DZANDZA 16

Timote asukidze Poli bane Silasi

1Yumana vavu, Poli ne Silasi badzanga Delbe ne Listile. Awayu yedze ne mutu motu we mekidze Zezu we kumvu Timote, mama wedzi ni Zwifi we mekidze Zezu, tata ni Gleki. 2Batu bemekidze Zezu bedze Listile ne Ikoniyume bedze ne utanda mamvu meve kule yedzi. 3Poli atondo bapa Timote. Yedzi akwise wangu sakwe utsina ne bezwifi bedze wawu ne batu besi beyiba ati, tata wedzi edze ni Gleki. 4Se bingundu byesi bye Poli ne Silasi bedze ne usuta, bangu batandaka ne batu bemekidze Zezu me betuma be Zezu ne bibutu bekuta Zeluzalemi, ye bangu betanda bangu ne ukuuna bitsila byabu. 5Unkuka nwen Klisti nwa singa se ivukidze, masi mesi ne batu bemekidze Zezu bayebise kune.

Babanga Poli Masedwane

6Fudzu ye Umpende ya sumba Poli ne Silasi ne utanda Iwowe dze Nzambi se Azi, ye bangu besuta dze Filizi ne Galati. 7Ndili ye bangu bedzanga kone Misi, bangu bafumba ne utse Bitini, ni ye Fudzu ye Umpende ye simba bangu. 8Ye bangu besuta dze Misi batse ibungu dze Tolowasi. 9Se pindzi Poli ayene nda ndeme, wangu ayene mutu we Masedwani untele. Mutu wayu abondoko wangu ati: «Yaka Masedwani, weya yamene besu!» 10Poli amana yene ndeme yayu, besu bafumba ne utse Masedwani ne besu beyuka ati, Nzambi ni wi banga besu ne utandaka bangu misisili mive awawu.

Se ngundu ye Filipi, Lidi amekidze Zezu

11Besu banagwe Tolowasi, babita se lindzi ne utse kwele ye Samotelase. Buye ne suka besu batse Neyapolise. 12Ye besu betse Filipi. Ngundu ye wika ye Masedwani, yedze ni ngundu ye batu beyitsi be Lome bedze. Besu badze va masi se ngundu mene. 13Vusa ve idzundu, besu banagwe ngundu ne utse unkolo nwen unsulu besu beyiba nati awawu besu betuka kobise buma ye besu bituka bondo. Besu basunda untsitsi, besu bawowe ne batu bedze bakukene wawu. 14Tima ye baatu babu yedze ne nwatu motu we kumvu Lidi, dzandza dzedzi ni isumbise dze bilembe bye lwi bye me nvunu meneni, wangu ni we ngundu ye Tiyatile, wangu edze ne ukuuna Nzambi. Nda wangu edze ne uyuka besu, Kunwu Nzambi adzuvile unlima nwedzi, ayuka me poli edze ne utanda. 15Wangu amana boko meteme bane yali yedzi yesi, yedzi ebanga besu, atanda ne besu ati: «Beyi ti batsimene ati, me, me mekidze Kunwu, nyidzilayi se ndaku yami.» Wangu asikidze, ati besu bemekidze.

Basomo Poli ne Silasi ungenenge

16Vusa votu ye besu bedze ne utse umbondu, nwatu motu we unyika we dze ne umbiti wi dzi ne yene wi laka wangu mamvu, aya kwanye ne besu. Medzi edze ne upika, mekaba bekunwu bedzi bedolo beyitsi. 17Wangu edze ne ubinga besu ne Poli ne uwowe yanga yanga ati: «Batu ba ni bedzandzi be Nzambi we ikulu amene, bangu belaka beyi peyi yi lungise.» 18Masi mesi, nwatu mene edze si ne utanda dza nvu mene dzotu, ye Poli eka mve, anyikwene, atanda ne umbiti ati: «Ne ku nvu ye Zezu Klisti pula se nyulu ye nwatu yu.» Ye umbiti nwen pula se nyulu yedzi. 19Ndili ye bekunwu be nwatu mene beyene ati, wangu nde tuka vele ye bangu ne bedolo, ye bangu bekwata Poli ne Silasi babapa bangu tima ye mbuka busu ve bepami. 20Bangu bakaba bangu ne bepami be Lome ati: «Batu ba, baya ne funwule se ngundu. Bangu ni bezwifi. 21Bangu belakise biku bye tsanwen, bye besu batu be Lome nde tuka mekidze, nde ne tuka pika byangu.»

