DZANDZA 15

Unkuka nwen Zeluzalemi

1Va mebaka mayinga Zudee ne utse Antyose, ye bangu bedze ne ulakise batu bemekidze Zezu ati: «Ti beyi nde kwa sakwe nda bitsila bye Moyizi bitanda, beyi nde tuka lunga.» 2Poli ne Balnabasi beke mekidze me bangu betanda, ye bangu bewasa lwana utsina ne dza nvu dzadzu. Ye betobo Poli ne Balnabasi ne va batu boko bemekidze Zezu, ati, bangu betse Zeluzalemi ne utse yene betuma be Zezu ne bibutu bye unkuka nwen Klisti, ne uwowe dza nvu dzadzu. 3Yumana unkuka nwen Klisti nwa kaba bangu bila bye bangu benyinga se undzunga nwanwu. Bangu batse, basuta dze Fenise ne Samali, ne utanda nda batu bidzi kaka be bezwife bemekidze Zezu, batu bemekidze Zezu besi batsisa utsina ne vavu. 4Ndili ye bangu bedzanga Zeluzalemi, unkuka nwen Klisti, betuma be Zezu ne bibutu bye unkuka nwen Klisti, bayamba bangu umve. Poli ne Balnabasi batanda bangu mesi me Nzambi epika ne bangu. 5Ni va batu be Falizi bemekidze Zezu, batanda ati: «Batu bemekidze Zezu bidzi kaka bezwife umve bangu bakwa sakwe, bakuuna ne bitsila bye Moyizi.» 6Betuma be Zezu ne bibutu bye unkuka nwen Klisti bakukene ne uyebise dza nvu dzadzu. 7Bangu bawowe uyitsi. Pyeli atelime atanda ne bangu ati: «Bana be tata, beyi beyiba ati, Nzambi edze anyunwen ne utobo me, tima ye beyi, ne utse tanda batu bidzi kaka bezwife misisili mive, yayu bangu beyuka, bemekidze Zezu. 8Ne Nzambi wi yiba milima mye batu besi. Wangu alaka ati, wangu ayamba batu bidzi kaka bezwifi, ne ukaba bangu Fudzu ye Umpende nda bebe. 9Nzambi eke dze ne unbayi tima ye bebe, wangu aswaka milima mye bangu ne bangu bemekidze Zezu. 10Ni tsanwen ye beyi bisongo Nzambi niyi? Ne ukomo bebingi be Zezu, ne ukuuna bitsila bye Moyize bye bekoko be bebe be kala, ne bebe mene beke tuka kuuna, ni neyi?. 11Besu bemekidze ati, Kunwu Zezu alungise besu se itondo dzedzi, nda wangu me lungise bangu se.» 12Ye batu besi bekukene wawu belonwen ne uyuka me Balnabasi ne Poli bedze ne utanda. Bangu batanda mamvu me likimiyinda me Nzambi epika ne bangu, tima ye batu bidzi kaka bezwifi. 13Ndili ye bangu bemana wowe, Zaaki atanda, ati: «Bana be tata, yukayi me! 14Simon atanda bebe, nda Nzambi epika ne utobo tima ye batu bidzi kaka bezwife ati, batu boko tima ye bangu beyikwe bedzi. 15Ne me Batu be Nzambi bewowe medzi ni nda me Simon me tanda. Ni batende ati:

16“Kunwu atanda ati: Vusa votu,

metse ya vutse, metse tunga ndaku ye Davidi ye tsalive,

me tse tumbidze bibaka bye ndaku bye nanwen, yayu me tse vutise yangu untele.

17Yayu batu boko betse fumba Kunwu,

ne batu besi be melongo mesi bami ebanga ne uyikwe bami,

yene me Kunwu etanda,

18Wangu anyunwen ne ulaka ma nvu medzi tse pika.”»

