DZANDZA 12

Babuuma Zaaki, ye besomo Pyeli ungenenge

1Ndili yayu, kani Elodi akwata va batu be unkuka nwen Zezu ne unyokile bangu, 2wangu abuuma Zaaki nwandzi we Zan ne pusezunlu. 3Yedzi eyene ati, bezwifi beyene umve, aluma ne ukwata ne Pyeli. Ndili ye masi me itsinda dze pembe ye nde udzulu. 4Bemana kwata Pyeli, Elodi asomo wangu ungenenge, yedzi eluma mikuka minayi mye bewolo benayi ne ubata Pyeli. Bangu befumba ni upama wangu busu ve batu, ye bimana itsinda dze Paki. 5Ndili ye bebata Pyeli se ungenenge, batu be unkuka nwen Zezu bedze si ne ubondo Nzambi mendili mesi.

Tuma we Nzambi apusa Pyeli ungenenge

6Ne pindzi vusa va sande senwen, Elodi edze ne utanda ati, apama Pyeli busu ve batu besi, Pyeli edze bembula tima ye bewolo bolo. Bangu bekutaka wangu ni ne bitseyi byolo, ne bewolo boko bedze unbele nwen ndaku ye ungenenge ne ubata yangu. 7Palikise tuma we Nzambi aya ne nwunyan kwalala se ungenenge. Tuma we Nzambi anyusile Pyeli adama wangu se membanza, nedzi ati: «Telime mesadzi!» Ne bitseyi bya nyangwe se meboko medzi. 8Tuma we Nzambi nedzi ati: «Swa kwamba wowe kutaka bekotoko bowe.» Pyeli apika medzi etanda wangu. Tuma we Nzambi avele tanda nedzi ati: «Swa ingoyi dzowe yayu we binga me.» 9Pyeli apula se ungenenge abinga tuma we Nzambi. Wangu eke yiba ati, me tuma we Nzambi edze ne upika medze ni umbu. Wangu eyiba nati ndeme. 10Ndili ye bangu bebanda takwe unkuka nwen bewolo bewika, batakwe ne unkuka nwen bewolo nwoko, bangu banwuze busu ve kutse ye bitseyi yitse kwele ye ngundu, kutse ya dzumve yangu mene busu ve bangu. Bangu bapula batsindene se peyi, palikise tuma we Nzambi adzika wangu atse.

11Ndili ye Pyeli epalive, yedzi etanda ati: «Ve tsanwen memene mayiba miti Kunwu ni we meluma tuma wedzi ne uya pusa me se meboko me Elodi ne mamvu mebi me bezwifi besi bebiki pika me.»

12Ndili ye Pyeli eyuka vavu, yedzi etse ndaku ye Maliya, mama we Zan we beluka kumvu ye Malki, kwele ye batu beyitsi bekukene ne ubondo. 13Ndili yedzi edzumidze kutse ye ndaku, undzandzi motu we kumvu Lode atsidene ne uyuka. 14Yedzi eyimba dzuyi dze Pyeli, ne itsisa dzesi, wangu adzumbise ne udzuvule kutse ye ndaku, yedzi etanga ne mbangu ne utse tanda ne boko ati, Pyeli wangu yu, umbele nwen ndaku. 15Boko batanda nedzi ati: «We ni suwa!» Ni wangu edze si ne usikidze ati, umbu. Ye bangu betanda ati: «Yedzi ni Tuma wedzi.» 16Ni Pyeli edze si ne udzumidze kutse ye ndaku. Ye bangu bedzuvule kutse bakima ne bangu beyene Pyeli. 17Pyeli atumbidze boko ne bangu ati, lonwayi, yedzi etanda bangu nda Kunwu epusa wangu se ungenenge. Wangu avele tanda ati: «Tandayi dzangu ne Zaaki ne, ne batu boko bamekidze Zezu.» Yedzi epula ne utse kwele mboko. 18Ndili ye vusa ve senwen, bewolo mitele, mitele, nde yiba kwele ye Pyeli etse. 19Elodi aluma batu ne utse fumba Pyeli, ni bangu beke yene wangu. Ye Elodi esunwule ne bewolo bibata ndaku ye ungenenge, yedzi eluma ne ubuuma bangu. Yumana vavu, ye Elodi eteme Zudee ne utse Sezali, awawu wangu adze va masi.

Liku le kani Elodi

20Elodi edze ne untoko ne batu be Tiili ne be Sidoni. Ye bangu bekutise ne utse yene wangu. Bangu bawuta Balatusi mutu wilongi we Elodi ne uyamene bangu. Ye bangu betse yene Elodi ne utanda wangu ati, bangu betondo nati. Bangu bedze ne itavu ne Elodi ne bila bye bangu biyinga ilongo dze kani Elodi. 21Vusa mene ve unze, Elodi, aswa mikanda myedzi mye ukani, asunda untsitsi kule isuwa dzedzi, yedzi ewowo ne unkuka. 22Batu bedze ne wula misima ati: «Adzi dzuyi ni nda dze nzambi, kaka dze mutu!» 23Ndili mene mbotu, Tuma we Kunwu adama Elodi, nedzi eke kumise Nzambi. Ye misongo mye dza wangu, yedzi ewaa.

24Ndili yayu, iwowe dze Kunwu dzatse se ilongo dzesi ne bemekidze Zezu bayebise kune. 25Soli bane Balnabasi, bemana pika dzandza dze bangu Zeluzalemi. Ndili ye bangu bevutse, babapa Zan we kumvu Malki.

Currently Selected:

DZANDZA 12: WUM

Highlight

Copy