DZANDZA 20

Poli atse Masedwane ne Glese

1Ndili ye batu bevutse se mendaku me bangu, Poli akukise batu bemekidze Zezu besi atanda ne bangu ati, dzayi ne singa, yedzi elakene ne bangu, Poli atse Masedwani. 2Yedzi elinanga ilongo dze Masedwani dzesi, awawu Poli asingise batu bemekidze Zezu, awowe ne bangu uyitsi. Yedzi enwuse Glese. 3Poli adze wawu besundzi besatu. Ndili yedzi ewasa bita se lindzi ne utse Sili, wangu ayuka ati, bezwifi befumba buuma wangu, yedzi evutse dze Masedwani. 4Batu besukidze wangu ndzii Azi, bedze ni Sopoltose, nwana we Piluse, we yinga Bele, Alisitalke, Sekunduse be Tesalonike, Gayiyuse we Delbe, Timote, ne Tisike, Tolofimi, be Azi. 5Bangu besi ba, babandaka, batse buka besu Tolowasi. 6Besu baboko lindzi ibungu dze kumvu Filipi, bemana itsinda dze lipembe lende udzulu. Besu bapika masi metanyi, bakobise boko Tolowasi besu badze wawu masi untsami.

Poli atse yene batu bemekidze Zezu Teloyase

7Vusa ve wika ve tsupulu, ne ikolo, besu bakukene ne udza bila bye Kunwu. Nda wangu itse ne suka, Poli awowe ne unkuka ndzii tima ye pindzi. 8Yedze ne membamvu meyitsi me betakise se liyi ye ndaku yidzi ikulu, ye besu bekukene se kati. 9Nwana ibaka motu we kumvu Etike, edze untsitsi se unkolo nwen liyi ye umbele, awoto bembula, ndili mene yayu, Poli edze si ne uwowe, se bembula ayinga ikulu amene dze liyi ye unsatu ye ndaku ye ndiki ananwen, ye befumba tumbidze wangu, wangu edze amana waa. 10Poli asundaka, adondime kule yedzi, aboko nwana se meboko medzi ati: «Beyi nde yene bayi, nwana adzi mongo!» 11Yedzi, evutse ikulu se liyi ye ndaku, atsita lipembe badza. Poli avele wowe uyitsi ndzii ne vusa ve senwen, yedzi etse. 12Bemana vavu, baya ne nwana ibaka mongo, batu besi bayene umve.

Poli anangwe Teloyase atse Miletuse

13Besu babandaka libusu ne utse bita se lindzi yi bapa besu, ne utse se ngundu ye kumvu Asosi, awawu ye besu biboko Poli, nedzi etanda ati, wangu atse wawu ne mekulu. 14Ndili ye Poli ekobise besu Asosi, besu besi babita se lindzi, ne utse Mitilene. 15Besu bateme wawu, besu bita se lindzi, buye ne suka besu badzanga ndubi ye Kiyo. Vusa ve unyolo, besu badzanga ndubi ye Samose, vusa ve unsatu besu badzanga Mileti. 16Poli, eke tondo sita Efezi, toko bangu bayunwen se Azi, nedzi efumba dzanga Zeluzalemi mesadzi, ti wangu atuka dzanga vusa ve Pentekote.

Poli awowe ne bibutu bye Efezi

17Ndili ye besu bedzanga Mileti, Poli aluma batu Efezi ne utse banga bibutu bye unkuka nwen batu bemekidze Zezu. 18Ndili ye bangu bedzanga konedzi, Poli atanda ne bangu ati: «Beyi beyiba nda yami edze kone beyi, masi mesi ne ubanda vusa ve wika, ve metambi mami medzanga se Azi. 19Ma pika dzandza dze Kunwu nda unyiika ne unkuuna nwesi ne mesanga se misa, se mebamba utsina ne bezwifi befumba yukuvuse me mbonzi. 20Meke sodze beyi mesi meve me beyi bibiki yiba. Matanda beyi mesi, malakise ne beyi iwowe dze Nzambi, busu ve batu besi, ne se mendaku me beyi. 21Ma banga bezwifi ne bedzi kaka bezwifi, ne uyikwene kwele ye Nzambi, ne umekidze Kunwu we bebe Zezu. 22Ni tsanwen, metse ni Zeluzalemi, nda Fudzu ye Umpende ye me luma me, mende ne yiba mibuka me wawu. 23Ni me yiba miti se bingundu byesi, Fudzu ye Umpende ye tanda me ati membaba ne ungenenge bye buka me. 24Ni meyiba miti, libiku lami nde yila se kati.Yami itondo pika ni umana dzandza dzesi. Mefumba pika mesi me Kunwu Zezu etanda me pika, utandaka misisili mive mye itondo dze Nzambi ne batu.

25Metandaka misisili mive mye Ukani ve Nzambi tima ye beyi, ni tsanwen meyiba miti mutu tine motu tima ye beyi ndetse vele yene me. 26Yene utsina vami itanda ne beyi lolo ne singa yesi, miti, tima ye beyi mutu ti anyogo kaka utsina nami. 27Nami, etanda beyi, me Nzambi etondo ati me tanda beyi, meke sodze beyi dza nvu tine dzotu. 28Yayu batayi me nyulu me beyi, batayi ne dzimvu dze batu dze Fudzu ye Umpende me kaba beyi bata. Batayi batu be Nzambi ebomo ne liku le nwana wedzi mene Zezu Klisti. 29Me yiba miti, yami itse yi, mbisa yami batu bidzi nda benyama bekamve betse ya tima ye beyi, betse yukuvuse dzimvu dze batu bonzi. 30Ne tima ye beyi mene, batu boko betse tanda me udzuma, batu bemekidze Zezu boko betse binga bangu. 31Dzayi ne utsengu yivilayi se bisiwu bisatu, ne musa ne pindzi, meke damba ne ukaba beyi besi mendondzi ne mesanga se misa.

32Velolo, yami ituka pika si udzika beyi se meboko me Nzambi, ne Iwowe dzedzi dze itondo. Iwowe dzadzu ni dzidzi ne singa ye unenise beyi se ivukidze. Ne Iwowe dzangu dzotu Nzambi atuka kaba beyi unkobo wedzi ebata ne ukaba batu besi. 33Meke fumba ne uboko bedolo, ne memanyan me ngeyingeyi, mikanda mye mutu tine motu. 34Beyi mene beyiba ati me dzandza ne meboko mami mene, ne ubomo byesi bye besu ne boko nami benyinga. 35Melaka beyi mendili mesi, miti umve beyi badzandza ne singa, ne uyamene bende yila, yivilayi me Kunwu Zezu etanda.» Wangu mene etanda ati: «Itsisa dze mutu we ika nvu, dzatakuse dze mutu we bikaba.»

36Poli amana wowe vavu, avuna mebongo sina, bangu besi babondo. 37Ye batu besi belila, batelime baboko wangu se meboko me bangu bakapite Poli. 38Bangu besi bayene ubi nedzi etanda ne bangu ati: «Beyi ndetse vele yene me.» Ye bangu besukidze wangu ndzii se lindzi.

Currently Selected:

DZANDZA 20: WUM

Highlight

Copy