Luc 20

Onkani o Zezi

1Tsuhu mo, Zezi aki ayisiha baari ntsa ndzo e Ndziami, nde se atooso bo Ntsia e Mve. Ankumu ma asi ma avuoŋi, bla ayisihi ma angri na ankumu ma okuha ayi. 2Bo apisi nde ndi: «Duha bisi, atumi we osa maami ma na? Ampi we onkani ma osa mo na?» 3Zezi okaali bo ndi: «Me se ema lehe be oduhu. Lema duha me, 4ateeme a Zan awuuhi na yulu si na baari?» 5Ŋa bo aya ma tsimiha o mpanihi e bo ndi: «Saabe oduha mbri: “Na yulu”, nde okaala saabe ndi: “Be leka yalaha nde ni ma oma?” 6Ŋa saabe oduha mbri: “Na baari”, baari aso ma adze otena saabe akele ma obuma saabe, obila bo aki ama yalaha ndi Zan owobi a mbari e Ndziami.» 7Ŋa bo akaali ndi: «Bisi i yaa mpili ewi mo ni.» 8Ŋa Zezi okaali bo ndi: «Me se eka duha be mvuuru ampi me onkani ma osa mo ni.»

Ntsintsami adzandzi a nguunu eti e viinye

9Ŋa Zezi oya ata ntsintsami dzi na baari ndi: «Balaha mo ekuni nguunu eti e viinye#20.9 Vigne oma kaaha nguunu eti ma Vigne eti ma empaa a reze, ma siiha mali aba omo, ompi na adzandzi a viinye, nde oyeni opiinga ma lebihi. 10Ntini ma toloho mburu eto, nde otumi odzandzi omo mpili adzandzi a viinye, ndi bo ampa o nde obari o mburu e viinye. Bo abeeri nde, avuuri nde dziala onyaŋa. 11Onga nguunu ovurihi otumi odzandzi okima. Bo abeeri dzua se, bo atuhi nde, bo avuuri nde dziala onyaŋa. 12Nde ovurihi otumi odzandzi otari. Bo atiniŋi nde ampura se, bo atsuuri nde. 13Ŋa onga nguunu e viinye ndi: “Me osa buni? Me ema tuma muana a me a dia, leke bo ma anyiima nde.” 14Ŋa adzandzi a nguunu eti e viinye amono nde, bo aya ma wobo o mpanihi e bo ndi: “Mono onga wanda. Letsue lebuma nde, saabe le siila na wanda!” 15Bo atusihi nde ntsa nguunu viinye, abumi nde.» Zezi opisi bo ndi: «Nga nguunu adze osa bo ŋa buni? 16Nde adze oya, nde obuma adzandzi a nguunu eti e viinye, oyaha nguunu ompa na adzandzi akema.» Baari ayuha vua, aduhi ndi: «Kali, ka vua ni!» 17Ŋa Zezi okeesi bo, na bo ndi: «Mbari e Ndziami ma ama ateende ndi: “Kele atui ma abisi, emi kiriha kele e kaama. Mbari dzia eduha ndi nki”? 18Mpini mvuuru ava o yula kele dzia, okesihi. Kele dzia se ova o yula we, we kesihi.»

Lepo le Sezare

19Ayisihi ma angri bla ankumu ma asi ma avuoŋi asahi okuara nde o ŋiŋa. Ŋa bo amoni vuoho o baari ma aki ŋa. Bo aki ama yaa ndi Zezi ata ntsintsami dzi ŋa o bo. 20Bo aya ma keese Zezi. Bo atumi baari ma kiisaha ndi bo ali tele o miisi a Ndziami, mpili e nde. Ma oyusuha dzaa e mbi etsuuha ma onyua a nde, ma ompa nde na lepatima ali na onkani bla onkumu. 21Bo alehi nde oduhu yu ndi: «E Nkumu, bisi leyaa mbri we awobo yemiŋi, we se ayisiha yemiŋi. We aka pamaha reeŋe ni. We ayisiha ndzila e Ndziami bla asisiele. 22Ŋa duha bisi yuhu bisi lebuuna owura lepo le Sezaare si kali?» 23Ŋa Zezi oki oma yaa ndi dzua oyere. Nde okaali na bo ndi: 24«Lelaha me doro a nkoso omo. Olia bla ampri ma awwana na?» Bo akaali ndi: «E Sezaare.» 25Zezi okaali bo ndi: «Levuura Sezaare e nde, be levuura Ndziami se e nde.» 26Bo aka buuna yuha dzaa e mbi o ntsa ewobihi e nde o miisi a baari ni. Bo akimi ekalihi e nde. Bo aya pi.

