Luc 19

Zezi bla Zase

1Zezi onyunuha ntsa Zeriko, oya atina onguundu. 2Eki na balaha mo o ŋa ma tsuolihi o Zase, nkumu atoniŋi ma adoro, nde aki nga osolo. 3Nde aki asaha omono Zezi, ŋa nde aki i buuna ni. Ma oma, lemvuuru leki lema vula kuna, ŋa nde se aki otele okubi. 4Nde oyeni o ntsiini levusu, okumi o yula oti a sikomoore, ma omono Zezi aya na ayira o ŋa.

5Ntini e Zezi ato obiri dzia, osaari miisi na yulu, na nde ndi: «Zase, suriha woowo! Lobi ove me eki o ndzo e we.» 6Zase osurihi asisari, oyambi nde na osuere oso. 7Baari aso amono vua aya ma ŋiina ndi: «Nde omi dze na aka mpili e nga ambiini!»

8Ŋa Zase ma otele o miisi a Nkumu, na nde ndi: «E Nkumu, me empa anga owuha obari osolo a me. Ŋa yuhu me ema yaha adoro a mvuuru a kuna, me evuura nde abuhu a na.» 9Zezi okaali nde ndi: «Lobi ami vusuha baari a ma ndzo dzi. Obila yu se muana Abraame. 10Obila Muana mvuuru ayi na asaha, na le vusuha le baari ma aki ama nyuoŋo.»

Ntsintsami akele amvunu

11Baari aki ma yuha mbari e Zezi, nde oluusi ntsintsami mo, obila nde aki tuha na Zerizaleme. Baari atsimihi ndi Onkani o Ndziami ma oya o ntsi na ntsi ŋa. 12Ŋa nde ndi: «Balaha mo eki mvuuru onini, na nkuono e nde se eki baari ma anini. Nde oyeni osi o la, ma oyaha mbara onkani. Emana nde oyi na avuriha. 13Nde otsuoli adzandzi a nde a kuumi. Nde ompi bo akele amvunu. Emana nde na bo ndi: “Lesa ombuungu bla mo, be lebaha adoro akema, tii ngo e me eya na avuriha.” 14Ŋa baari ama osi o nde aki ama bele nde. Bo atumi baari ngula nde na aduha ndi: “Bisi ndzala mbri balaha dzia eka nkani a bisi kali.” 15Ŋa si o bo ma beli nde, ampi nde onkani, nde oyi na avuriha. Nde otsuoli adzandzi a nde ampi adoro o paani e nde. Ma oyaa ombuungu a mvuuru na mvuuru asi. 16Odzandzi antsomi oyi, oduhi ndi: “E nkumu, kele le we le mvunu le we ampi me, lemi tusaha me akele a mvunu akimakuumi.” 17Nkani okaali nde ndi: “Yemihi, we odzandzi ove. Obila we aki tele o maami ma akiehe, me empa we onkani o yula enguundu kuumi.” 18Odzandzi o dzuele oyi, oduhi ndi: “E nkumu, kele le we le mvunu, lemi mpa me akele akimaamvunu ataani.” 19Nkani okaali na nde ndi: “Me empa we onkani o yula enguundu etaani.” 20Odzandzi okima oyi oduhi ndi: “E nkumu mono kele le we le mvunu, me eki ema kiele yo ntsa obari o mfa. 21Obila me eki na vuoho o we. We balaha e nkala. We ayaha biibi e we aka tsuusa ni. We otoloho biibi e we aka kuna ni.” 22Nde okaali na nde ndi: “We odzandzi obi. Me epama we o mbari e we anku. We oki oya mbri me balaha e nkala, me eyaha biibi e me eka tsuusa ni, me etoloho e me eka kuna ni. 23Ŋa we abisi olehe adoro a me o ndzo ma kielehe adoro oma? Kaa ntini e me eyi na avuriha, me basihi adoro a kuna.” 24Emana nde na baari ma aki ŋa ndi: “Lepiina nde kele le mvunu lia, be lempa ali na akele amvunu kuumi.” 25Bo akaali nde ndi: “E nkumu, nde oya na akele amvunu kuumi!” 26“Me eduha be: Mvuuru ali na kiila, ma adze ovuriha oluusa nde. Ŋa ali onyaŋa ma tsiese okiehe ma oli na nde. 27Ŋa ma abuha a me ma ombangu, ma aduhi ndi me i ka nkani a bo ni, le eya na bo kuuni, be letsebehe bo ankii o mua me.”» 28Zezi omana owobo vua, oyiri levusu, okumi Zerizaleme.

