Luc 23

Zezi o mua Pilaate

1Baari aso asarihi, ayeni na Zezi mua Pilaate. 2O ŋa bo aya ma banaha nde ndi: «Bisi lemi mono mvuuru yu, nde ataasa baari a bisi, nde aliha baari owura lepo le Sezaare. Nde anku aduha ndi nde Krisi, nde se nkani.» 3Pilaate olehi nde oduhu ndi: «We nkani Azife?» Zezi okaali nde ndi: «We anku aduha.» 4Pilaate oduhi na ankumu ma asi ma avuoŋi bla lemvuuru ndi: «Me i mono obila ma buma mvuuru yu o tso ni.» 5Ŋa bo aselihi odzisiha ndi: «Nde atsiese baari mo mbari e nde ayisiha, nde oma baana o Ngalili, omi yira o Zide eso, omana omi to tii ngo kuuni.»

Zezi o mua Erode

6Ntini e Pilaate ayuhi vua nde opisi ndi: «Balaha dzi osi Ngalili?» 7Nde oyaa ndi Zezi awihi na onguundu Erode akihi nkumu, nde ovuuri Zezi mpili Erode, obila nde se akihi o Zerizaleme ma etsuhu bia. 8Erode omoni ove bo mini ntini e nde amoni Zezi. Obila nde aki oma yuha ma wobo o nde. Erode se aki na ndzala omono Zezi osa omaa o miisi a nde. 9Nde olehi nde eduhu ekuna kuna, ŋa Zezi aka kaala dza se lemo ni. 10Ankumu ma asi ma avuoŋi, bla ayisihi ma angri selehe obanaha Zezi. 11Erode bla aworo a nde, ma sebe nde, bo ayahi nde o mvuuru otsa. Bo alaasi nde mfa e mvunu emana bo avuuri nde mpili e Pilaate. 12Erode bla Pilaate aki abuha ma ombangu na kala, ŋa o tsuhu dzia bo akirihi andihi.

Opami a Zezi bla leku

13Pilaate okusihi ankumu ma asi ma avuoŋi bla ankani na baari. 14Nde na bo ndi: «Be lema aya na me mvuuru yu mbri nde atosoho baari, ŋa me emi lehe nde oduhu o mua be, ŋa me eka mono dza e mbi e be lebanaha nde o yo ni. 15Erode se aka mono dza e mbi ni, kia obila o nde atumi nde mpili e bisi. Balaha dzi eka asa dza e mbi eli ove abumi nde o yo ni. 16Me etuma abeere nde ekatsi, omana me nyasaha nde.» 17Atsinda a Paake aso, eki ove Pilaate otusihi mvuuru omo ma ongenehe. 18Bo aso awuli ankima ndi: «Buma balaha dzi! Nyila bisi Barabase!» 19Barabase aki alehi ongeneŋe, nde atsiesihi baari ntsa onguundu, nde se abumi mvuuru. 20Pilaate aki na ndzala onyasaha Zezi, ŋa nde ovurihi oyahi mbari. 21Ŋa bo awuli ankima ndi: «Komo nde ma lembandzi! Komo nde ma lembandzi!» 22Mo dzue le otari Pilaate oyahi mbari ndi: «Nde dza e mbi ama sa ma? Me eka mono dza ma buma nde o yo ni. Ŋa me etuma abeere nde ekatsi omana me nyasaha nde.» 23Ŋa bo aselihi odzisiha na ankima a nkala ndi: «Komo nde ma lembandzi!» Ŋa ankima a bo avili. 24O ŋa Pilaate oyalihi ndi bo asa ma osuumbu a bo ma dia. 25Nde onyasihi balaha e bo ma pisihi, eki ma ongeneŋe. Obila nde atsiesihi baari na nde se abumi mvuuru. Nde ompi bo Zezi mo bu ndi, bo asa nde ma osuumbu a bo ma dia.