Oduhu ama enyusihi ma akui

27Asadisi#20.27 Asadisi ayisigi a mbari e Ndziami. Ŋa bo ma aka yalaha ndi akui ma adze onyusiha ni. ake atsiini mpili e Zezi, bo ma aka yalaha enyusihi ma akui ni. Bo alehi nde oduhu yu ndi: 28«E Nkumu, Moyize ateendi ngri dzi o bisi ndi: “Balaha oka na okari bla muarihi, nde okua baana kali, muarihi a nde abuuna oyaha okuuli, ma okula okulu a nde ama kua baana.” 29Ŋa eki na abalaha ntsaami o muo a bo. Antsomi oyahi okaasi, okui baana kali. 30Odzuele oyahi okuuli, nde se okui, baana kali. 31Na otari se oyahi okuuli, okui. Ŋa bo aso a ntsaami akui, bo aka nyila baana ni. 32Emana okaasi se okui. 33Ŋa tsuhu akui ma adze onyusiha nde adze oka okari a na? Nde ti aki okari a bo aso a ntsaami!» 34Zezi okaali bo ndi: «Ma antini ma, abalaha ma yaha akaasi ma abaala, ma mpa se akaasi ma abaala. 35Ŋa baari ma adze opama tele ma antini ma adze oya, bla enyusihi e ntsa leku ma aka ma yaha akari bla alumi ni. 36Bo ma aka ma buuna okua ni. Obila bo aya mva abaandzi. Bo baana a Ndziami, Ndziami ama nyuusa bo ma leku. 37Moyize ama duha nde anku ndi akui ma adze onyusuha. O ntini e nde aduhi dzaa oti ayahi mbaa, nde otsuoli Nkumu o “Ndziami Abraame, Ndziami a Izaake bla Ndziami a Zakobe.” 38Zezi oluusi ndi: Ndziami ka Ndziami akui ni, ŋa Ndziami a baari ma ali muo, obila bo aso ali muo o nde.» 39Ayisihi ma angri ake ayahi mbari ndi: «E Nkumu, we awobi ŋa yemiŋi.» 40Bo aka ma buuna olehe nde eduhi ekema ni.

Krisi bla Davide

41Zezi na bo ndi: «Ma duuha ndi Krisi muana Davide ma oma? 42Davide nde anku aduha ntsa osangumu o Soome ndi: “Ndziami a Nkumu ama duha na Nkumu a me ndi: Ka o ntsi o kuoho o me olumi. 43Tii ngo e me elehe abuha a we ma ombangu mva kiila o ntsina nyiili e we.” 44Ŋa Davide atsuolo nde o “Nkumu”, ŋa Krisi oma ka muana a nde buni?»

Zezi atiba ayisihi a mbari e Ndziami

45Baari aso aki ma ayuha Zezi, nde na aluoni a nde ndi: 46«Be lesi ayiba ma ayisihi ma angri! Bo ndzala odzieŋe na eringa ma ela ela, bo ndzala awosoho bo o mua ambuhu. Bo osuoloho ebiri ma levusu ntsa andzo ma avuonoho. Bla na ebiri ma levusu ma tsinda ma anini. 47Bo ma piinaha akuuli biibi e bo ma ali na dzo eso. Bo osiaha evuoni ma ela ela ndi amono bo. Opami a bo adze ovula abuha.»

Currently Selected:

Luc 20: MDT

Highlight

Copy