัก อี คยา, เฆ วี จูห ดี โฮม มามัก อี ฆลัณ. แฮะ ฮอต ปัน ตี คูนดีคัม อึณซึห.

5ปอ อู เฌณ คูนดีคัม วี อีด, วี อึณบาว. อึณ มึห กาบาง โหงว อู กาบาง. กาโย็ง บู กาโย็ง แฮะ เลห แคง กาบาง อู กาบาง ตี. เฆา อัน บอ โนะ บอ ซีน แคง กาโย็ง ตี. 6วาย อัน ตี อึณ วี มึห กาโย็ง โหงว ปอ บู กาโย็ง. เฆ ยี เดียบ, ดีหลัห โกบ คูน อี ตัห แคง แปร กาฮ็อห. 7กาโย็ง โหงว อี เดียบ วี โฮม กาโย็ง โหงว อี เฆา โนะ. ปัน ตี คูนดีคัม วี อึณซึห. อัน บอ นับ, อัน แฮะ อึณบาว ปาย ตี.

8อัน แฮะ ฮอต อึณบาว, ซีณวัห น็อห อัน กาฮัวะ. โคว, อัน แดะ ดา อี มึห อางยาน บอ เฆ อี นับ ดี โบง อี หมึอม อาม แบน โมยว แบน โมยว, แตห เฆ ตัห โดง กอย อัน. อัน วี กาลาง ดี เฆ ลอง ปี อึณบาว อัน. อึณ ยี ตู มึห อาเซ อี ปึอน กาลาง ลอง ดาง ปี อึณบาว คูนดีคัม.

9ปัน ตี ดา อี ดัว ปี ดี เดียง ดี คูนดีคัม, อัน ต็อห, “แม เฌา, อาตึร โอว แฮะ วี โหลห หมาบ โอว. 10คา อาต นี, แม แฮะ ดึอม รู ดี ดา อี โบง คามูน ตึอน, แม บอ รู ดี โอว. โคว, แม แฮะ คร็อง ยาย แคง กาปึม แคง กาง ดา โบว อี อึบ ดา ซึก อี บัร โฮว แม. 11อู หมึร, ยาย อา วี แฮะ อึณบาว. ปี อึณบาว ยาย, อึณ มึห ลอง ดาง อัน, อู วี อู โมยว. 12ดอ อัน ตี อึณ ยี มึห ดูอี อาโมยว แฮแบร. อัน กอย รึม โดบ ยาย. อัน มูห แดเจณ ดา โบว อี อึบ ดา ซึก อี บัร โฮว แม. ดูอี ตึอน, อัน แฮะ กาลาง ดี ยาย ลอง ดาง ปี อึณบาว ยาย ตึอน. 13อึณ บอ แบน โตต ดอน โมยว ปี กาลาง อัน ดี ยาย. แม คูนดีคัม แฮะ วี แดะ โอว, แตห โอว วี ปึอน ดี โบง ฆาน โอว. แม คูนดีคัม ยี แฮะ ง็อห แวน ดา อี โบง คามูน แม.” 14อัน แฮะ ฮอต กาลาง ปาย ตี คูนดีคัม วี ตึย อี แดะ อาโยว ตึอน. เฆ วี ตึย ตัห อัน อู เฌณ, แตห อัน เลห ตัะ กาปึม, ฮาว โดง กอย คูนดีคัม. เฆ แตห อัน กับ ฆีณ, ชึบ ครึง กามาย. แฮะ ฮอต, อัน บอ ฮาว กอย ดี อาต คูนดีคัม.

15คูนดีคัม ต็อห ดี อัน, “โอว แฮะ อึณบาว. อึณ ยี ตู มึห อาเซ อี ปึอน กาลาง ดี โอว ลอง ดาง อัน. เฆ ยี ต็อห ดี โอว, อึณ มูห แม, แม นับ ดี กาลาง ลอง ดาง ปี อึณบาว อี.”

