Like 20
20
Onkani o Jesu
1Cuhu mo, Jesu aki ayisiha baari nca njo e Njyami, nde se atooso bo Ncya e Mve. Ankʉmu ma asi ma avwoŋi, bɨla ayisihi me ekele na ankʉmu mo okuha ayi. 2Bo apɨsi nde ndi: «Duha bisi, atumi we osa maami ma na? Ampi we onkani mo osa mo na?» 3Jesu okaali bo ndi: «Me se ema lehe be oduhu. Lema duha me, 4ateeme a Jan awuuhi na yulu si na baari?» 5Ŋa bo aya ma cimiha o mpaniŋi e bo ndi: «Saabe oduha mbɨri: “Na yulu”, nde okaala saabe ndi: “Be leka yalaha nde ni mo oma?” 6Ŋa saabe oduha mbɨri: “Na baari”, baari aso ma aje otena saabe akele mo obuma saabe, obila bo aki ama yalaha ndi Jan owobi a mbari e Njyami.» 7Ŋa bo akaali ndi: «Bisi i yaa mpili ewi mo ni.» 8Ŋa Jesu okaali bo ndi: «Me se eka duha be mvuuru ampi me onkani mo osa mo ni.»
Ncincami ajanji a nguunu eti e viinye
9Ŋa Jesu oya ata ncincami ji na baari ndi: «Balaha mo ekuni nguunu eti e viinye#20.9 Vigne omakaaha nguunu eti ma Vigne eti ma empaa a rese, ma siiha mali aba omo, ompi na ajanji a viinye, nde oyeni opiinga ma lebihi. 10Ntini ma toloho mburu eto, nde otumi ojanji omo mpili ajanji a viinye, ndi bo ampa o nde obari o mburu e viinye. Bo abeeri nde, avuuri nde jyala onyaŋa. 11Onga nguunu ovurihi otumi ojanji okɨma. Bo abeeri jwa se, bo atuhi nde, bo avuuri nde jyala onyaŋa. 12Nde ovurihi otumi ojanji otari. Bo atiniŋi nde ampura se, bo acuuri nde. 13Ŋa onga nguunu e viinye ndi: “Me osa buni? Me ematuma mwana a me emavʉla odya, leke bo ma anyiima nde.” 14Ŋa ajanji a nguunu eti e viinye amono nde, bo aya ma wobo o mpaniŋi e bo ndi: “Mono onga wanda. Lecwe lebuma nde, saabe le siila na wanda!” 15Bo atusihi nde nca nguunu viinye, abumi nde.» Jesu opɨsi bo ndi: «Nga nguunu aje osa bo ŋa buni? 16Nde aje oya, nde obuma ajanji a nguunu eti e viinye, oyaha nguunu ompa na ajanji akɨma.» Baari ayuha vwa, aduhi ndi: «Kali, ka vwa ni!» 17Ŋa Jesu okeesi bo, na bo ndi: «Mbari e Njyami ma ama ateende ndi: “Kele acwi ma abɨsi, emi kiriha kele e kaama. Mbari jya eduha ndi nki”? 18Mpini mvuuru ava o yula kele jya, okesihi. Kele jya se ova o yula we, we kesihi.»
Lepo le Sesare
19Ayisihi me ekele bɨla ankʉmu ma asi ma avwoŋi asahi okwara nde o ŋiŋa. Ŋa bo amoni vwoho o baari ma aki ŋa. Bo aki ama yaa ndi Jesu ata ncincami ji ŋa o bo. 20Bo aya ma keese Jesu. Bo atumi baari ma kiisaha ndi bo ali tele o miisi a Njyami, mpili e nde. Ma oyusuha jaa e mbi ecuuha ma onwa a nde, mo ompa nde na lepatima ali na onkani bɨla onkʉmu. 21Bo alehi nde oduhu yu ndi: «E Nkʉmu, bisi leyaa mbɨri we awobo yemiŋi, we se ayisiha yemiŋi. We aka pamaha reeŋe ni. We ayisiha njila e Njyami bɨla asisyele. 22Ŋa duha bisi yuhu bisi lebuuna owʉra lepo le Sesare si kali?» 23Ŋa Jesu oki oma yaa ndi jwa oyere. Nde okaali na bo ndi: 24«Lelaha me doro a nkoso omo. Olya bɨla ampri ma awwana na?» Bo akaali ndi: «E Sesare.» 25Jesu okaali bo ndi: «Levuura Sesare e nde, be levuura Njyami se e nde.» 26Bo aka buuna yuha jaa e mbi o nca ewobihi e nde o miisi a baari ni. Bo akimi ekalihi e nde. Bo aya pi.
