Luc 16

Ntsintsami odzandzi ambalaha

1Zezi oduhi na aluoni a nde se ndi: «Balaha mo eli na osolo, eki na odzandzi. Abaniŋi odzandzi ndi nde adzibiha biibi e nkumu. 2Nkumu otsuoli nde, opisi nde ndi: “Maami a me eyuha o we ma buni? Duha osuumbu a we akielehe biibi e me, ŋa we se aka ma kiele dzo ni.” 3Odzandzi owobi nde anku ndi: “Me oma sa ŋa buni, nkumu oya ndzala ndi me kiele biibi e nde kali? Letsima le ntsie? Me mpari kali. Me na okru o mpahi. 4Aa! Me eyaa kiila o me esa o ntini e nde atsiese me mbumbu, me saha baari ma adze oyamba me ma andzo a bo!” 5Nde otsuoli baari ma bihi biibi e nkumu a nde omo na omo. Nde na a ntsomi ndi: “We ama biha na nkumu a me kue?” 6Nde okaali ndi: “Ambiina a maari ekuumi kuumi.” Odzandzi ndi: “Mono osaangumu, ka o ntsi teende ekuumi etaani.” 7Emana nde oduhi na okima ndi: “Ŋa we abihi kue?” Dzua okaali ndi: “Ekuumi ma angara kuumi e mburu.” Odzandzi na nde ndi: “Mono osaangumu, teende ekuumi mfuomo.” 8Ŋa nkumu odzuusi odzandzi obi ma obila o nde ayeesi maami. Baari ama antini ma avuli abuha a bla bo ambalaha, nkusa na baari ma ali ntsa oyalala.»

Ndziami bla Adoro

9Zezi oluusi ndi: «Ŋa me eduha be, lesa leve na andihi a be bla osolo obi oma yula ntsie dzi. Tsuhu osolo ewa Ndziami adze oyamba be ma ebiri e mbumbu. 10Mvuuru ma lehe lila o nde o maami ma akiehe, ma buuna se olehe lila o nde o maami ma anini. Mvuuru ali obi o maami ma akiehe, abuuna se oka obi o maami ma anini. 11Yuhu be le li tele ma osolo obi a yula ntsie, adze ompa be osolo a dzaa dzaa na? 12Yuhu be leka aka tele bla biibi e mvuuru ni, adze ompa be, e be anku na? 13Odzandzi i buuna odzandza ma ankumu vuele ni, nde adze obele omo nde odii omo, si kali nde oka bla omo, obeli omo. Be i buuna odzandza o Ndziami omana be leki ayiha ma Adoro#16.13 Ntsa osangumu o Like ama teende Mamon, osolo o baari ma avuonoho, ndziami otsa. ni.»

Angri bla Onkani o Ndziami

14Afarizi anga ndzala adoro, ma yuha mbari e nde awobihi eso, bo ma sebe Zezi. 15Zezi na bo ndi: «O miisi a baari be lelaha mbri be tele, ŋa Ndziami oyaa etima e be. Obila kiila o baari ma mono o mpanihi e bo ndi kiila enini, o miisi a Ndziami obi bo mini. 16Antini ma angri a Moyize bla awobi a mbari e Ndziami asyeli o Zan Batise. Ŋa ma si baana o Zan Batise, Ntsia e Mve Onkani o Ndziami ami tooso yo, mvuuru na mvuuru osi mpari ma onyunuha ntsa onkani o Ndziami. 17Yulu bla ntsie ma adze oyira siami kali, ŋa angri a Ndziami si mpri mo ma adze otsiese kali. 18Balaha etsuura okari a nde ma oyaha okima, nde asi ntsuuma. Eyaha okaasi olumi ama tsuura, ntsuuma nde se asiaha.»

Ntsintsami e nga osolo bla Lazaare

19«Mvuuru omo aki nga osolo olaasaha amfa a mvunu, etsuhu eso nde osiaha atsinda. 20Onga owuha ma atsuolihi o Lazaare, akihi o tolo ma onyua a ndzo a nde, ŋa nyuru ampura. 21Nde aki ndzala nde odzi odzurihi mo biila me evuaha o tanda e nga osolo, ŋa ongula amva alieŋe nde ampura. 22Nga owuha okui, abaandzi abiri nde mpili Abraame. Nga osolo se okui, adzihi nde. 23O mpili akui aki ma suesehe nga osolo. Nde osaara miisi, otaali Abraame, Lazaare oli o paani e nde. 24Nde owuli ankima ndi: “Abraame, taara a me, mono me nkerihi! Tuma Lazaare otuba ntsuo oliemi a nde ma andza olehe me o yula lempele, obila me emono ampasi kuna ntsa mbaa.” 25Ŋa Abraame okaali ndi: “Muana a me yibiha eve e we abahi ntsa lebihi le we, ŋa Lazaare abahi ndoho. Ŋa paraabu nde ma akooso, ŋa we amono ampasi. 26Ongoula ŋa, mpanihi e be bla bisi mbie e nini, baari ma saha o tsiehe kuuni ma oya kua i buuna ni, ma saha otsiehe kua ma oya kuuni se i buuna ni.” 27Nga osolo ndi: “Ŋa kolo kolo e we taara, tuma Lazaare ndzo e taara a me. 28Obila me na barihi ataani. Nde oma dziese bo, bo se i ma ya o biri ampasi dzi ni.” 29Abraame okaali ndi: “Bo na Moyize bla awobi a mbari e Ndziami ma odziese bo, bo ayuha bo!” 30Nde ndi: “Kali Abraame taara, yuhu mvuuru awa mpili akui ma odze mpili e bo, bo akaala eku.” 31Abraame na nde ndi: “Bo abisa oyuha Moyize bla awobi a mbari e Ndziami, si na mvuuru onyusaha mpili akui, ma odze mpili e bo, bo ma aka yalaha ni.»

Currently Selected:

Luc 16: MDT

Highlight

Copy