DZANDZA 18

Poli atse Kolinte

1Bemana vavu, Poli ateme Atene yedzi etse Kolenti. 2Awawu, wangu akwanye ne Zwifi motu we kumvu Akilasi, wi yinga ngundu ye Pont, wangu edze asane yinga Itali bane nwadzi wedzi Pisika. Utsina ne Klodi kani we uneni etanda ati, bezwifi besi beteme Lomi. Ye Poli etse yene bangu. 3Nda bangu bedze dzandza dzotu, dze utsula bibanda ne utunga myanza mye me mbanza, Poli adze pesi ye bangu ne udzandza unsamba. 4Masi mesi me idzundu, Poli edze ne uwowe se ndaku ye umbondu, ne ufumba ati bezwifi ne begleki bemekidze misisili mive mye Zezu.

5Ndili ye Silasi ne Timote bedzanga Masedwani, masi mesi Poli edze si ne utandaka iwowe dze Nzambi, ati, Zezu ni Klisti. 6Ni nda bezwifi belewe medzi etandaka ne utukene wangu, ye Poli efufule iwulu dze mikanda myedzi, atanda ne bangu ati: «Unsu nwen beyi nwen nawen kule myulu mye beyi mene! Mende yiba dzadzu. Makitse wa ni pesi ye batu bidzi kaka bezwife.» 7Ye Poli eteme wawu, atse pesi ye mutu we kumvu Titiyuse Zustusi we dze ne ukuuna Nzambi, ndaku yedzi yedze ni kone ndaku ye umbondu. 8Kilisipusi, kunwu we ndaku ye umbondu, amekidze Zezu ne yali yedzi yesi. Ne batu be Kolinte beyitsi bayuka Poli bamekidze Zezu, ye bekaba bangu meteme.

9Se pindzi yotu, Kunwu alaka nyulu ne Poli atanda nedzi ati: «Wende yene bongo, wowe, we nde lonwen, 10medzi kono we. Mutu tine motu nde tuka nyokile we, nami idzi ne batu beyitsi se ngundu yi.» 11Poli adze siwu yotu ne liyi se Kolinte ne ulakise batu besi iwowe dze Nzambi.

Poli busu ve lipatima

12Ndili ye Galiyon edze lipatima le batu be Lome we Akayi, bezwifi bakuta Poli yimvu, bangu babapa wangu busu ve bepami, 13bangu batanda ati: «Mutu yu atanda ne batu ne ubondo Nzambi, ni bangu nde kuuna bitsila.» 14Ndili ye Poli efumba wowe, Galiyon akalule ne bezwifi ati: «Ke yukayi, wangu abiki buuma mutu ti ya wata vavu wangu apika dzamvu dzibi, me biki yuka beyi bezwifi. 15Ni nda beyi bilwana ne biwowi wowi ne me kumvu ne bitsila bye beyi. Me nde yiba dzadzu, me nde tuka pama dzamvu nda dzadzu.» 16Ye Galiyon epusa bangu se ndaku ye bipama ma nvu. 17Ye bangu besi bekwata Sostene, kunwu we ndaku ye umbondu, ye bangu bebuuma wangu luba busu ve ndaku ye bipama mamvu. Ni Galiyon eke yene ne bayi.

Poli avutse Antyose

18Poli avele yunwen Kolinte. Yumana yedzi elakene ne batu bemekidze Zezu, abita se lindzi ne utse Sili bane Pisika ne Akilasi. Wangu ne utse atsendze mulu se ngundu ye Senkele, nedzi edzika ndaka ne Nzambi. 19Ndili ye bangu bedzanga Efezi, Poli adzika Plisile ne Akilase. Yedzi mene inyindzile se ndaku ye umbondu awowe bane bezwifi. 20Bangu batanda wangu ne umvele dze masi meyitsi kone bangu, ni wangu alewe. 21Ni yedzi edze ne utse, wangu ne bangu ati: «Nzambi ti atondo, metse ye vutse kwele ye beyi.» Yedzi ebita se lindzi atse anagwe Efezi. 22Yedzi edzanga Sezali, atse Zeluzalemi ne unyusile batu bemekidze Zezu, yumana yedzi etse Antyosi. 23Wangu amana pika va masi Antyose, Poli atse Galati ne Filizi ne ukaba bebingi besi singa.

Apolosi alakise se Efezi ne Kolinte

24Zwifi motu we kumvu Apolose, we bedziya se ngundu ye Alekesandili, we dzanga Efezi, mutu mene ayiba wowe, ayiba ne iwowe dze Nzambi uyitsi. 25Bedze bamana lakise wangu peyi ye Kunwu, wangu edze ne utandaka ne ulakise misisili mive mye Zezu myesi telee, ne unlima nwedzi nwesi. Ni meteme medzi iyiba si me Zan. 26Wangu edze ne utandaka iwowe dze Nzambi se ndaku ye umbondu ne ivukidze dzesi. Ndili ye Akilasi ne Pisika beyu kavavu, bangu baboko wangu ne utse nedzi pesi bangu ne uyebise laka wangu peyi ye Kunwu. 27Yumana vavu, Apolisi afumba tse Akayi, batu bemekidze Zezu bamekidze, ye bangu betende bebingi be Zezu bidzi wawu sanguvu ne uyamba wangu umve. Ndili yedzi enwuze wawu, wangu ayamene batu bemekidze Zezu ne singa ye Nzambi. 28Ni busu ve batu besi wangu awowe umve amene ne bezwifi nde yene dzamvu tine dzotu dze bangu bituka suna, wangu atangala se sanguvu ye umpende ne ulaka bangu ati, Zezu ni Klisti.

Currently Selected:

DZANDZA 18: WUM

Highlight

Copy