Luc 24

Enyusihi e Zezi

1Tsuhu e ntsomi ntsa etsuhu ntsaami e dzandza#24.1 Tsuhu dzia mva tsuhu e pulu na saabe. E bo ma baana dzandza. nkara entsiere, akaasi ayeni antsuo. Bo abiri maari bla eyombo e bo ma ayeesi. 2Bo amoni ndi kele ledibihi onyua a muuma, ami buuna o paani. 3Bo anyuniŋi ŋa bo aka basaha obiimi o Zezi a Nkumu ni. 4Bo aki i yaa dzaa oduha ni. Abalaha vuele ayi na e bo ama laasa amfa ma kieme. 5Akaasi amoni vuoho, apiisi miisi o ntsie. Abalaha ba na bo ndi: «Be lesaha mvuuru ali muo o mpanihi akui ma oma? 6Nde kuuni onyaŋa, nde oma nyusiha. Leyibaha maami a nde aduhi be o ntini e nde aki okini o Ngalili. 7Nde aduhi ndi: “Ove ampi Muana mvuuru o dziala ma anga ambiini akomi nde ma lembandzi, ŋa tsuhu otari nde onyusihi ntsa leku.”» 8Ŋa akaasi ayibihi mbari e Zezi. 9Bo atsiehi antsuo ayeni na aduha na antuma akuumi na omo bla aluoni maamo aso. 10Eki na Mariya a Madala, na Dzaane bla Mariya a nguhu a Zaake. Ŋa eki na akaasi akimama ayeni na aduha maami maa na antuma. 11Ŋa antuma atsimihi ndi bo ma aduha maami ma otsa. Bo se aka yalaha maami a bo ma aduhi ni. 12Ŋa Piere otemihi oyeni antsuo o ntsiini. Nde okemiha bu, omoni amfa atu ma aki ma ama poroho obiimi. Emana nde ovurihi ndzo ntsa lekimi mo maami ma ayiri.

Aluoni vuele o ndzila Emayise

13Ŋa o tsuhu dzi dzia, aluoni vuele o ntsa bo, ayeni na mpuhu ma tsuoloho ma Emayise. Osa atari muele a dzue ma oto Zerizaleme. 14Bo aki ma awobo o mpanihi e bo o maami ma ayiri aso. 15Ntini e bo ma wobihi o mpanihi e bo, Zezi nde anku otsiini, oya alaana bla bo. 16Bo ma mono nde, okoroho bo i yiimba nde ni. 17Zezi opisi bo ndi: «Be oma ledziehe na owobo?» O ŋa bo asuri, bo aya ma mono obi. 18Omo o mpanihi e bo a vuele, a nkuumi Klopase okaali nde ndi: «Ali i yaa maami ma ayiri o Zerizaleme ma etsuhu bi ni, mini we otu?»

19Nde opisi bo ndi: «Mo ama?» Bo akaali nde ndi: «Maami ma ayiri o Zezi a Nazarete! Nde aki owobi a mbari e Ndziami onini. Mbari e nde eki na mpari. Nde osi maami a luari, o miisi a Ndziami bla a baari aso. 20Ankumu ma asi ma avuoŋi a saabe bla ankumu maamo, ama mpa nde ndi abuma nde, emana ama komo nde ma lembandzi. 21Bisi leki na tari mbri nde avusaha Isayele. Ŋa lobi tsuhu otari e maami maa ma asi yira. 22Bisi lema kima, akaasi ake a bla bisi ama dze antsuo nkara entsiere. 23Ŋa bo aka mono obiimi o nde ni. Bo ayi na avuriha, aduhi ndi bo ami mono abaandzi. Abaandzi ami duha na bo ndi nde oli muo. 24Abuha a bla bisi ake se ama dze antsuo. Bo amoni maami ma osuumbu akaasi ma aduhi bo. Ŋa bo aka mono nde ni.» 25Ŋa Zezi na bo ndi: «Be baari leli oyalihi kaali. Be ma oyalaha maami ma awobi a mbari e Ndziami ma duhi ntsa etima e be ŋa onono! 26Eki mbaa ove Krisi osi amono ambaba, omana nde onyunihi ntsa lekuma le nde?» 27Ŋa Zezi obaani oduha bo maami ma wobihi o nde ntsa Esaangumu e Ndziami eso. Ma obaana ma esaangumu e Moyize, tii ngo esaangumu ma awobi a mbari e Ndziami eso.

