ดอ โฆว 37

1อาโกบ ตึอน ยี ฮาว กอย แคง มืง โดง กอย ฆูณ อัน อี มูห มืง กานัณ ตึอน.

2ปี ดี แค นา อาต, อึณ มูห ลอง เฆ หลูกหลาน อาโกบ ตึอน.

ลอง อาโยว อึณบาว

ฆอน อาโกบ อี จืร อาโยว ตึอน, อาซาก อัน แฮะ โนะ ฆึร ดี บู ซีนัม, อัน วี บัร มาบู ฆูณ อัน. อัน กอย รึม โดบ อีกัด อัน. อึณ มูห บอ เฆ ฆอน อีมาย นาง บีลา ฆาย นาง ซีพา, อี มูห อีบึณ ฆูณ อัน. อาโยว ยี วี ฮาว โดง กอย ฆูณ อัน, กาลาง นา ตู หมึอม แปะ แฮะ โบง เฆ.

3อาโกบ ตึอน ยี ร็อก อาโยว หลึอม ฆอน อีมาย อัน ดอน วี. โคว, อัน มูห ฆอน เตียะ อี ฆึอด ดอ แฮะ ฮอต กัด อัน. อัน บอ แตห อี โบง ซีโตว แคม, ดัว ดี ฆอน ปี ร็อก อัน ตี. 4อีกัด อัน, เฆ บอ นับ, ฆูณ เฆ ร็อก อาโยว หลึอม เฆ, เฆ วี รู กาเซา ดี วา เฆ. เฆ ตู ซี ปึอน กาลาง โฆรห หมึอม ดี อัน.

5อู ซีแง อาโยว ตึอน อึณบาว. อัน วี กาลาง ลอง อัน ตี ดี อีกัด อัน. ปัน ตี เฆ แว รู กาปัว ดี อัน. 6อัน ต็อห ดี เฆ, “แตห เบ โทม ปี อึณบาว โอว. 7เอ ดอน อี กอย แคง โดง นา, ปัก ซีบัยะ โหงว. ซีบัยะ ปี ปัก โอว, อึณ บอ จ็อง ซืร. ซีบัยะ โหงว ปี ปัก เบ, เฆ วี ตัห กอย โรบ, โฆม ดี อาต ซีบัยะ โอว ตี.”

8เฆ อีกัด อัน วี ต็อห, “แม ทาง, แม ดี บอ อึบ เย, แม ดี บอ แบน ดา กาณา เย?” ปัน ตี เฆ แว รู กาปัว ดี อัน. เฆ วี โหลห ปี อึณบาว อัน บอ ปี กาลาง อัน ดี เฆ.

9วาย อัน ตี อาโยว ตึอน วี อึณบาว ปอ อู เฌณ. อัน วี ต็อห ดี อีกัด อัน, “โอว วี อึณบาว ปอ เฌณ. โอว แฮะ ยึร ซีแง ฆาย มาเฆียน บอ เฆ ซีมัณ ฆึร ดี อู โบ็ง. เฆ บอกาเฆลียด แฮะ โฆม ดี อาต โอว.”

10อัน บอ กาลาง ลอง ปี อึณบาว อัน ตี ดี ฆูณ อัน. ฆูณ อัน ยี เอห อัน. อัน ต็อห, “มาเซ ปี อึณบาว แม อาตี? แม ทาง มา แม, เฆ อีกัด แม บอ โอว, เย ดี กรึบ แม?” 11เฆ อีกัด อัน, เฆ วี รู ดี อัน กาปัว. ฆูณ อัน ยี โนว อูน โตต แคง น็อห อัน, แตห อัน โหลห เซเซ.

