DZANDZA 11

Unkuka nwen Zeluzalemi

1Betuma be Zezu ne batu be bemekidze Zezu bedze Zudee beyuka ati, ne batu bidzi kaka bezwifi bamekidze iwowe dze Nzambi. 2Ndili ye Pyeli edzanga se Zeluzalemi, bemekidze Zezu bidzi bezwifi baka mve nedzi, 3ati: «Wa nyindzile se ndaku ye batu bidzi kaka bezwifi ne besa nde kwa sakwe, wadza ne bila bene bangu!» 4Ye Pyeli etanda bangu nda dza nvu dze banda ndzii ne dzangu dzesele ati: 5«Medze ni se ngundu ye Zope, yami edze ne ubondo, mayene yila ye Nzambi elaka me. Yila yedze nda lembe yineni ye bakuta se me kwele menayi, yedze ne uyinga ikulu ne uya ndzii kwele yami. 6Mawaya lembe ngono ngono, yami eyene benyama bidzi ne mekulu menayi, benyama bilanda ne moyi ne benyodzi besi. 7Yami eyuka dzuyi dze tanda nami ati: “Pyeli, telime, we buuma benyama besi ba wedza!” 8Ni makalule miti: “Nyen, Kunwu, ni yila tine yotu ye tsila ne ye limbindu ya sande nyindzile se undzu nvu nwami.” 9Dzuyi dzavele yinga ikulu, ati: “Bye Nzambi etanda ati, byedzi umve ne udza, we nde tanda witi byedzi ubi ne udza.” 10Yapi kavavu bidzuku bisatu ye byesi bye vutse ikulu. 11Ndili mene mbotu, mebaka mesatu, mayinga Sezali maya ndaku yami idze. 12Fudzu ye Umpende ni ye me tanda me ne utse besu ne bangu, ati, mende yene bongo. Yami etse besu ne bana be tata untuba ba besukidze me Sezali, ye besu benyindzile se ndaku ye Koneye. 13Mutu mene atanda besu nda wangu eyene tuma we Nzambi se ndaku yedzi, atanda wangu ati: “Luma batu Zope ne utse boko Simon, we bibanga Pyeli, 14wangu atandele we ma nvu mitse lungise, we bene yali yowe yesi.” 15Yami ebanda ne uwowe, Fudzu ye Umpende yaya kule ye bangu, nda yangu ye banda ya kule ye besu yaka ye wika. 16Yami eyivile me Kunwu etanda ati: “Zan akaba batu meteme me mangu, ni beyi, beyi betse bomo meteme me Fudzu ye Umpende.” 17Mayene miti, bye Nzambi ekaba bebe ndili ye bebe bemekidze Kunwu Zezu Klisti, si byangu byotu byedzi me kaba bangu, ni me niza ne usimba ne upika me Nzambi itondo.» 18Ndili ye bangu beyuka vavu, bangu balonwen, ye bangu bekumise Nzambi ati: «Ee umbu amene ne batu bidzi kaka bezwifi, bangu betuka dzika mamvu mebi, balunga. Nzambi ni wi kaba bangu langu.»

Unkuka nwen Antyose

19Bemana buuma Etyeni, ye belaka batu bemekidze Zezu membaba, ye bangu betsalive batse me kwele mesi, boko batse ndzii Fenise ne boko se ndubi ye Sipele ne boko batse Antyosi, ni bangu betandaka iwowe dze Nzambi si ne bezwifi. 20Ni boko tima ye bangu bedze be ngundu ye Sipele ne Silene, batse Antyosi ne utandaka bidzi kaka bezwife misisili mive mye Kunwu Zezu. 21Singa ye Kunwu yedze ne bangu, ye batu beyitsi bemekidze Zezu, ye bangu bebinga Kunwu. 22Batu be unkuka bidzi Zeluzalemi beyuka mesuta, ye bangu beluma Balnabasi Antyosi. 23Ndili yedzi ekalwe, wangu ayene nda Nzambi ekaba batu bemekidze Zezu meve. Wangu atsisa, yedzi esingise bangu besi ne udze ne Kunwu Zezu ne unlima nwotu. 24Balnabasi edze ni mutu we umve, we Fudzu ye Umpende ye lundise, edze ne ne ivukidze dzineni. Ne batu beyitsi bamekidze Kunwu. 25Yumana vavu, Balnabasi atse ngundu ye Talse ne ufumba Soli. 26Yedzi ekobise Soli, abapa wangu Antyosi. Bangu badze se unkuka nwen Zezu siwu ye unbitsi ne ulakise batu beyitsi ivukidze. Yedze ni se Antyosi ye batu bebanda ne ubanga bebingi be Zezu batu be Klisti. 27Ndili yayu, Batu be Nzambi bayinga Zeluzalemi ne utse Antyosi. 28Motu tima ye bangu we kumvu Agabuse, Fudzu ye Umpende ya tanda wangu ne uwowe ati, yetse dze ne pinga yineni se sendze yesi. Pinga yayu ye ya ni ndili ye Klodi edze kani we uneni we Lomi. 29Ye bebingi be Zezu bekutise ati, mutu ne mutu akaba byedzi idzi ne byangu, yayu beluma batu bemekidze Zezu bidzi Zudee. 30Ye bangu bepi kavavu. Bangu bakaba bye bangu bebomo ne Soli Balnabasi bane Soli ne utse kaba byangu ne bibutu bye unkuka nwen Zezu widzi Zudee.

Currently Selected:

DZANDZA 11: WUM

Highlight

Copy