16อาโยว ตึอน วี ต็อห, “อึณ ตู มูห อางยาน โอว, แม คูนดีคัม. อึณ มูห เฌาพรา. อัน ดี กาลาง ดี โอว ลอง ดาง ปี อึณบาว แม ปี ซี นับ แม.” 17คูนดีคัม วี แค ดี อาโยว ต็อห, “ดอ อึณบาว โอว, โอว แฮะ กอย ดี โคบ แบลง อึม นีลา ตึอน.

18ดอ อัน ตี อึณ มึห มามัก บู โดว, เลห ตัห แคง อึม. เฆ บอ ตาง, บอ ฆลัณ. เฆ โฮม เปต ดี โคบ อึม. 19แฮะ ฮอต, อู เฌณ, อึณ วี มึห มามัก บู โดว เลห ตัห แคง อึม. เฆ ยี คยา กาเซา, อาว ชีด มาเซ. โอว ตู ดึอม ยึร อี ตู ชีด แคะ ตี แคง มืง แอฆึบ นี. 20เฆ มามัก บู โดว อี ตู ชีด, อี คยา กาเซา ตึอน, เฆ วี โฮม มามัก อี ฆลัณ, อี ชีด. 21เฆ แฮะ ฮอต โฮม, อึณ ยี ตู กาบลืง มาเซ. เฆ คยา ปี บรีม. แฮะ ฮอต ปัน ตี โอว อึณซึห.

22โอว บอ อึณบาว ปอ อู จึบ. โอว ยึร, อึณ มึห กาบาง โหงว อี มึห กาโย็ง บู กาโย็ง. กาโย็ง เฆ ตี มึห เฆา โนะ, แฮะ หมึอม. 23ปัน ตี อึณ วี มึห กาโย็ง โหงว ปอ บู กาโย็ง. เฆ ยี เดียบ, เฆ บอ ดีหลัห ดี คูน อี บูด แคง แปร กาฮ็อห. 24กาโย็ง เดียบ ตี, เฆ วี โฮม กาโย็ง อี หมึอม บู กาโย็ง. แคะ ตี โอว แฮะ แค ดี เฆ ดา อี นับ ดี โบง นา หมึอม อาม. อึณ ยี ตู มึห อาเซ นับ ดี กาลาง ดี โอว ลอง ดาง อัน ตี.”

25อาโยว ตึอน วี ต็อห ดี คูนดีคัม, “ปี อึณบาว แม อา เฌณ, ลอง ดาง อัน อู โมยว. เฌาพรา แฮะ แตห แม คูนดีคัม นับ ปี ดี โบง อัน. 26เฆ มามัก ฆลัณ บู โดว ปี บู ซีนัม. เฆ กาโย็ง โหงว อี เฆา โนะ บอ ปี บู ซีนัม. มามัก เฆ กาโย็ง โหงว มูห ลอง ดาง อัน อู โมยว. 27มามัก บู โดว, เฆ อี คยา, เฆ อี ตัห ดี ปัน, บอ เฆ กาโย็ง โหงว บู กาโย็ง, เฆ อี เดียบ, เฆ อี ดีหลัห ดี คูน ตัห แคง แปร กาฮ็อห ตึอน, เฆ บอ ปี ปอ บู ซีนัม. อึณ ดี มูห อาคราว เอต โบม.

28อึณ มูห ปี กาลาง โอว ดี แม. เฌาพรา แฮะ บยัะ ดี แม ปี ดี โบง อัน. 29แคง มืง แอฆึบ บอ มืง, อึณ ดี มึห บู ซีนัม, ปี ซัม ปี ปีด เบ ดี ออง, ดี มึห กืน. 30แฮะ ฮอต ปัน ตี อึณ ดี มึห บู ซีนัม ดี เอต โบม. เฆ ดูอี ดี บอ ปีว อาคราว อาต นู ดอ แฮะ มึห กืน. อาคราว เอต โบม ตี, อึณ แตห มืง บอ มืง ชึม. 31อาคราว ดี เอต โบม, อึณ ดี หณาบ กาเซา ดี อี, แตห เฆ ปีว โตต อาคราว ดอ ดาคึย เฆ. 32แม ยี แฮะ อึณบาว อา เฌณ, ลอง ดาง อัน, อึณ แฮะ หมาน, แฮะ มูห. อาว เหลณ เฌาพรา ดี โบง ปาย ตี.