28Ŋa bo atsiina tuha na mpuhu e bo ma yenihi, Zezi osi mva alabaha na bo. 29Ŋa bo akanihi nde ndi: «Ka bla bisi, tsuhu eya ekolo, lempiibi leya le eya.» O ŋa nde onyunihi ntsa ndzo, na aka bla bo. 30Nde okuma tanda bla bo, nde oyahi lempeembe. Ovuoni, nde otsebi ompi bo lo. 31O ŋa bo miisi anahi, bo ayiimbi nde. Emana nde onyuoŋi o miisi a bo. 32Bo aya ma wobo o mpaniŋi e bo vuele ndi: «Saawe leka mono mbaa ntsa etima e saawe o biri e nde awobihi na saawe o ndzila, na o nde awobihi saawe o mbari e Ndziami eli ntsa Esaangumu ni?»

33Bo asarihi asisari, avurihi Zerizaleme. Bo amoni antuma a kuumi na omo ama kusaha abuha bla abuha akema. 34Bo aduhi ndi: «Dzaa dzaa Nkumu ama nyusiha! Nde ama laha nyuru na Simon!» 35Ŋa bo aduhi maami a bo ma moni o ndzila. Na osuumbu a bo ma yiimbi Zezi, o ntini e nde atsebi lempeembe.

Zezi alaha nyuru na aluoni a nde

36Bo aki akini ma wobo vua Zezi nde anku owasihi o mpanihi e bo, na bo ndi: «Oduusu oka bla be!» 37Bo amoni onguo bla vuoho yo mini, bo aki ndi odidima obi. 38Ŋa Zezi na bo ndi: «Be lemono onguo ma oma? Ŋa ekemi ntsa etima e be buni? 39Lekeese dziala e me bla nyiili. Be lemono mbri me! Letiila me be lemono. Odidima akabi kali, eyesi kali. Okoroho be lemono mbri me na dzo.» 40Nde oduha vua, nde olahi bo dziala bla nyiili e nde. 41Bo aki akini ntsa osuere na lekimi. Bo akini oyalaha ni. Ŋa nde opisi bo ndi: «Be kuuni na kiila ma odza?» 42Bo ampi nde otini o ntsu ma ama kaanga. 43Nde oyahi tso, odzi o miisi a bo.

44Emana nde na bo ndi: «Lemono maami a me ewobihi ntini eme eki ekini bla be. Maami ma ama teende o me ntsa angri a Moyize, na Awobi a mbari e Ndziami bla a Soome, ove amoni mo.» 45Emana nde onaani oyeri o bo ma oyuha maami ma ama teende ntsa Esaangumu e Ndziami. 46Ŋa nde na bo ndi: «Ama teende ndi, Krisi ove omoni ambaba, omana o tsuhu otari nde onyusihi ntsa akui. 47Ma adze otooso mbari o nkuumi e nde, ma esi eso. Baari akaala eku, nde oboloho ambiini a bo, ma obaana o Zerizaleme. 48Be baari le siisa enyua o maami maa aso. 49Ŋa me etuma be ndahi e Taara a me alehi be. Be lesa aka ntsa onguundu, tii ngo e mpari e yulu ewuha be.»

Zezi adze yulu

50Emana nde obiri bo mpili e Betani. Nde osaari dziala na yulu ma ompa bo andosoho. 51Ntini e nde ampihi bo andosoho, nde otsiehi bla bo, oyeni yulu. 52Bo amana okumuha ma ovuono o miisi a nde, bo avurihi na Zerizaleme bla osuere enini. 53Ŋa bo akiihi antini aso ntsa Ndzo e Ndziami ma osiha aluumu a Ndziami.

Currently Selected:

Luc 24: MDT

Highlight

Copy