DZANDZA 19

Poli alakise se Efezi

1Ndili ye Apolosi edze Kolenti, Poli asuta dze bikudzi bye ilongo dze Azi, adzanga Efezi. Awawu wangu akwayen ne va batu bemekidze Zezu. 2Poli asunwule bangu ati: «Ndili ye beyi bemekidze Zezu, beyi bebomo Fudzu ye Umpende?» Bangu bakalule nedzi ati: «Besu besande ne yuka bewowe dze Fudzu ye Umpende.» 3Poli asunwule ne bangu ati: «Meteme me beyi beboko ni mowi? Ye bangu bekalule nedzi ati: “Meteme me Zan.”» 4Ye Poli atanda ne bangu ati: «Zan ekaba batu meteme ni ne batu bemekidze ne udzika mamvu mebi, Zan edze ne utanda ne batu ati, mekidzayi wibinga me, wangu ni Zezu!» 5Ndili ye bangu beyuka me Poli etanda, bangu baboko meteme ne kumvu ye Kunwu Zezu. 6Poli asatse bangu meboko, ye Fudzu ye Umpende ye sunda kule bangu, ye bangu bebanda ne uwowe muyi me bangu nde yiba, ye bangu bedze ne utanda mamvu me Nzambi etanda bangu ne utanda batu. 7Bangu bedze mebaka iku ne mole.

8Yumana vavu, Poli atse se ndaku ye umbondu, se besudzi besatu, wangu adzi si ne uwowe ne bangu dze Ukani ve Nzambi. Ne ufumba ati, bedze ne uyuka wangu bemekidze misisili mive mye Zezu. 9Ni batu boko beke dzuvule milima, bangu balewe ne umekidze Zezu se milima mye bangu. Bangu bedze ne usewe me Poli edze ne ulakise busu ve batu besi. Ye Poli eteme kone bangu, yedzi etse bane batu bemekidze Zezu se likoli le mutu we kumvu Tilanuse, masi mesi wangu edze si ne ulakise bangu. 10Poli apika bisiwu byole ne ulakise. Ye besi bedze se ilongo dze Azi, bezwifi ne bidzi kaka bezwifi, bayuka iwowe dze Kunwu.

Bana be mebaka be Skeva

11Nzambi akaba Poli singa ye upika mamvu me likimiyinda. 12Ye bangu bedze ne uboko mikanda ne bifuku bye Poli ebetime ne byangu, ye bisatse kule mibedzu, ye mibedzu mye bangu milunga, ye ne mimbiti mipula. 13Yedze ne va bezwifi, bedze ne utse me kwele mesi ne upanza mimbiti ne utanda ati: «Besu beluma beyi ne upula ne kumvu ye Kunwu Zezu we Poli itandaka, pulayi!» 14Bedze ne upi kavavu ni bana be mebaka untsami, tata we bangu ni Zwifi kunwu we bekabi be bisemi bye Nzambi we kumvu Skeva. 15Ni vusa votu, umbiti nwa kalule ne bangu ati: «Meyiba Zezu, meyiba ne Poli ni beyi ni benza?» 16Ye mutu wedze ne mimbiti elwanise bangu. Wangu atakwe bangu singa, abuuma bangu besi luba amene. Ye bangu bepula se ndaku yedzi untaba, ne mepidzi se menyulu me bangu besi. 17Ndili ye batu be Efezi besi, bezwifi, ne bidzi kaka bezwifi beyuka vavu, besi bayene bongo ye bangu betanda ati: «Kumvu ye Kunwu Zezu yedzi uneni!» 18Batu beyitsi bemekidze Zezu, baya tandaka mamvu mebi me bangu bepika, busu ve batu besi. 19Ne batu boko beyitsi bepasa misunvu, baya ne bisanguvu bye misunvu, bakukise byesi buma yotu, ye betsumbaka byangu busu ve batu besi. Ye bangu betala bisanguvu ne uyene libu le bedolo be bisanguvu byabu, edze ni meku me mikama metanyi me bepitisi. 20Yayu ne singa ye Kunwu Iwowe dze Nzambi dzatsalive se melongo ne singa yesi.

