DZANDZA 14

Poli ne Balnabasi batse Ikoniyumi

1Ndili ye Poli ne Balnabasi bedzanga Ikoniyume, bangu banyindzile se ndaku ye umbondu ye bezwifi, nda bangu bepika pesi ye Antyose. Bawowe ne umve vesi, ye bezwifi ne bedzi kaka bezwifi beyitsi bemekidze Zezu. 2Ni bezwifi belewe mekidze Zezu basisa be nde yiba Zezu, ye bangu bedze ne metsimini mebi kule batu bemekidze Zezu. 3Ni Poli ne Balnabasi banyuwen se Ikoniyumi. Bangu beke yene bongo ne me bangu bedze ne uwowe kule Kunwu. Kunwu ekaba bangu singa ye upika ma nvu me likimiyinda, ne ulaka ati, me bangu bitanda ni umbu. Bangu bedze ne uwowe ne dze polo ye Kunwu. 4Batu be ngundu yayu bakabene tima, aba kwele ye bezwifi ne boko kwele ye betuma be Zezu. 5Bewzifi ne batu bidzi kaka bezwifi ne bekunwu be bangu, bakuta yi nvu ye uyene nda bangu binyokile Poli ne Balnabasi, ne ubuuma bangu ne memanya. 6Ndili ye Poli ne Balnabasi, beyiba dzangu, batse solime se bingundu bye Listile, Delbe ne bingundu bidzi me kwele mesi me Likayone. 7Awayu, bangu bedze ne utandaka misisili mive.

Poli ne Balnabasi batse Listile

8Yedze ne mutu motu se ngundu ye Listile wedze nde tuka landa. Ne bedziya wangu buka. Ulave bedziya wangu, wangu nde landa. 9Vusa votu wangu edze ne uyuka Poli. Poli awaya wangu too, wangu ayene ati, ivukidze dzedzi dzetuka lungise wangu. 10Ye Poli etanda nedzi ne singa ati: «Telime telee kule mekulu mowe!» Mutu mene atelime kutuku, alanda. 11Ndili ye batu beyene me Poli epika, batu bawowe ne dzuyi dze bangu dze Likayone ati: «Benzambi bayikwene batu, basundaka kwele bebe.» 12Bangu baluka Balnabasi ku nvu ye Zeyuse, ne Poli ku nvu ye Elmese ne Poli edze ne uwowe. 13Se ikuvu dze ngundu yedze ne ndaku ye viti ye ku nvu Zeyuse, kunwu we viti vavu aya ne bengombo be besangwe baswise bineni nda medzali me mvandi, wangu efumba nati batu bebuuma bengombo ne ukaba betuma be Zezu bole nda semi. 14Ndili ye Poli bane Balnabasi beyu kavavu, baka mve, banyasule mengoyi batse mesadzi mesadzi tima ye unkuka, bawowe ne singa ati: 15«Ye beyi bipika tuu niyi? Ne besu, bedzi ni batu nda beyi. Besu beya ni ne uye tandaka beyi misisili mive, yayu beyi bedzika meviti mende usika, beyi beyikwene kwele ye Nzambi we mongo we wanga ikulu ne sendze, nzali ye metsimba ne byesi bidzi se kati. 16Ndili ye bekoko be bebe bekala, Nzambi adzika batu besi ne ubinga mepeyi me bangu mene. 17Ni Nzambi nde damba ne upika batu ma nvu meve, wangu aluma beyi nvula ne yedzi ndili, ne bye beyi bikuna bye kwa ipoko, yayu beyi bebomo bila biyitsi, akaba beyi ne itsisa dziyitsi se milima mye beyi.» 18Ni me Poli ne Balnabasi bedze ne utanda meke sumba batu ne ufumba kaba bangu bisemi.

19Bemana vavu, bezwifi bedzanga Antyose ne Ikoniyume bangu baboko unkuka kwele ye bangu, bangu bayisidze Poli memanya, ye bangu bedzulaka wangu badzika wangu ikuvu dze ngundu, bangu beyiba nati Poli awaa. 20Ni ndili ye bebingi be Zezu bedzendze wangu, atelime ne utse se ngundu. Buye ne suka, Poli ne Balnabasi batse Delbe.

Poli ne Balnabasi baye vutse Antyose

21Bangu bemana tandaka misisili mive se ngundu ye Delbe, batu beyitsi bamekidze Zezu. Ye Poli ne Balnabasi bevutse Listile, Ikoniyume ne Antyose. 22Ye Poli bane Balnabasi besingise batu bemekidze Zezu, ne ne ubata ivukidze dze bangu se bingundu byabu. Ye bangu bevele tanda ati: «Uve bebe bayene membaba meyitsi ne unyindzile se ukani ve Nzambi.» 23Se mikuka mye Klisti myesi, bangu batobo batu ne uyikwe bekunwu. Bangu bebondo ne ukuta utsila ve nzala ne bangu, ye bangu bedzika bangu se meboko me Kunwu we bangu bemekidze.

24Poli ne Balnabasi balinenge Pisidi, bangu badzanga se Pamfili. 25Bangu batanda iwowe dze Nzambi se Pelze, ye bangu betse Atalya. 26Awawu bangu babita se lindzi ne utse Antyosi, buma ye bekaba bangu ne Nzambi ne upika dzandza dzedzi, ni tsanwen dzandza mene dzasiya. 27Ndili ye bangu bedzanga se Antyosi, Poli ne Balnabasi bakukise unkuka nwen Zezu batanda me Nzambi epika bangu ne nda Nzambi edzuvile milima mye batu bidzi kaka bezwife ne umekidze Zezu. 28Poli ne Balnabasi bayunwen Antyose bane batu bemekidze Zezu.

Currently Selected:

DZANDZA 14: WUM

Highlight

Copy