ลอง อีกัด อาโยว ย็อง อาโยว

12วาย อัน ตี อีกัด อาโยว, เฆ วี ฮาว มืง เซเคม, บัร มาบู บอ มาแป ฆูณ เฆ. 13ฆูณ เฆ ยี จัร อาโยว ตึอน ต็อห, “แตห แม ฮาว มืง เซเคม อี มูห โดง กอย อีกัด แม, บัร มาบู เฆ มาแป โอว.” อัน วี ต็อห, “โอว ดี ฮาว.”

14ฆูณ อัน วี ต็อห, “แตห แม ฮาว ยอด อีกัด แม, โยว เฆ กอย ดาคึย, โยว เฆ โดว ซัดดาวา แฮะ กอย ซีคยา. แฮะ ฮอต, แม วี ตัห กาลาง ดี โอว.” ปัน ตี ฆูณ อัน ตึย อัน ฮาว แคง ฆลัง อี มูห โดง กอย มืง เฮโบรว ตึอน.

15อาโยว แฮะ ฌัม มืง เซเคม, อัน บอ ฮาว วีน ดี แล แคง โดง นา. ดอ อัน ตี อัน กาตูณ ดา อู วี อี ดีหมอด อัน ต็อห, “มาเซ ปี เหรต แม ดี นี?”

16อัน วี ต็อห, “โอว แฮะ ตัห เหรต อีกัด โอว. เฆ แฮะ ตัห ดี นี, บัร มาบู. แม นับ โดง กอย เฆ?”

17ดา อี ตึอน วี ต็อห, “เฆ อาว ฮู กอย ดี นี. โอว แฮะ ยึร เฆ ต็อห ดี ฮาว นา มืง โดวทาน.”

ปัน ตี อัน โดบ อีกัด อัน, วี กาตูณ เฆ แคง มืง โดวทาน. 18ดอ ยึร เฆ อีกัด อาโยว ดี อัน ดอ ซี กอย กาโต็ง อัน, อาต ตัห เครียะ อัน ดี เฆ, เฆ วี ลาย กามวน, ลาย โพรม ดี ง็อห แวน อัน.

19เฆ ต็อห, “นู, ยอด, ดูอี อี นับ ดี อึณบาว แฮะ ตัห. 20แตห เอ ง็อห อัน, แวน โดว อัน แคง กาเดา อึม คึม เฮณ. เอ วี กาลาง ดี ฆูณ เอ, อึณ แฮะ มึห มาโดว แปร แฮะ ตัห ก็อะ ยัม อัน. ปัน ตี เอ ดี บอ นับ, มาเซ อึณ มูห, ลอง แปะ แฮะ อึณบาว อัน.”

21อารูเบน ตึอน ยี โทม โฆรห เฆ ตี. อัน ซี คยอด วา อัน. อัน ต็อห, “แกวะ แตห เอ ง็อห ยัม อัน. 22แตห เอ บยัว อัน แคง กาเดา อึม คึม เฮณ. แกวะ แตห อัน ยัม.” อารูเบน ต็อห ปาย ตี แตห อัน ปึอน ดี คยอด วา อัน. แฮะ ฮอต, แตห อัน ปึอน ดี วี ตึย วา อัน ฌัม โดง กอย ฆูณ อัน.

23อาโยว ยี ตัห ฌัม โดง กอย เฆ อีกัด อัน, เฆ วี บูด เลห ครึง อัน. 24เฆ บอ ดึห บยัว อัน แคง กาเดา อึม คึม เฮณ.

25เฆ แฮะ ฮอต โบง ปาย ตี เฆ วี โฮม โบม. ดอ โฮม เฆ โบม ตี, เฆ วี ยึร พึง ดูอี อาโมยว อาซามาน, เฆ ตัห มืง ฆีเลอาด อี กอย แคง มืง ตาง มีดีอาน. เฆ ฮาว มืง แอฆึบ. มังปร็อง กาฮาต เฆ แฮะ ดาง ซีนัม บอ นามัน อูห หงูน บอ หร็อง เดา.

