Luc 18

Ntsintsami opami maami obi bla okaasi okuuli

1Zezi oti bo ntsintsami ma oduha bo ndi ove bo avuoni antini aso, bo i kolo ni. 2Nde na bo ndi: «Ntsa onguundu omo eki na mvuuru apamaŋa maami. Nde aki i nyiima Ndziami ni, nde se na mbengili o baari. 3Ntsa onguundu kia se eki na okaasi okuuli, adzihi mpili e nde ndi: “Pama dzaa e mpanihi e saa na buha le me le ombangu.” 4Antini ayiri kuna, mvuuru apamaŋa maami aki ndzala kali. Emana nde ndi: “Ŋa si me i nyiima Ndziami ni, me se na mbengeli o baari, 5okaasi okuuli yu aweele me, me ema pama dzaa e nde, ma oduma nde i ma bula me otsui antini aso ni.”» 6Nkumu oluusi ndi: «Ŋa leyuha leduhi opami maami obi yu! 7Ŋa Ndziami aka adze osa opami a tele mo baari a nde ama suolo, ma wulaha ankima na e nde, na na mui, na na mpiibi ni? Nde adze osa andira ma oyamaha bo? 8Me eduha be, nde adze opama bo asisari. Ŋa ntini e Muana mvuuru adze oya na avuruha, nde adze obasaha oyalihi o yula ntsie?»

Ntsintsami Ofarizi bla onga lepo

9Zezi ovurihi oti bo ntsintsami dzi, mo baari ake ma monihi ndi bo ali tele, bo abengele abuha: 10«Abalaha vuele akumi ntaana ndzo e Ndziami, na avuono. Omo aki Ofarizi, omo otoniŋi lepo. 11Ofarizi ma otele avuono ntsa otima ndi: “E Ndziami me empa we leve ma osuumbu a me eli ka mva abuha maamo ni. Bo adzibi, bo abi, bo masiaha ntsuuma, mva otoniŋi lepo yu. 12Me eka ndzala etsuhu dziele ntsa etsuhu ntsaami. Me empa we buhu le okuumi le biibi e me ebaha eso.” 13Otoniŋi lepo aki o lala, ŋa nde aki i buuna osaara se miisi na yulu ni. Ŋa nde aki akuruha ondundu aduha ndi: “Aa Ndziami, mono me nkerihi osi ambiini mva me.” 14Me eduha be, balaha dzia ema vuruha ndzo e nde ŋa, Ndziami omi kaala nde oya tele, ŋa ka Ofarizi ni. Ma oma mvuuru akuusa nyuru ma vuura nde ntsi, avuraha ntsi ma kuusa nde.»

Zezi ayamba enkere ma ekiehe

15Baari ayi na baana ma enkere na e Zezi ndi nde otiila na bo. Aluoni amono vua, abie na bo. 16Ŋa Zezi otumi bo otsiina na baana, oduhi ndi: «Lenyila enkere ma ekiehe eya na e me! Lekaa kanaha bo ni, ma oma Onkani o Ndziami oka na baari ma ali mva bo. 17Me eduha be sisiele, mvuuru abisa oyalaha Onkani o Ndziami mva onkere okiehe, aka adze onyunuha o bo ni.»

Nga osolo

18Nkumu Azife omo olehi Zezi oduhu ndi: «E Nkumu ove, me ma obaha lebihi le mbumbu me osa buni?» 19Zezi okaali na nde ndi: «We atsuolo me o Nkumu ove ma oma? Mvuuru se omo ove onyaŋa, ongula Ndziami. 20We oya angri a Ndziami: “We i sa ntsuuma ni, we i buma mvuuru ni, we i dziba kuba ni, we i banaha mvuuru ni, nyiima taara bla nguhu a we.”» 21Balaha dzia ekaali nde ndi: «Me ema nyiima maa aso esi wa me obusi.» 22Zezi omana oyuha nde okaali ndi: «Emi siila we dzaa mo ntu: tehe biibi e we eso, omana we kabaha anga owuha adoro. Ŋa we adze obasaha osolo o yulu. Omana we oya, we oluono me.» 23Ntini e nde ayuhi vua, nde omoni obi, ma obila o nde aki na osolo a kuna.

24Zezi omono ndi balaha dzia emi mono obi, nde okaali ndi: «Baari ma ali na osolo, na siami ma onyunuha ntsa Onkani o Ndziami! 25Ma oma nyama mva samo#18.25 Ma lefaala ama teende samo: anyama ma biriha baari. abuuna onyunuha mo bulu le sori, okoroho nga osolo ma onyunuha ntsa Onkani o Ndziami evuli siami.» 26Baari ma yuuhi nde ndi: «Ŋa abuuna ovuuha na?» 27Zezi okaali ndi: «Maami a baari ma ali i buuna osa ni, Ndziami abuuna.» 28Ŋa Piere ndi: «Bisi lemi suba biibi me eki na bisi kalihi, lemi luono we.» 29Zezi okaali na bo ndi: «Me eduha be sisiele, mvuuru anyila ndzo e nde, na okari a nde, na akulu bla barihi a nde, na taara bla nguhu na baana a nde. Obila ma Onkani o Ndziami, 30nde adze obaha kuna ma antini ma. Ŋa antini ma adze oya, nde adze obaha lebihi le mbumbu.»

Zezi avuriha owobo ma leku le nde bla enyusihi e nde

31Zezi oyahi aluoni a kuumi na vuele bla nde, na bo ndi: «Lemono, saabe leya lekuma na Zerizaleme, ŋa maami ma awobi a mbari e Ndziami ma ateendi aso o Muana mvuuru, ma adze omono mo. 32Obila ma adze ompa nde na baari ma ali ka Azife ni#18.32 Azife baari ma ampi Zezi na asi Rome., bo asebe nde, bo atuha nde, bo atsuura nde antayi. 33Bo ma adze obula nde ekatsi, bo ma adze obuma nde. Ŋa tsuhu o tari nde adze onyusiha.» 34Ŋa aluoni aka yuha dzaa si mo ni. Mbari dzia eki lempiini, bo aka yaa maami a Zezi aduhii bo ni.

Zezi asalaha balaha eki i mono ni

35Ŋa Zezi aki atsiina na onguundu o Zeriko, balaha mo eki i mono ni aki o ntsi ma osiese a ndzila, alaha biibi. 36Nde oyuha lemvuuru leyira nde opisi bo ndi: «Tso kua oma?» 37Bo akaali na nde ndi: «Zezi a Nazarete ayira.» 38Ŋa nde owuli nkima ndi: «Zezi a Muana Davide, mono me nkerihi!» 39Baari ma laanihi levusu le nde abie na nde ndi: «Ka pi!» Ŋa nde oselehi owula ankima nkara yulu ndi: «Muana Davide, mono me nkerihi!» 40Zezi osuri, oduhi na bo ndi: «Leya na me nde!» Mvuuru ali i mono ni otsiini o paani e nde, Zezi opisi nde ndi: 41«We asaha mbri me sa we oma?» Nde okaali ndi: «E Nkumu sa mbri me vuruha emono.» 42Zezi okaali nde ndi: «Mono! Oyalihi o we omi vusuha we.» 43O ntsi na ntsi ŋa nde oya amono, oluoni Zezi, na lekuusa la lekuma le Ndziami. Baari aso amono vua, aya ma kasaha Ndziami.

Currently Selected:

Luc 18: MDT

Highlight

Copy