DZANDZA 13

Fudzu ye Umpende ya tobo Balnabasi ne Poli

1Se unkuka nwen batu bemekidze Zezu nwen Antyosi, yedze ne Batu be Nzambi ne belakisi be iwowe dze Nzambi, Balnabasi, Simeyon we bibanga Yututu, Lusiyuse we Silene, Manayene, we nene bane Elodi ne Soli. 2Vusa votu, bangu bakukene ne ubondo Kunwu ne ukuta utsili ve nzala, Fudzu ye Umpende ya tanda ne bangu ati: «Dzikayi me Balnabasi ne Soli kwele. Bangu bedzi ne dzandza dzotu dzami iluma bangu pika.» 3Bangu bemana kuta utsili ve nzala ne ubondo, bangu basatse bangu meboko, ye belekise bangu batse.

Balnabasi ne Poli batse Sipele

4Fudzu ye Umpende ya luma Balnabasi ne Soli. Ye bangu betse kwele ye ngundu ye Seleyuse. Awawu bangu babita se lindzi ne utse ndubi ye Sipele. 5Bangu bedzanga Salamine, bangu batandaka iwowe dze Nzambi se mendaku me unbondu me bezwifi. Ne Zan Malki edze bane bangu ne uyamene bangu. 6Ndili ye bangu besave ndubi yesi, badzanga Pafose, kwele ye bangu bekobise unyandu we misumvu, we kumvu Bal Zezu. Wangu ni zwifi we dze ne utanda ati wangu ni Mutu we Nzambi. 7Wangu bane kunwu we ndubi ye kumvu Selziyuse Poluse, kunwu we ndubi wayu edze ni mutu we utsengu, abanga Balnabasi ne Soli ati, bangu betanda wangu iwowe dze Nzambi. 8Ni unyandu we misumvu we kumvu Bal Zezu ne dzuyi dze gleki ni Elimase, wangu nde tondo ati, Balnabasi ne Soli, betandaka kunwu we ndubi iwowe dze Nzambi, toko wangu amekidze Zezu. 9Ye Soli we ku nvu Poli, we Fudzu ye Umpende ya lundise, awaya Elimase too, 10nedzi ati: «We ni dzuma, we ni mutu umbi! We ni nwana we Satan, we nde tondo byesi bive! Dzika pilingise mepeyi me Kunwu midzi telee. 11Yayu, waya boko ye Kunwu ye damele we tsanwen we nde utse yene, se masi ma we nde yene musa.» Palikise va yinda nedzi, nda widzi se pindzi, atse ne upepidze me kwele mesi, ne ufumba batu bituka laka wangu peyi. 12Ndili ye kunwu we ndubi eyene mesuta, amekidze Zezu. Ne iwowe dze Nzambi dze kwa wangu se unlima.

Poli ne Balnabasi batse se ngundu ye Antyose, se Pisidi

13Poli ne boko nedzi bedze Pafose, babita se lindzi ne utse kwele ye ngundu ye Pelze se Pamfili. Zan Malke ayakene ne bangu avutse Zeluzalemi. 14Bangu bedzanga Pelze, ye bangu betse Antyose se Piside. Vusa ve idzundu bangu banyindzile se ndaku ye unbondu basunda untsitsi. 15Bemana tangala se bisanguvu bye bitsila ne bye Batu be Nzambi, bekunwu be ndaku ye unbondu, baluma mutu ne utanda bangu ati: «Bana be tata, ti beyi bedzi ne ma nvu me utanda ne usingise unkuka, wowayi!» 16Ye Poli etelime, atumbidze boko, atanda ati: «Batu be Izayeli, ne bikuuna Nzambi, yukayi! 17Nzambi we bana be Izayeli atobo bekoko be bebe. Wangu akunise bangu, ndili ye bangu bedze benzenze se ilongo dze Ezipiti, yedzi epusa bangu ne singa yedzi. 18Nzambi abungile bangu bisiwu meku menayi se ikanye. 19Yumana vavu, wangu ananguse mekaka untsami se ilongo dze Kanayan, ye Nzambi ekaba bangu ilongo dzadzu ati, dze yikwe dze bangu. 20Mamvu mamu mesi me suta, ni se mikama me bisiwu menayi ne bisiwu meku metanyi.

Yumana vavu, wangu akaba bangu bepami be ma nvu ndzii ne ndili ye Samyeli Mutu we Nzambi. 21Ye bangu basunwule ati, Nzambi akaba bangu kani. Ye Nzambi ekaba Sawuli, nwana we Kisi, we imbisa dze Benzame, akuma kule bangu bisiwu meku menayi. 22Ni Nzambi ananguse Sawuli, akaba bangu Davidi nda kani, atanda ne bangu ati: “Ma yene Davidi nwana we Zese, mutu we unlima nwami wi tondo, wi tse pika mesi mami itondo.” 23Nzambi edzika ndaka ati: “Se imbisa dze Davidi wangu atse luma unlungisi we Izayeli, we kumvu Zezu.” 24Ye Zezu edze asa nde ya, Zan edze ne utandaka misisili mive wangu atanda ne batu besi be Izayeli, ati: “Dzikayi mamvu mebi, bokayi meteme, yayu beyiba ati, beyi badzika mamvu mebi.” 25Ndili ye Zan emana dzandza dzedzi, atanda ne bangu ati: “Beyi nati me ni nza? Mekaka we beyi bibuka, ni yukayi, wangu aya mbisa yami, mende ne tuka nyangule mikodzi mye bekotoko bedzi.”