26อายูดา ตึอน วี ต็อห ดี อูกัด อูวา อัน, “เซ เอ ดี ง็อห แวน วา เอ, อึณ ตู มึห อาฆยึร อัน มาเซ. 27แตห เอ ย็อง อัน ดัว ดี ดูอี อาซามาน ตี. เอ บอ โบง ปาย ตี เอ ตู โลว โบง มาเซ ดี อัน. อัน มูห วา เอ, ยัง อัน มูห ยัง เอ.” ปัน ตี เฆ อูกัด อูวา อัน, เฆ วี ลาย โพรม ปาย ตี.

28แฮะ ฮอต, ดูอี อาโมยว มีดีอาน, เฆ อี กาจึห กาย็อง โกรว, เฆ วี ตัห ฌัม โดง กอย อีกัด อาโยว ตึอน. ดอ อัน ตี อีกัด อาโยว วี ดึห อาโยว เลห ตัะ กาเดา, ย็อง อัน ดี ดูอี เฆ ตี, แตห เฆ ดึห อัน ฮาว มืง แอฆึบ. เฆ บอ ปึอน รึอน อา ฆึร โบ็ง.

29ปัน ตี อารูเบน วี ตัห ฌัม ดี กาเดา ตึอน, อัน บอ ยึร, อาโยว อาว ฮู กอย นา แคง, อัน วี กลึร กาเซา, กายาต ครึง อัน บอ บยัะ แคะ กลึร อัน. 30อัน วี ฮาว โดง กอย วา อัน. อัน ต็อห, “วา เอ อาว ฮู กอย แคง กาเดา. เหมา โอว ดี วี ปาย ดอ ตี นี?”

31ปัน ตี เฆ วี ง็อห มาแป อู โดว, ดึห ครึง วา เฆ ตึอน, จึบ แคง หนาม มาแป ตี. 32แฮะ ฮอต, เฆ วี ดึห ครึง ตี, ดัว ดี ฆูณ เฆ. เฆ บอ ต็อห, “เย แฮะ กาตูณ ครึง ตี. แตห แม ยอด, โยว อึณ มูห ครึง ฆอน แม?”

33อัน บอ นับ, อึณ มูห ครึง อาโยว ตึอน. อัน วี ต็อห, “แฮะ มูห, อึณ แหนน โดว แปร แฮะ ก็อะ ยัม อัน. อึย, โดว แปร แฮะ ก็อะ ยัม อาโยว โอว.”

34แฮะ ฮอต, อัน วี กลึร กาเซา. อัน บอ กายาต ครึง อัน, วี ชึบ ครึง จาน.#37:34 อาตี มูห ครึง ตู ชีด, ครึง ปี ชึบ ดูอี เซ เฆ กลึร กาเซา แฮะ เหลณ กาเซา, น็อห อัน กลึร ปาย ตี. 35เฆ ฆอน อัน ดอน วี แฮะ ฮาว, ต็อห ดี เหลา น็อห อัน, แตห น็อห อัน วี ดาคึย. อัน ยี ตู โทม อาเซ. อัน ต็อห, “โอว ดี บอ ยัม โกบ มึห โอว น็อห กลึร, น็อห ดีเกน ฆอน โอว ตี.” ปาย ตี น็อห อัน กลึร เซเซ โกบ โหลห อัน เซเซ ฆอน อัน อี จืร อาโยว ตึอน.

36วาย แฮะ ฮอต ฌัม เฆ ดูอี มีดีอาน ตึอน แคง มืง แอฆึบ, เฆ วี ย็อง อาโยว, แตห อัน แบน หมาย ดา ตาง อู วี อี จืร อาโพวทีบ. อาโพวทีบ ตี, อัน มูห อามู อามาด คูนดีคัม อี อึบ มืง แอฆึบ. อัน บอ มูห ดา โบว อี อึบ เฆ ดา ซึก, อี บัร โฮว คูนดีคัม.

Currently Selected:

ดอ โฆว 37: pce

Highlight

Copy