22Unkuka nwan kamve ne Poli ne Silasi, ye bepami bepinule bangu mikanda, ye bangu beluma ne unwenseke bangu mimbisa. 23Bemana buma bangu luba basoma bangu ungenenge, batanda ne bebati be ungenenge ne ubata bangu umve, umve. 24Ndili ye unwolo nwen yu kavavu, yedzi esomo bangu se liyi yotu ye ungenenge, basomo bangu mekulu se suku. 25Tima ye pindzi Poli ne Silasi babondo Nzambi ne uyakwe mi nvu me Nzambi ne batu boko bidzi ungenenge beyuka nda bangu biyakwe mi nvu. 26Palikise, sendze ya nyingene ne singa, ye bibaka bye ndaku ye ungenenge bye nyingene. Bikutse byesi bya dzuvunge ne bitseyi bye bekutaka batu besi bedze ungenenge bya nyangwe. 27Ndili ye unbati we ungenenge enyuse se mbula ayene bikutse wususu, wangu eyiba nati batu bedze ungenenge batanga, yedzi eboko pusezunlu ne uwasa buuma nyulu. 28Ni Poli awowe yanga yanga ati: «Dzika yukise nyulu yowe mbonzi, besu besi bangu ba.» 29Ye unbati we ungenenge edzuka iba nvu, anyindzile mesadzi mesadzi se ungenenge ne itsikite dzesi, yedzi evuna mebongo busu ve Poli ne Silasi. 30Yedzi epusa bangu, wangu ne bangu ati: «Bekunwu, yami ituka pika ne ulunga niyi?» 31Poli ne Silasi bakalule nedzi ati: «Mekidze Kunwu Zezu, we bene yali yowe, yayu beyi lunga.» 32Ye bangu betanda wangu iwowe dze Kunwu Zezu ne bedze se ndaku yedzi. 33Ndili mene ne pindzi, unbati we ungenenge abapa bangu ne utse swaka bangu mepidzi. Ye bane yali yedzi beboko meteme. 34Yedzi ebapa Poli ne Silasi se ndaku yedzi, akaba bangu bila. Bangu besi batsisa ne bangu bemekidze Nzambi.

35Buye ne suka, bepami batanda ne unbati we ungenenge ati: «Lekise batu babu.» 36Unbati we ungenenge atse tanda ne Poli ati: «Bepami batanda me, ne ulekise beyi. Pulayi tsekayi ne itavu!» 37Ni Poli atanda ne unwolo ati: «Bangu bemana buuma besu luba busu ve batu besi basomo besu ungenenge, bangu nde pama besu ne besu ni batu be Lome, yayu bangu befumba pusa besu isolo? Undzuma. Tanda bangu mene beya pusa besu!» 38Bewolo batse tanda ne bepami me Poli ewowe, ye bangu beyiba ati, Poli ne Silasi ni batu be Lome, bongo va kwata bangu. 39Bangu baya sunwule bangu kolokolo, ye bangu belekise bangu, ye bangu betanda ne Poli ne Silasi ne uteme se ngundu. 40Poli ne Silasi bapula ungenenge, batse pesi ye Lidi, bangu bemana singise batu besi bemekidze Zezu, bangu batse.

Currently Selected:

DZANDZA 16: WUM

Highlight

Copy