33ดอ ตี นี, แตห แม ร็อห ดา อู วี, อี มึห อางยาน, อี นับ แบน โมยว แบน โมยว, แตห แม แตห อัน อึบ มืง. 34แตห แม จัร อามู อามาด แม, แตห เฆ วี แฆบ โหงว บอ อูน โหงว ดี ดูอี แคง มืง บอ มืง. เซ เฆ ปึอน พัน บูน, ดึห อู บูน ดอ อาคราว มึห กืน เฆ. 35ซีนัม ดี ตัห ดอ มูห อาคราว มึห กืน, แตห แม จัร เฆ แฆบ อูน แคะ มึห ปี ดี โฮม. แตห เฆ วี เบลห อูน โหงว ตี แคง มืง ดอน มืง บอ บัร โหงว ตี. 36ปี ดี โฮม ตี, แตห เบ วี มึห ดี โฮม ดอ ฌัม อาคราว เอต โบม อี ดี ตัห แคง มืง แอฆึบ บอ มืง. เซ แม คูนดีคัม โบง ปาย ตี เฆ ดูอี บอ มืง, เฆ ตู ชึม.”

37อาโยว แฮะ ฮอต กาลาง ปาย ตี บอ คูนดีคัม บอ อามู อามาด อัน, เฆ บอ โพรม บอ อึง ปี กาลาง อัน. 38คูนดีคัม วี ต็อห ดี อามู อามาด อัน, “เย ตู ยึร ดูอี อี ปี อาโยว ตี. อัน มึห น็อห พึอม เฌาพรา อี กอย แคง โดว อัน.”

39ปัน ตี คูนดีคัม วี กาลาง ดี อาโยว ต็อห, “เฌาพรา แฮะ แตห แม นับ ลอง อัน ตี ดอน โมยว. โคว, อาว มึห อาเซ, อี มึห อางยาน ปี แม. 40โอว ดี แตห แม อึบ มืง โอว. แฮะ ฮอต, เฆ ดูอี ดอน อี ดี โทม ปี จัร แม. อึณ ฆีด มี โอว. ปวน โอว ดี ตาง หลึอม ปวน แม. 41โคว, ดอ ตี นี, โอว แตห แม แบน ดา กาณา อี อึบ มืง แอฆึบ.”

ลอง อาโยว อึบ มืง แอฆึบ

42คูนดีคัม แฮะ ฮอต กาลาง ปาย ตี อัน บอ ดึห ซีกานู อี มึห ฌึม อัน, ชึบ ดี แด อาโยว. แฮะ ฮอต อัน วี ดัว อัน ชึบ ครึง บอด, ฮอย มากาแวะ ครีว ดี แมง อัน. 43คูนดีคัม บอ แตห อัน ป็อะ ลักเลา อึณปร็อง อี มูห ลักเลา อามู อามาด อัน อี อึบ มืง. เฆ วี ฮาว แยต ดี อาต อัน ดัด, “แตห เบ ครึบเครา ดี อาต ดา กาณา.” ปาย ตี เฆ แตห อาโยว แบน ดา กาณา อี อึบ มืง แอฆึบ.

44ปัน ตี คูนดีคัม วี กาลาง ดี อาโยว, “อาว มึห ดูอี แคง มืง แอฆึบ บอ มืง อี ปึอน โบง มาเซ, เซ แม ตู ควาง อัน โบง.” 45คูนดีคัม บอ แตห อาโยว จืร อาฌาเพนาดพาเน. อัน บอ ดัว อีบึณ ดี อาโยว. อีบึณ ตี จืร นาง เอซานาด อี มูห ฆอน อาโพวทีพีรา. ฆูณ นาง ตี, อัน มูห ดา อี หลู ดี เฌาพรา แคง มืง โอน. เฆ ดอน อี แคง มืง แอฆึบ บอ นับ อาโยว ตึอน.