19Zaaki avele tanda ati: «Yene mami itsimene miti, bebe nde vele fumba ma nvu moko ne batu bidzi kaka bezwife bimekidze Zezu. 20Ni umve batende bangu sanguvu ati: “Beyi nde dza benyama be bibuuma ne ukaba meviti ne bangu bidzi ubi, beyi nde vukise ilaka ne we beyi besa nde kwele, beyi nde dza ne benyama be biwolinge tsungu ne bidzi ne unsu.” 21Ni ndili ye kala, batu bedze ne utanda bitsila bye Moyizi se bingundu byesi, ye bitangala byangu se mendaku me mibondu masi me idzundu mesi.»

Baluma bemekidze Zezu bidzi kaka bezwifi sanguvu

22Ye betuma be Zezu, bibutu ne unkuka nwen Klisti nwesi, batobo tima ye bangu Zude, we bibanga Balsabasi ne Silasi ne uluma bangu Antyosi bane Poli ne Balnabasi. Balsabasi ne Silasi ni batu be bikuuna uyitsi. 23Ye bekaba bangu sanguvu yi, ati: «Besu betuma be Zezu ne bibutu, besu benyusile beyi, beyi batu bidzi kaka bezwifi bemekidze Zezu, bidzi Antyosi, Sili ne Silisi. 24Besu bayuka ati, batu bayinga kwele ye besu, baya wowe ne beyi, beyi bayene bayi beyi nde ne yiba nda beyi bipika, ni besu kaka beme luma bangu. 25Utsina ne vavu, ye besu beme kutise ne utobo batu ne uluma beyi bangu. Batu babu beya bane Balnabasi ne Poli be besu bitondo uyitsi. 26Bangu bakaba nyulu ye bangu yesi ne dzandza dze Kunwu we bebe Zezu Klisti. 27Ye besu biluma beyi Zude ne Silasi ne uya tanda beyi bangu mene, me besu beme tende. 28Fudzu ye Umpende ne besu mene bayene ati, besu nde tuka vele kaba beyi bitsila byoko, bye beyi bikuuna si ma. 29Beyi nde dza benyama be bibuuma ne ukaba meviti, beyi nde dza unsu, nde dza benyama be biwolinge metsungu, nde vukise ilaka ne we beyi besande kwele. Beyi ti bakuuna bitsila byabu byesi, umve, beyi bavuka ne sayi.» 30Ndili ye Poli, Balnabasi, Zudee ne Silasi bedzanga Antyosi, ye bangu bekukise batu besi bemekidze Zezu, bakaba bangu sanguvu. 31Batangala sanguvu, ye batu besi bedze se itsisa ne mamvu me betende se sanguvu me singise bangu. 32Zude ne Silasi bedzi ni Batu be Nzambi, bawowe uyitsi ne bemekidze Zezu ne ukaba bangu singa, ye ubata ivukidze. 33Bangu bapika va masi wawu, ye bana be tata belakene ne bangu, ye bangu bevutse kwele ye batu beluma bangu. 34Ye Silasi evuka. 35Ni Poli ne Balnabasi bavuka Antyosi. Bangu ne batu boko ne ulakise ne utandaka iwowe dze Kunwu.

Poli ayakene ne Balnabasi

36Va masi mesuta, Poli atanda ne Balnabasi ati: «Benu bevutse, betse yene batu bemekidze Zezu se bingundu byesi bye bebe betandaka iwowe dze Kunwu ne uyene nda bangu bidzi.» 37Balnabasi efumba bapa ne Zan, we bivele banga Malki. 38Ni Poli eke tondo ati beboko wangu, nedzi edzika bangu Pamfili, wangu eke vele sukidze bangu se dzandza. 39Poli ne Balnabasi balwana, ye bangu bekabene me peyi. Balnabasi aboko Malki bangu babita se lindzi batse ndubi ye Sipele. 40Poli atobo Silasi, ye batu bemekidze Zezu bebondo ne bangu ati Kunwu akaba bangu meve, ye bangu betse. 41Ye bangu belinenge se Sili ne Silisi ne ukaba unkuka nwen Klisti singa.

Currently Selected:

DZANDZA 15: WUM

Highlight

Copy