Luc 17

Mbiini bla leboloho

1Zezi na aluoni a nde ndi: «Maami ma atuma baari osa ambiini ma aka adze oyele ni, ŋa ndoho eka na mvuuru aya na mo. 2Tata akuri nde kele e nini o nkii, atuni nde ntsa okeri onini. Ŋa nde i ma buuna otuma muana onkere se omo osa ambiini ni. 3Lesa ayiba! Muana nguhu a we osa mbiini, we owobi na nde yemiŋi. Ŋa nde okaala eku we obolihi nde. 4Ŋa nde osoŋo we amihi ntsaami ma odziila a mui omo, nde se oya na aviriha amihi ntsaami mpili e we ndi: “Me emi mono obi”, we se obolihi nde.»

Mpari oyalihi

5Antuma na Nkumu ndi: «Luusa bisi oyalihi.» 6Ŋa Nkumu okaali na bo ndi: «Be leki ma oka na oyalihi oli na okiehe mva lemburu le otaade, kaa be lebuuna oduha na oti a sikomoore#17.6 Oti onini mva oyabi. yu mbri: “Wunaha, dziehe na akuna nyuru we anku ntsa okeri”, nde se onyiimi be.»

Aluoni a Zezi adzandzi atu

7«O mpaniŋi e be ali na odzandzi akuniha anguunu si kali akielehe endoombo, oduha na odzandzi ntini e nde awa anguunu ndi: “Dziaha asisari na kuma o tanda” na? 8Kali, nde oduha na nde ndi: “Laama me biila, kaala amfa, ma olehe me biila, me edza, me nyua. Omana we se we odza, we nyua, ma a we antini.” 9Nde ŋa ampa odzandzi leve ma osuumbu a nde asi maami a nde aduhi? 10Na be se: ntini e be le esa maami ma aduhi be osa aso, be leduhi mbri: “Bisi adzandzi atu. Bisi lesi ni dzandza ma duhi bisi osa.”»

Zezi asalaha anga ebila kuumi

11Ntini e Zezi ayenihi na Zerizaleme, nde oyiri o mpanihi e Samari bla Ngalili. 12Nde onyunuha ntsa mpuhu mo, anga ebila kuumi ayi na e nde. Bo asyeli o lala. 13Bo asaari dzuhi, na nde ndi: «E Zezi Nkumu, mono bisi nkerihi!» 14Zezi omono bo, na bo ndi: «Ledziehe na alaha anyuru mpili asi ma avuoŋi.» Ŋa ntini e bo ma ayenihi, bo aki ami mana owuuma. 15Omo o ntsa bo, omono ndi nde omi wuuma, oyi na avuriha, na okuusa lekuma le Ndziami nkara yulu. 16Nde ovi o ntsina nyiili e Zezi mpaa o ntsie, ompi nde leve. Ŋa balaha dzia eki osi Samari. 17Ŋa Zezi ndi: «Bo aso a kuumi aka wuuma ni? Ŋa maamo a wa, ali kuni? 18Mvuuru si omo aka aya na avuriha na ampa Ndziami leve ni, ongula ndzia yu otu?» 19Ŋa Zezi na nde ndi: «Temehe, dziehe, oyalihi o we omi vusuha we.»

Edzihi ma Onkani o Ndziami

20Afarizi apisi Zezi ndi: «Onkani o Ndziami ma odze oya o dzini ntini?» Nde okaali bo ndi: «Onkani o Ndziami ma oka adze oya mva kiila ma mono ni. 21Ma aka adze oduha ndi: “Lemono bo o bu omi ya”, si kali: “Bo oli kuuni” ni. Obila onkani o Ndziami oli o mpanihi e be.»

Tsuhu le Muana mvuuru

22Emana Zezi na aluoni ndi: «Antini ma adze oya a be ledia omono Muana mvuuru se tsuhu le mo, ŋa be leka adze omono nde ni. 23Ma adze oduha be ndi: “Nde ayu ku”, si kali: “Nde ayu ŋa” Be lekaa dziehe ni, lekaa dema ntsiini ni. 24Obila tsuhu e Muana mvuuru adze oya, edze oka mva epeeŋi e ngari o yulu. Oyalala o nde obaana odzi ntsuo oto ntsuo e mo. 25Ove Muana mvuuru osa mono ampasi kuna, ŋa ndzubu e lobi se edze obisa nde. 26Maami ma ayiri o ntini e Nowe, ma adze oka se osuumbu dzu dzua, mva tsuhu e Muana mvuuru adze oya. 27Baari aki ma adza, ma anyua, ma yaha akaasi ma abaala, ma mpa baana a bo ma akaasi se ma abaala. Tii ngo o tsuhu e Nowe anyunihi ntsa mbuungu. Oduumbu a mvula onohi, ntuuna eyi, baari akui aso. 28Edze oka se mva ntini e Loote: baari aki ma adza, ma anyua, ma suuma, ma tehe biibi, ma kuna, ma tua andzo. 29Ŋa tsuhu e Loote atsuuhi o Sodoome, Ndziami otumi mvula a mbaa bla owuru a mbaa, ŋa baari aso akui. 30Tsuhu e Muana mvuuru adze owasaha, maami ma adze oyira ma osuumbu dzu dzua. 31O tsuhu dzia, mvuuru adze oka o yula ndzo aka ma suruha ma oyaha biibi e nde ni. Na adze oka ntsa anguunu se, aka aya na avuriha ndzo ni.» 32Leyibiha okari a Lote! 33Mvuuru asaha okiele lebihi le nde, adze oyele lo. Avusaha lebihi le nde, adze okiele lo se. 34«Me eduha be, lempiibi lia baari vuele ma adze oka o yula ntari mo, ma ayaha omo, anyila omo. 35Akaasi vuele ma adze oka ma otsua biibi, ma atsiese omo, anyila omo. 36Abalaha vuele ma adze oka ntsa nguunu, ma adze obira omo, anyila omo.» 37Aluoni apisi nde ndi: «E Nkumu, maami maa ma adze oyira kuni?» Nde okaali bo ndi: «Biri edze oka obiimi, biri ambila ma adze okusuha abuha.»

Currently Selected:

Luc 17: MDT

Highlight

Copy