26Bana be tata, be imbisa dze Ablaami ne beyi batu bikuuna Nzambi, ne bidzi tima ye besu, iwowe dze Nzambi dzi, beluma dzangu ni utsina ne bebe besi. 27Ni batu be Zeluzalemi ne bekunwu be bangu beke yiba wedze Zezu, ni bangu bapama, babuuma wangu, ye bangu bepika me Batu be Nzambi betanda, me bitangala masi mesi me idzundu. 28Dzakene bangu beke yene dza nvu tine dzotu dzibi dze bipama ne ubuuma wangu, ni bangu batanda Pilati ne ubuuma wangu. 29Ndili ye bangu bemana pika ma nvu mesi me betende kule Zezu, basundise tsindzi yedzi kule koko ye beliningise, ye bangu betse somo Zezu se mesongo. 30Ni Nzambi anyusile wangu tima ye batu bewaa. 31Se masi meyitsi Zezu alaka nyulu ne batu bedze ne sukidze wangu Galile ne Zeluzalemi ne batu mene baya ni betotsi be Zezu tima ye batu besi. 32Ne besu, betandaka beyi misisili mive, mye Nzambi edzika ndaka ne betata be besu. 33Nzambi epika ma nvu mamu ni utsina ne besu bana be bangu, yedzi enyusele Zezu, nda betende se pisomi we unyole.

Weni nwana wami,

lolo mayikwe tata wowe.

34Nzambi anyusile wangu toko wangu abolo, yedzi ni medzi etanda ati:

“Metse kaba beyi mami edzika Davidi ndaka,

midzi umpende ne me umbu amene.”

35Bevele tangala buma yoko ati:

“Wendetse dzika umpende nwowe nwa bolo se mesongo.”

36Se libiku le Davidi, wangu edze ni undzandzi we Nzambi, Davidi apika me Nzambi etondo. Davidi awaa, basodze wangu kone betata bedzi, Davidi abolo. 37Ni Zezu we Nzambi enyusele se liku eke bolo. 38Bana be tata, umve beyi bayiba ati, utsina ne Zezu yu, betanda beyi ati, Nzambi aboloko batu ma nvu me bangu mebi. Bitsila bye Moyizi bye ketuka pusa beyi se ma nvu me beyi mebi. 39Ni batu besi bimekidze Zezu baya ni nyengele. 40Yayu dzayi ne utsengu, toko me Batu be Nzambi betanda maya kule ye beyi. Bangu betanda ati:

41“Wayayi, beyi bidzi ne isa nvuse,

dzayi se likimi, tsekayi lawayi.

Metse pika dza nvu dzotu, dzakene ti batanda beyi, beyi ndetse mekidze.”»

42Ndili ye Poli ne Balnabasi bepula se ndaku ye unbondu, batu batanda ne bangu ne umvele ye wowe dza nvu mene dzotu vusa voko ve idzundu. 43Ndili ye batu bekukene bedze ne upula, bezwifi beyitsi ne bidzi kaka bezwifi bemekidze Zezu babinga Poli ne Balnabasi. Betuma be Zezu bole bedze ne uwowe ne bangu, basingise bangu ne utondo Nzambi we itondo.

44Vusa ve idzundu voko, batu besi be ngundu bakukene buma yotu ne uyuka iwowe dze Kunwu. 45Ndili ye bezwifi beyene unkuka, bangu bayene ubi, ye bangu besuna me Poli edze ne utanda, bangu batukene Poli. 46Poli ne Balnabasi batanda ne bangu ne ilila dzesi ati: «Tadzi beme banda tandaka iwowe dze Nzambi ni ne beyi. Ni nda beyi beme lewe dzangu, beyi belaka ati beyi nde tuka bomo libiku le nde siya, yayu besu betse kwele ye batu bidzi kaka bezwifi. 47Ni Kunwu ni we me tanda besu ne upika vavu, yedzi etanda besu ati:

“Me luma we ne udze ukwalala ve batu be nde yiba me,

ne utandaka ndzii se melongo mesi

nda mitse lungise bangu.”»

48Ndili ye batu bidzi kaka bezwifi beyuka vavu, batsisa, ye bangu bekumise Nzambi ne iwowe dzedzi. Ne batu besi be Kunwu etobo ne ubomo libiku le umbu ne umbu, bamekidze Zezu. 49Iwowe dze Nzambi dzatsalive se ilongo dzesi. 50Ni bezwifi basisa baatu beneni bikuuna Nzambi ne bekunwu be ngundu, ye bangu belwanise Poli ne Balnabasi bapanza bangu se ngundu ye bangu. 51Poli ne Balnabasi bafufule iwulu dze metabi me bangu, batse Ikoniyume. 52Ni, bebingi be Zezu bedze ni se itsisa dzineni, ne Fudzu ye Umpende yedze ne bangu.

Currently Selected:

DZANDZA 13: WUM

Highlight

Copy