DZANDZA 17

Poli bane Silasi batse Tesalonike

1Poli ne Silasi basuta dze Amfipoli ne Apoloni, bangu bedzanga se ngundu ye Tesalonike. Bezwifi bedze ne ndaku ye umbondu. 2Poli anyindzile se ndaku ye umbondu, yangu ni ku yedzi. Se masi mesatu me idzundu, Poli awowe ne bangu ne me betende se Sanguvu ye Nzambi, 3ne uyebise tanda. Ne ulaka ati, Mesiya atse yene membaba, yedzi inyuse tima ye batu bewaa. Poli edze ne utanda bangu ati, Zezu ni Mesiya. 4Batu boko tima ye bangu bayuka, bakobise Poli ne Silasi. Ne batu beyitsi bidzi kaka bezwife bedze ne ukuuna Nzambi, ne batu beyitsi bidzi bekani. 5Ni bezwifi boko bedze ne unlima ubi. Ye bangu bekukise bana be mebaka be nde yulu be bangu bekobise se mepeyi, bangu batse ne dzutsi se ngundu. Ye bangu betse se ndaku ye Zason ne ufumba Poli ne Silasi ne ubapa bangu busu ve batu. 6Nda bangu beke kobise bangu, bangu babapa Zason ne va batu bemekidze Zezu pesi ye bepami be ngundu ne uwula misima ati: «Batu ba babiwise ilongo dzesi, ye bangu ba meya wiya! 7Zason ni we me yamba bangu kwele yedzi! Bangu besi nde kuuna bitsila bye kani we uneni we Lome ne bangu bitanda ati, yedzi ne Kani moko we ku nvu Zezu.» 8Ni biwowili byabu, bya kaba batu ne bekunwu be ngundu bayi. 9Zason bane boko nedzi badzika bedolo ne bekunwu be ngundu, yayu belekise bangu.

Poli ne Silasi batse Bele

10Ne pindzi ye batu bemekidze Zezu belekise Poli ne Silasi ne utse Bele. Bangu bekalwe Bele, bangu banyindzile se ndaku ye umbondu ye bezwifi. 11Bewzifi be Bele bayamba bangu umve, kaka nda be Tesalonike. Bangu bamekidze iwowe dze Nzambi ne umve vesi, bangu bedze ne uyikene iwowe dze Nzambi masi mesi ne uyene ati, me bitanda bangu medzi ni umbu. 12Batu beyitsi tima ye bangu bamekidze Zezu, tima ye batu be Gleke, batu beyitsi bidzi bekani ne mebaka meyitsi bamekidze zezu. 13Ni ndili ye bezwifi be Tesalonike beyuka ati, Poli adzi ne utandaka iwowe dze Nzambi Bele, ye bangu beya ne dzutsi ne usisa batu. 14Ye batu bemekidze Zezu beluma Poli ne utse kwele ye nzali ye metsimba, ye Silasi ne Timote bevuka Bele. 15Batu betse sukidze Poli babapa wangu ndzii Atene. Bangu baye vutse Bele, ne unsisili nwen Poli ati, Silasi ne Timote, betse kobise Poli mesadzi.

Poli atandaka iwowe dze Nzambi Atene

16Ndili ye Poli edze ne ubuka bangu Atene, unlima nwedzi nwa biwe, nedzi eyene ati ngundu yayu ya lunda ne misumvu. 17Wangu edze ne uwowe ne bezwifi se ndaku ye umbondu ne batu bidzi kaka bezwifi bikuuna Nzambi, masi mesi, wangu edze ne uwowe ne batu bedzi edze ne ukwanye ne bangu se bibuma bye mikuka. 18Bekani bedze ne ubinga bilakisili bye mutu we ku nvu Epikule ne batu bedze se yimvu ye Stoyisene bawowe ne Poli. Boko bedze ne utanda ati: «Me kunwu we iwowe yu itanda ni meza?» Aba ati Poli atandaka ma nvu kule benzambi be bebe nde yiba. Ne Poli edze ne utanda misisili mive kule Kunwu Zezu. Yedzi evele tanda ati, batu bewaa betse nyuse. 19Ye bangu bebapa wangu pesi ye bepami be ngundu ye Atene bikukene kwele ye Aleyopadze, nedzi ati: «Besu betuka yiba ma nvu me tsawen mowe ilakise batu ma? 20Nowe itanda besu ma nvu me besu besande yuka ne kala. Ne besu bifumba yebise yiba ma nvu mamu.» 21Ni batu be Atene ne benzenze bidzi se Atene, mendili mesi bangu bedzi si ne uwowe ne uyuka ma nvu me tsanwen. 22Ye Poli, etelime tima ye buma ye ku nvu Aleyopadze, atanda ne bangu ati: «Batu be Atene, meyene miti beyi ni batu bi binga benzambi be beyi ne umve vesi. 23Ni ndili yami melanda se ngundu ye beyi, mayene misu nvu mye beyi bibondo, mayene tsiya ye batende kule yangu ati: “Ye nzambi we nde yiba.” We beyi bibondo nde yiba wayu, wangu ni wami meye tanda beyi. 24Kunwu we wanga ilongo ne byesi bye se ilongo, adzi ni Nzambi we ikulu ne sendze, ni wangu nde dze se mendaku me batu bitunga ne meboko me bangu. 25Wangu nde fumba ati, batu beyamene wangu, wangu nde nyinga yila tine yotu, wangu ni wikaba batu besi libiku ne mimbi tine bila byesi. 26Ne mutu motu wangu awanga batu besi, yayu bangu bedze kule sendze yesi. Wangu ne ubanda wanga batu, wangu akabaka batu ne bye bangu siwu, wangu apika mindilu mye melongo me bangu. 27Nzambi epika vavu nati, batu befumba wangu, dzakene yedzi ne udilu bangu betse yene wangu. Umbu amene Nzambi nde ulayi ne pakisi mutu. 28Ni:

“Bebe bebika ni nedzi, belanda ni nedzi, bebe lunga ni nedzi.

bebe bedzi kule sendze ni nedzi.”

Nda va boko beyakwe mi nvu me beyi bitanda ati:

“Ne bebe se ni bana be Nzambi.”

29Nda bebe bidzi bana bedzi bebe nde tuka tsimene ati, Nzambi atala ni viti ve imanyan dze ngeyingeyi, bedolo na imanyan dze batu betsimene ne uwanga. 30Nzambi nde vele waya mamvu me ndili ye kala. Ni tsanwen, Nzambi abanga batu be melongo mesi ne udzika mesumu. 31Nzambi atobo vusa vedzi itse pama batu besi be se sendze umpami nwen telee ne Mutu wedzi etobo. Wangu alaka batu besi Mutu wayu, ndili yedzi enyusile wangu se liku!»

32Ndili ye bangu beyuka Poli awowe ne dze minyusili mye batu bewaa, boko basewe wangu, boko batanda ati: «Besu betse ya yuka nda wiwowe dzamvu dzadzu vusa voko.» 33Ye Poli eteme kone ne bangu. 34Ni va batu boko tima ye bangu bevuka nedzi, bamekidze Zezu. Tima ye bangu yedze ne Denisi mutu we yimvu ye bepami be Aleyopadze, nwatu we kumvu Damalisi, ne boko se.

Currently Selected:

DZANDZA 17: WUM

Highlight

Copy