46ดอ แบน อาโยว อามู อามาด คูนดีคัม แคง มืง แอฆึบ, อาซาก อัน แฮะ โนะ โอย ฆึร ซีนัม. อาโยว แฮะ ฮอต เลห ตัะ โดง กอย คูนดีคัม, อัน วี ฮาว ฌัม ดอน โปละ แคง มืง แอฆึบ. 47อาดา บู ซีนัม ดอ ลัต กืน ปี ดี โฮม, 48อัน วี จัร อี ดึห กาฌูะ โตต ปี ดี โฮม, แคะ กืน อี ลัต แคง มืง บอ มืง. แคง มืง ดอน มืง อัน แตห อี กาฌูะ เบลห อูน โตต ปี ดี โฮม อี เลห แคง โดง นา อี กอย กาตัด มืง ตี. 49ปาย ตี อัน แฮะ เบลห อูน โหงว กืน กาเซา. อึณ ปี กาฮาต ดี อึม นัมมูกซารา, อาว ฮู ปึอน ตีห แคะ เหมา อึณ มูห, แคะ เหมา อึณ กืน.

50อาต ฌัม ซีนัม เอต โบม, อาโยว ตึอน ยี มึห ฆอน อีมาย อา วี. อึณ บอ มูห ฆอน นาง เอซานาด, อี มูห ฆอน ดา อี หลู ดี เฌาพรา แคง มืง โอน, อี จืร อาโพวทีพีรา ตึอน. 51ฆอน ดัง อัน, อาโยว แตห อัน จืร อามานาเซ. ลอง ดาง อัน ตี, อึณ มูห ‘เฌาพรา แฮะ แตห โอว ปีว ดูก โอว บอ โดง กอย บรีม โอว.’ 52ฆอน ปอ วี อัน แตห อัน จืร อาเอพารีม. ลอง ดาง อัน ตี, อึณ มูห, ‘เฌาพรา แฮะ โบง แตห โอว มึห ฆอน แคง มืง โดง ฌัม โอว ดูก.’

53ปัน ตี แฮะ โนะ บู ซีนัม ดอ มึห กืน. 54อึณ วี ฌัม อาคราว เอต โบม. อึณ แบน โตต ดอน โมยว ปี ดึอม กาลาง อาโยว. เฆ ดูอี แคง มืง ดอน มืง, เฆ วี เอต โบม. อึณ ยี มึห แคง มืง แอฆึบ ตึอน, เฆ ดูอี มึห ปี ดี โฮม. 55ปัน ตี บอ แคง มืง แอฆึบ เฆ ดูอี ดอน อี บอ แกร ดี เอต โบม, เฆ วี ฮาว ดี คูนดีคัม, หมาณ แตห อัน ดัว ปี ดี โฮม ดี เฆ. คูนดีคัม ยี ต็อห, “แตห เบ ฮาว โดง กอย อาโยว ตึอน, แตห เบ โบง ปี จัร อัน ดี เบ.”

56อึณ บอ ฌัม อาคราว เอต โบม แคง มืง บอ มืง, อาโยว ตึอน วี วึห ฆรัว อี มูห โดง แฆบ อูน อัน ปี ดี โฮม. แฮะ ฮอต อัน จูห ดี กาซาง โหงว ดี ดูอี แคง มืง แอฆึบ. อัน โลว กาซาง อี แจก อี แจก. โคว, อาว ฮู มึห ปี ดี โฮม มาเซ แคง มืง บอ มืง. 57ปัน ตี บอ เฆ ดูอี อี เฮา, เฆ ตัห มืง ดอน มืง แดง กาดาย, เฆ หมาณ ปี ดี โฮม ดี อาโยว ตึอน. โคว, เฆ ดูอี แดง กาดาย บอ กาดาย แฮะ เอต โบม.

Currently Selected:

ดอ โฆว 41: pce

Highlight

Copy