Oduhu ama enyusihi ma akwi
27Asadisi#20.27 Asadisi ayisigi a mbari e Njyami. Ŋa bo ma aka yalaha ndi akwi ma aje onyusiha ni. ake aciini mpili e Jesu, bo ma aka yalaha enyusihi ma akwi ni. Bo alehi nde oduhu yu ndi: 28«E Nkʉmu, Moyise ateendi ngɨri ji o bisi ndi: “Balaha oka na okari bɨla mwarihi, nde okwa baana kali, mwarihi a nde abuuna oyaha okuuli, ma okʉla okulu a nde ama kwa baana.” 29Ŋa eki na abalaha ncaami o mwo a bo. Ancomi oyahi okaasi, okwi baana kali. 30Ojwele oyahi okuuli, nde se okwi, baana kali. 31Na otari se oyahi okuuli, okwi. Ŋa bo aso a ncaami akwi, bo aka nyila baana ni. 32Emana okaasi se okwi. 33Ŋa cuhu akwi ma aje onyusiha nde aje oka okari a na? Nde ti aki okari a bo aso a ncaami!» 34Jesu okaali bo ndi: «Ma antini ma, abalaha ma yaha akaasi ma abaala, ma mpa se akaasi ma abaala. 35Ŋa baari ma aje opama tele ma antini ma aje oya, bɨla enyusihi e nca leku ma aka ma yaha akari bɨla alumi ni. 36Bo ma aka ma buuna okwa ni. Obila bo aya mva abaanji. Bo baana a Njyami, Njyami ama nyuusa bo ma leku. 37Moyise ama duha nde anku ndi akwi ma aje onyusuha. O ntini e nde aduhi jaa oti ayahi mbaa, nde ocwoli Nkʉmu o “Njyami Abraame, Njyami a Isaake bɨla Njyami a Jakobe.” 38Jesu oluusi ndi: Njyami ka Njyami akwi ni, ŋa Njyami a baari ma ali mwo, obila bo aso ali mwo o nde.» 39Ayisihi me ekele eke ayahi mbari ndi: «E Nkʉmu, we awobi ŋa yemiŋi.» 40Bo aka ma buuna olehe nde eduhi ekema ni.
Krisi bɨla Davide
41Jesu na bo ndi: «Ma duuha ndi Krisi mwana Davide mo oma? 42Davide nde anku aduha nca osangumu o Soome ndi: “Njyami a Nkʉmu ama duha na Nkʉmu a me ndi: Ka o nci o kwoho o me olumi. 43Tii ngo e me elehe abuha a we ma ombangu mva kiila o ncina nyiili e we.” 44Ŋa Davide acwolo nde o “Nkʉmu”, ŋa Krisi oma ka mwana a nde buni?»
Jesu atiba ayisihi me ekele
45Baari aso aki ma ayuha Jesu, nde na alwoni a nde ndi: 46«Be lesi ayiba ma ayisihi me ekele! Bo njala ojyeŋe na eringa ma ela ela, bo njala awosoho bo o mwa ambuhu. Bo oswoloho ebiri ma levusu nca anjo mavwonoho. Bla na ebiri ma levusu ma cinda ma anini. 47Bo ma piinaha akuuli biibi e bo ma ali na jo eso. Bo osyaha evwoni ma ela ela ndi amono bo. Opami a bo aje ovʉla abuha.»
Currently Selected:
Like 20: MDT
Highlight
Copy
Compare
Share
Want to have your highlights saved across all your devices? Sign up or sign in
©Seed Company in partnership with COORDINATION INTER EGLISES POUR L’ALPHABETISATION ET LA TRADUCTION EN LANGUES GABONAISES