Funwule se Efezi

21Yumana vavu, Poli atelime ne utse Zeluzalemi asuta dze Masedwani, nedze Akayi. Yedzi etanda, ati: «Ti ma mana wawu, matse Lome.» 22Poli aluma Timote ne Elaste bidzandza nedzi kwele ye Masedwani yedzi mene evuka va masi Azi. 23Ni ndili yayu, yedze ne funwule se Efezi, utsina ne peyi ne Kunwu. 24Yedze ne mutu we kumvu Demetliyuse witsula ngasi ne midayi mye bedolo. Wangu edze ne utsula bineni nda ndaku ye viti ye kumvu Altemise. Utsina ne vavu batu bedze ne udzandza nedzi, bedze ne ubomo bedolo beyitsi. 25Vusa votu, mutu mene, abanga bedzandzi bedzi, ne betsulu boko, atanda ne bangu ati: «Bembatsi bami, beyi beyiba ati, bebe bebomo bedolo ne dzandza dzi. 26Ni beyi bayuka, bayene, me Poli me tanda ne batu beyitsi, ati, misunvu mye batu bitsula mi, midzi kaka benzambi amene. Batu beyitsi awa se Efezi ne se bibuma byoko se Azi bamekidze medzi itanda. 27Dza nvu dzi, dzetse biwuse dzandza dze bebe dzi, dzangu ndetse sele si wawu. Betse biwuse kumvu yineni ye viti ve bebe Altemise ne batu betse sanvuse yangu, ndetse vele tanda ati, Altemise ni tsita yineni. Ne batu besi betondo wangu se Azi ne melongo mesi.» 28Ndili ye bangu beyu kavavu, ye bangu bekamve, bawula misima ati: «Uneni ni Altemise viti vineni ve batu be Efezi!» 29Ye batu be ngundu yesi benwuse. Bangu bakwata batu be Masedwani bole, bembatsi be Poli bedze ne usukudze wangu, Gayiyuse ne Alisitalke, bangu badzulaka bangu ndzii se buma ye unkuka yidzi tima ngundu. 30Poli afumba ya busu ve batu, ni bemekidze Zezu basimba wangu. 31Va bekunwu be Azi bedze bembatsi be Poli, baluma batu ne utanda wangu ati, we nde tse se buma ye batu bikukene. 32Se unkuka batu beyitsi banwuze yikiyiki. Aba betanda me bangu, ne aba betanda moko. Boko beyitsi beke yiba utsina ve bangu beya se buma ye unkuka. 33Ye bezwifi belinda mutu we kumvu Alekesande busu. Va batu bedze se unkuka batanda wangu mesuta. Alekesande atumbidze boko ne ufumba wowe ne unkuka. 34Ni ndili ye bangu beyiba ati, mutu mene edze ni Zwifi, besi bawowe dzuku yotu ne singa, mendili ti mole tuu, ati: « Uneni ni Altemise viti vineni ve batu be Efezi!»

35Ni kunwu we ngundu motu alonwise unkuka atanda ne bangu ati: «Batu be Efezi, wangu mutu we nde yiba ati, ngundu ye Efezi ni yi bata ndaku ye tsita Altemise ne viti vedzi ve yinga ikulu, niza?. 36Nde mutu tine motu wituka suna. Uve beyi balonwen ne utsimene nda beyi bipika. 37Ni beyi baya ne batu bawuya, bangu bake pika dzamvu dzibi se ndaku ye umbondu, bake tuka viti ve bebe. 38Ni ti Demetliyuse bane bedzandzi bedzi, ne bisukidze wangu, befumba pita mutu dzamvu. Yedzi ne masi me bipama batu, yedzi ne ne bepami. Bangu betse busu ve bepami. 39Ni beyi ti bedzi ne dzamvu dzoko, tsekayi kwele ye bepami bikukene ne upama mamvu. 40Ni batu be Lome betuka pita bebe ne me mesuta lolo ati, bebe beya ne funwule, bebe nde tuka tandele utsina ve bebe beme kukene.» Wangu amana tanda vavu, yedzi etsala unkuka.

Currently Selected:

DZANDZA 19: WUM

Highlight

Copy