Luc 22

Ankumu ma akura tsuumu oma Zezi

1Tsinda e Paake eki eya etsiina. 2Ankumu ma asi ma avuoŋi bla ayisihi ma angri, asahi osuumbu ma obuma Zezi, ŋa bo aki na vuoho o baari.

Zida atosoho Zezi

3Ŋa Dzabri onyunihi o Zida ma atsuoloho mo Sikaryote, nde aki ntuma omo, ntsa antuma a kuumi na vuele. 4Ŋa Zida oyeni na ayeese bla ankumu ma asi ma avuoŋi, na ankumu ma akielehe ndzo e Ndziami, osuumbu a nde atosoho Zezi. 5Bo amoni ove bo mini, bo alehi nde ndahi ndi bo ma mpa nde adoro. 6Nde oyalihi, emana nde osahi osuumbu ma otosoho Zezi ma adzisihi. Lemvuuru i yaa ni.

Zezi adza Paake bla aluoni a nde

7Tsuhu e tsinda e mpeembe eli leviire kali eto, aya ma buma baana ma endoombo o Paake. 8Zezi otumi Piere bla Zan ndi: «Ledziehe na alaama saabe biila e Paake.» 9Bo apisi nde ndi: «We asaha mbri bisi lelaama dzo kuni?» 10Nde okaali na bo ndi: «Ntini e be lenyuniha ntsa onguundu, be levunuha na balaha mo, ama bira mbasa andza o yula otsui. Be leluoni nde tii ngo ntsa ndzo e nde anyuniŋa o yo. 11Be leduhi na onga ndzo mbri: “Nkumu apisa we ndi biri e nde adza biila e Paake bla aluoni a nde eli kuni?” 12Nde adze olaha be otini o ndzo o yulu#22.12 Biri ema odza biila. ama yeese. Dzia biri e be ledze olaama.» 13Bo ayeni, amoni maami ma osuumbu a Zezi aduhi bo. Bo alaami biila e Paake.

Biila e Nkumu

14Ntini odza eto Zezi okumi o tanda bla antuma a nde. 15Nde na bo ndi: «Me edii kuna odza biila e Paake bla be, omana me ema mono ambaba! 16Obila me eduha be, me eka adze oma dza yo bla be ni, tii ngo e Ndziami ayeese Paake ntsa Onkani o Nde.» 17Nde oyahi kobo e mali, ompi Ndziami leve, emana nde ndi: «Leyaha be lekaba o mpanihi e be. 18Ŋa me eduha be, ma obaana o tsuhu e lobi me eka ma nyua mali ba ni tii ngo Onkani o Ndziami ma oya.»

19Emana nde oyahi lempeembe, omana ompa Ndziami leve, nde otsebi lo, ompi bo ndi: «Ji nyuru e me ma ama mpa o be. Lesa vua ma oyibiha me.» 20Bo amana odza, nde se oyahi kobo e mali, na bo ndi: «Kobo e mali dzi ondihi ma onyarihi, oma tohi le me, ledze okele obila o be. 21Ŋa lemono, mvuuru adze otosoho me oli bla me o tanda ŋa! 22Ŋa Muana mvuuru adze okua ma osuumbu a Ndziami ayeesi. Ŋa ndoho eka na mvuuru atosoho nde!» 23O ŋa aluoni aya ma pisa o mpanihi e bo ndi: «Mvuuru abuuna osa dzaa mva dzia na?»

Aveli okiimi o mpanihi aluoni na?

24Aluoni aya ma wobo o mpanihi e bo. Bo ma pisa abuha ndi: «Mvuuru aveli abuha okiimi o mpanihi e saabe ŋa na?» 25Zezi okaali na bo ndi: «Ankani ma esi, na onkumu o yula baari. Bo ndzala ndi atsuoloho bo o “baari ma siaha leve”. 26Ŋa be lekaa siaha mva bo ni. Mvuuru avili okiimi o mpanihi e be, ove nde oki mva muana onkere. Mvuuru ali nkumu, ove nde oki mva odzandzi. 27Mo be avili okiimi na? Mvuuru ali o tanda si mvuuru alehe biila o tanda? Mbaa mvuuru ali o tanda? Ŋa me eli o mpanihi e be mva mvuuru aleehe biila mo tanda! 28Be leki bla me ma antini a me ma ampasi. 29Ŋa ma osuumbu a Taara a me ama mpa me Onkani, me se empa be Onkani vua. 30Be ledze odza, be lenyua o tanda ntsa Onkani o me. Be ledze oka ma antsi o yula ambara, ma opama ankaka a kuumi na vuele a Isayele.»

Zezi awobo mo Piere adze obisa nde

31Nkumu ndi: «E Simon, Simon! Sa ayiba: Sata asaha be, ma osuesehe be aso, mva ma nyengese mburu. 32Ŋa me ema vuono o we obu mbri we i ma yele oyalihi ni. Ŋa ntini e we aya na vuruha, we ompi baana ma anguhu a we mpari.» 33Piere na nde ndi: «E Nkumu, me ebuuna odze ongeneŋe bla we, me se ebuuna okua bla we.» 34Zezi okaali na nde ndi: «E Piere me eduha we, lobi ntsusu a ntsomi a ka sa kuoho ni, we akemehe me ekru etari.»