Zezi anyuniha ntsa Zerizaleme

29Nde otsiina tuha na Betefaze bla Betani, mpili okuri eti ma Eliive#19.29 Okuri ma tuoloho ma okuri eti ma oliive, mpili osi a Azife. Oti oliive, ma dziaha mburu, ma siaga se maari o mburu e nde., nde otumi aluoni a nde vuele. 30Nde na bo ndi: «Ledziehe ntsa mpuhu eli tele na be. Ntini e be lenyuniha, be ledze omono muana ane#19.30 Ane oma kaha nyama abiriha baari, bla biibi. Nde adzandza kuna. ama kura, eli mvuuru okini sa aka o ntsi o yula nde ni. Lenaana be leya na nde kuuni. 31Ŋa mvuuru opisa be ndi: “Be lenaana nde ma oma?” Be lekaali mbri: “Nkumu na kaama o nde.”»

32Aluoni a vuele a nde atumi ayeni, bo amoni maami ma osuumbu a Zezi aduhi bo. 33Ntini e bo ma naanihi muana ane, anga nde apisi bo ndi: «Be lenaana muana ane yu ma oma?» 34Bo akaali ndi: «Nkumu na kaama o nde.» 35Bo ayi na muana ane mpili e Zezi. Bo ayali amfa a bo o yula muana ane. Alehi Zezi o yula nde. 36Ntini e Zezi atsinihi, baari ma yala amfa a bo o ndzila.

37Nde oki oya atsiina na Zerizaleme, asuraha okuri eti ma Eliive. Lenkindi la aluoni, ntsa osuere, leya leyima aluumu a Ndziami nkara yulu. Ma emaa e bo ma amoni eso. 38Bo aduhi ndi: «Andosoho aka na nkani aya o nkuumi e Nkumu! Oduusu oka o yulu, lekuma le Ndziami leka ma ebiri e nkara yulu!»

39Afarizi ake ma aki ompanihi lemvuuru na Zezi ndi: «E Nkumu, duha aluoni a we aka pi!» 40Zezi okaali na bo ndi: «Me eduha be, bo aka pi, akele ma, ma adze owula ankima!»

Zezi alila mo Zerizaleme

41Ntini e Zezi atsiini tuha na Zerizaleme, omono onguundu, oya alila obila o tso. 42Nde ndi: «We se aki ma oyaa o tsuhu e lobi osuumbu ma obaha oduusu! Ŋa ama dzisiha tso o miisi a we! 43Obila etsuhu ma edze oya o we, ma eli abuha a we ma ombangu ma adze otua ebaha, bo adzenehe we, bo apia we ma angulu aso. 44Bo ma adze onyya we bla baana a we. Bo ma aka adze onyila si kele mo o yula buha ni. Ma oma we aka yiimba ntini e Ndziami ayi na ayamaha we ni!»

Zezi atsuura atehi a biibi ntsa ndzo e Ndziami

45Zezi onyunuha ntsa ndzo e Ndziami, oya atsuura baari ma teehi biibi. 46Nde na bo ndi: «Ama teende ndi: “Ndzo e Ndziami edze oka ndzo ma avuonoŋo.” Ŋa be lemi sa yo eyiha biri adzibi!» 47Etsuhu eso Zezi aki ayisiha ntsa ndzo e Ndziami. Ŋa ankumu ma asi ma avuoŋi, ayisihi ma angri, bla ankumu ma okuha, asahi obuma nde. 48Ŋa bo aki i yaa osuumbu ma osa ni. Obila baari aso aki ma ayuha nde ndzele ndzele.

Currently Selected:

Luc 19: MDT

Highlight

Copy