Leku le Zezi o yula lembandzi

26Ntini e bo ma birihi nde, bo akuari balaha mo ewa na anguunu, nkuumi e nde Simon osi Sirene. Aworo akuari nde, ma obira lembandzi ngula Zezi. 27Lemvuuru le kuna leki leluono nde, eki se na akaasi, ma lila. Ma amono obi obila o nde. 28Ŋa Zezi okalihi mpili e bo na bo ndi: «Akaasi a Zerizaleme, leka liliha o me ni! Lelila o be anku na mo baana a be! 29Obila, antini ma aya, ma dze oduha ndi: “Osuere oka na akaasi ma onguma bla akaasi ma akini okula ni, na ma kini ompa baana abiele ni!” 30O ŋa baari ma adze oduha na ekuri ndi: “Leva o yula bisi!” Na ŋa enguma ndi: “Ledzisiha bisi!” 31Obila yuhu ma asa bu ma oti obisi, ŋa ma adze osa buni ma oti ama kaa?» 32Ayi na abalaha akimavuele ma abi se, ma obuma bo bla Zezi. 33Bo ato obiri ma tsuoloho o «Kraane#23.33 Kraane kuumi okuri ma komi Zezi ma lembandzi. O dzuuhi la Azife: Golgota. Ŋa ma lembaama okoko otsui. Obila, okuri kia oki oma wwana okoko otsui.», aworo akomi Zezi o kuri bla abalaha vuele ma abi, yu o kuoho olumi, yu mo kuoho omboho. 34Ŋa Zezi oduhi ndi: «E Taara boloho bo obila bo i yaa maami a bo ma siaha ni.» Aworo akabihi amfa a nde o mpanihi e bo. Bo aya ma taama ma osuolo mo. 35Baari aki ŋa ma okeese. Ankumu ma Azife aki ma sebe nde ndi: «Nde oma vusaha baari akema, ŋa nde se ovusaha nyuru e nde anku, yuhu nde Krisi a Ndziami ama suolo!» 36Aworo se asebihi nde, ma tsiina mpili e nde, na lempa le nde mali a ŋayi. 37Ma duha ndi: «Yuhu we nkani Azife vusuha nyuru e we, we anku!» 38Ŋa leyulu le otsui a nde aki ama teende ndi: «Yu nkani Azife.» 39Balaha mo o ntsa embeŋe e dziele ma komi bla Zezi, aki aduha na nde ndi: «We ka Krisi ni? Vusaha nyuru e we we anku, we se ovusaha bisi!» 40Ŋa buha omo obie na nde ndi: «We vuoho o Ndziami kali, ni we ma aliisa bla nde ŋa se osuumbu omo? 41Mo saawe yemiŋi, saawe lemono ampasi, obila saawe maami abi. Ŋa nde aka sa dza e mbi ni.» 42Emana nde oluusi ndi: «Zezi yibaha me o ntini e we adze oya ma oka nkani.» 43Zezi okaali na nde ndi: «Me eduha we sisiele, lobi we aka bla me o biri e mve.»

Leku le Zezi

44Tari leki leya o mua ndzanga, mui odimi, lempiibi leyi ma osi oso, atari ayiri. 45Mui odima, mfa eki ntsa ndzo e Ndziami ebaahi o mua kari. 46Zezi owuli nkima enini oduhi ndi: «E Taara me evuura odidima o me ntsa dziala e we.» Nde omana owobo vua, nde okui. 47Nkumu aworo ma ekuumi kuumi ama osi o Rome, omoni maami ma yirihi, okuusi lekuma le Ndziami oya aduha ndi: «Dzaa dzaa balaha dzi eki opeende!» 48Lemvuuru leso leki leyi, ma omono maami aluari maa, lemoni mo. O ŋa bo avirihi na okuruha endundu#23.48 Mpili a Azife, lekuruha le ondundu, ma olaha ndi baari ali o ndoho, si kali bo ami mono obi. ma obi o bo ma amoni. 49Andihi a Zezi aso bla akaasi ma baani oluono nde, nkara Ngalili, ma keese osuumbu e maami ma ayirihi.

Alehi Zezi o muuma

50Eki na balaha mo ma tsuolihi o Zuzefe nde aki ntsa ankani ma Azife. Balaha dzia ekihi tele nde se aki balaha e mve. 51Nde aka yalaha opami bla maami a bo ma asihi ni. Nde aki osi Arimate onguundu Azife. Nde aki adila Onkani o Ndziami. 52Nde oyeni mpili e Pilaate ma opisa obiimi o Zezi. 53Emana nde otsiesi obiimi o yula lembandzi, okuri ntsa mfa e mvunu. Otsuusi ntsa muuma ma tsimi o ntsa akele#23.53 Mpili a Azife amuuma akihi yula ekuri ma akele, atubi bulu o ntsa mo., muuma dzua aki akini odziiha mvuuru okima ni. 54Eki eya tuha na tsuhu ma awuumaha. Tsuhu dzia eki eya etsiina. 55Akaasi ma awi bla Zezi nkara Ngalili aluoni Zuzefe, bo akeesi ntsa muuma, na osuumbu ma tsuusi obiimi o nde. 56Emana bo ayeni andzo, bo ayeesi maari bla eyombo ma obiimi. Bo anyiimi tsuhu ma awuumaha mva ma ama teende ntsa angri.

Currently Selected:

Luc 23: MDT

Highlight

Copy