Adoro bla mpie na baha ampele muele

35Emana Zezi na bo ndi: «Ntini e me etumi be adoro kali, mpie kali na akoroho kali, be leki leyeli kiila?» Bo akaali ndi: «Kali.» 36O ŋa nde na bo ndi: «Ŋa ma obaana o tsuhu e lobi, mvuuru ali na adoro oyahi, ali na mpie se oyahi. Mvuuru ali baha ampele muele kali, otehi mfa e nde anku ma osuuma baha ampele muele. 37Obila me eduha be, ama teende o me ntsa Osaangumu ndi: “Ama tala nde ntsa embeŋe.” Ma oma, maami ma ama teende o me, aya oto.» 38Bo na nde ndi: «Nkumu mono abaha ampele muele.» Nde okaali na bo ndi: «Abaha muele ma ampele muele, ami to.»

Zezi avuono ma okuri eti ma Eliive

39Zezi otsuuhi ma otiiri a nde, oyeni okuri eti ma Eliive ŋa aluoni a nde se aluoni nde. 40Ntini e nde ato obiri dzia, nde na bo ndi: «Levuono obu mbri be i ma va o ntsa etsinihi ma ebi ni.» 41Emana nde olabihi na bo ntseeri, owuri avuo oya avuono ndi: 42«E Taara yuhu we adia, we osa mbri kobo e mpasi dzi elabaha na me, ŋa ka ma edziiŋi e me ni, ma edziiŋi e we.» 43O ŋa obaandzi a Ndziami owi yulu, oyi na ampa nde mpari. 44Zezi omoni onguo, oyiha avuono na mpari eso, ndzanihi e nde eyiha etsolo o ntsie mva ataŋi a tohi. 45Nde omana ovuono, otemihi, oyi na vuruha mpili aluoni, omoni bo ali antolo. Ama kolo ma obi o bo ma amonihi. 46Nde na bo ndi: «Be letsa antolo bu ma oma? Letemehe be levuono, be i ma va ntsa etsimihi ma ebi ni.»

Ma akuara Zezi

47Zezi aki okini awobo, lemvuuru lewasihi. Ntuma a nde omo ntsa antuma a kuumi na vuele ma tsuolihi o Zida, aki levusu le bo. Nde otsiini tuha na Zezi ma ompa nde amfemfe. 48Ŋa Zezi na nde ndi: «Zida we atosoho Muana mvuuru ŋa ma amfemfe?» 49Baari ma kihi bla Zezi amono vua, bo na nde ndi: «E Nkumu, bisi lebeere bo ma ampele ma abaha a bisi?» 50Ŋa omo o mpanihi e bo, obeeri odzandzi osi avuoŋi onini, emana otsebi nde tsui le kuoho olumi. 51Ŋa Zezi ndi: «Lenyila vua!» Nde otiili tsui le balaha dzia, osalihi nde. 52Emana Zezi oduhi na ankumu ma asi ma avuoŋi bla ankumu ma akielehe ndzo e Ndziami, na akuuru ma ayi na kuara nde ndi: «Be leyaha me mva ombeŋe, eli be lema aya bla abaha na ankumuha? 53Me eki bla be etsuhu eso o ntsa ndzo e Ndziami, be leka saha okuara me ni. Ŋa dzi eya ntini e be bla mpari lempiibi.»

Piere atuna Zezi

54Ŋa bo akuari Zezi, ayeni ŋa nde ntsa ndzo osi avuoŋi onini. Piere aki aluono nde o lala. 55O mua lebuhu, aki ama vua mbaa, baari ali ma antsi ama dzenehe yo. Piere oya o ntsi bla bo. 56Odzandzi omo okaasi omoni Piere o ntsi tuha ŋa mbaa, okeesi nde yemiŋi ndi: «Balaha dzi se eki bla Zezi!» 57Ŋa Piere otuni, na nde ndi: «Kali me i yaa nde ni.» 58Antini ayira, mvuuru okima omoni nde, oduhi ndi: «We se a bla bo!» Piere okaali na balaha dzia ndi: «Kali, me ka a bla bo ni.» 59Tari mo eyira, okima ovurihi odzisihi ndi: «Sisiele yu se aki bla nde, obila nde se osi Ngalili.» 60Ŋa Piere okaali ndi: «Me i yaa a we ŋa saha oduha ni.» O ŋiŋa nde aki okini awobo, ntsusu okuohi. 61Nkumu okalihi, okeesi Piere, o ŋa Piere oyibihi mbari e Nkumu aduhi na nde ndi: «Ntsusu antsomi aka sa kuoho ni, we atuna me amihi atari.» 62Piere otsuuhi, oyiha alila kuna.

Lebeere na letuha le Zezi

63Abalaha ma kielihi Zezi aki ma lelehe nde, bo se ma beere nde. 64Bo adibihi nde olia ma amfa, emana aya ma pisa nde ndi: «Owobi a mbari e Ndziami, Mvuuru abeeri we na? Ma yiimba!» 65Ŋa bo aselihi otuha nde.

Zezi o mua ankani ma anini

66Tsuhu etsa, akuuru ma okuha bla asi ma avuoŋi ma anini, na ayisihi ma angri, akusihi abuha. Bo ayeni na Zezi mpili ankani ma anini, ma opama nde. 67Bo apisi nde ndi: «Yuhu we Krisi duha bisi.» Nde okaali bo ndi: «Me oduha be, be lekaa yalaha me ni. 68Ŋa me se olehe be oduhi, be leka kaala me ni. 69Ŋa ma obaana o tsuhu e lobi, Muana mvuuru aka o ntsi mo kuoho olumi o Ndziami a mpari.» 70Bo aso apisi nde ndi: «We ŋa ndzaa Muana Ndziami?» Nde okaali bo ndi: «Be anku leduha mbri me Muana a Ndziami.» 71O ŋa bo aduhi ndi: «Bisi kaama mo mvuuru asiisa enyua kali! Bisi anku lemi yuha mbari e ma onyua a nde!»

Currently Selected:

Luc 22: MDT

Highlight

Copy