Luuka 2

Apaapwe hwa Yeesu ʉKilisiti

(Mataayo 1:18-25)

1Mu habhaazyo haala ʉYoohani ha‑ahapapwilwe, ʉKayisali#2:1 ʉKayisali Bhaazya izwi Kayisali hu Ngalulanyo ɨyɨ Mazwi aMajenu hu malishilo wɨ shitaabu ɨshi. ʉAgusito ʉmwɨnɨ ʉnʼgoosi ʉwa Bhaluumi#2:1 ʉmwɨnɨ ʉnʼgoosi ʉwa Bhaluumi Mu habhaazyo haala ɨnsi ɨnyinji zyahali mu nyoobhe zyɨ wumwɨnɨ ʉwɨ Shiluumi, hwa huje yope ɨnsi ɨyɨ Izilaeeli yahali mu wumwɨnɨ ʉwo. ahalajiziizye huje, abhantu bhonti mu nsi zya‑ahalongozyaga, amataawa gaabho gasimbwe.#2:1 amataawa gaabho gasimbwe Ʉmwɨnɨ ʉAgusito ahalajiziizye ɨsho huje, hubhe hupʉpʉʉsu amanye bha bhahwanziwa asombe ɨsonko mu longozi waakwe. 2Ɨmbaazyo ya bhantu ɨyo yahali ya hwande mu wumwɨnɨ ʉwa Bhaluumi. Yahabhombɨɨshe hu habhaazyo ɨho ʉKileniyo lwa‑ahalongozyaga ʉmukowa ʉgwɨ Siiliya. 3Ɨpo abhantu bhonti bhahabhalaga huje, amataawa gaabho gasimbwe mu mabooma, ʉhwo hwa shahafumiiye ɨshikholo shaabho.

4ɄYoosefu ahali wɨ shikholo ɨsha Daudi. Ɨshikholo shaakwe shahafumiiye hwi‑ibooma ɨlyɨ Beseleheemu. Hu nongwa ɨyo, ʉYoosefu wope ahasogola mwi‑ibooma ɨlyɨ Nazaleeti lya lyahali mu mukowa ʉgwɨ Galilaaya. Ahabhala hwi‑ibooma ɨlyɨ Beseleheemu lya lyahali mu mukowa ʉgwɨ Yudeeya. 5Ahabhalile asimbe amataawa peeka nʉ Maliya ʉyo ahanʼzinjiiye. Hu habhaazyo ɨho, ʉMaliya ahali nʉ lwanda. 6Lwa bhali ʉhwo hwi‑ibooma ɨlyɨ Beseleheemu, isiku ɨlya‑apaape lyahafiha. 7Ahapaapa ʉmwana ʉwa hwande ʉwɨ shilume, ahanʼkwatizya amenda aga mwana ʉmwela. Ahanʼgonia mwi‑igoma ɨlya‑alɨle ɨngʼombe hu nongwa ya‑aje, saga pahalɨɨho apa‑agone abheene, pɨpo ɨnyumba ɨzya bhajenu zyahamemile abhantu.

Abhadiimi bhahwambɨɨlɨla ɨnongwa ɨzya‑apaapwe hwa Yeesu

8Ahabhaazyo ɨho, mu pɨɨpɨ mwi‑ibooma ɨlyɨ Beseleheemu bhahalɨɨho abhadiimi bha bhahalɨndɨlɨlaga ɨngoole zyabho nʉsiku hu diimilo. 9Ɨpo ʉnʼtumi wa Mwɨnɨ ʉNgʉlʉbhɨ ahabhaloleshela. Ʉlukhozyo ʉluzelu tee afume hwa Mwɨnɨ ʉNgʉlʉbhɨ lwahabhakhozya ɨmbali zyonti, bhahabha nʉ wooga tee. 10Ɨpo ʉnʼtumi ahabhabhʉʉzya ahaga, “Musahabhe nʉ wooga! Enyi, ɨmbaletɨɨye ɨnongwa ɨnyinza zya zinza hubhapeelaje abhantu bhonti ʉluseshelo ʉlugoosi. 11Asanyʉʉnʉ mwi‑ibooma ɨlyɨ Beseleheemu mwa‑ahapapwilwe ʉmwɨnɨ ʉDaudi, apapwilwe ʉMʼfyʉli#2:11 ʉMʼfyʉli Mu njango ɨyɨ Shiyunaani ɨsimbwilwe huje, Kilisiti, mu njango ɨyɨ Shiebulaniya bhayiga, Meesiya. ABhayahuudi bhahaliyangaga itaawa lya Meesiya huje, muntu ʉyo ʉNgʉlʉbhɨ anʼsaluuye abhe Mʼfyʉli. Bhaazya izwi Kilisiti hu Ngalulanyo ɨyɨ Mazwi aMajenu hu malishilo wɨ shitaabu ɨshi. hu nongwa yeenyu. Ʉyo yʉ Kilisiti, ʉMwɨnɨ. 12Ɨshi shimanyishizyo sheenyu ɨsha humʼmanye. Munza humʼmwaje ʉmwana ʉmwela, bhanʼkwatiziizye amenda agɨ waana ʉweela, agonile mwi‑igoma ɨlya‑alɨle ɨngʼombe.”

13Lubhilo lwene, ɨmpʉga ɨngoosi ɨya bhantumi afume hu mwanya yahabhʉngaana nʉ nʼtumi ʉyo, bhahanʼsalifyaga ʉNgʉlʉbhɨ bhahagaga,

14“Ayɨmɨhwaje ʉNgʉlʉbhɨ ʉwa hu mwanya,

wope ʉtengaanu wubhe mu nsi

na hwa bhantu ɨbho ʉNgʉlʉbhɨ akhondeziiwe nabho.”

15Abhantumi bhaala lwa bhasogola aweele hu mwanya, ɨpo abhadiimi bhahayanganaga huje, “Ɨshi saali, tibhale hu Beseleheemu. Teenye lya libhombɨɨshe ɨlyo ʉMwɨnɨ ʉNgʉlʉbhɨ lya‑atibhʉzɨɨzye.” 16Ɨpo bhahabhala lubhilo hwi‑ibooma ɨlyɨ Beseleheemu. Lwa bhaafiha paala, bhahamʼmwaga ʉMaliya nʉ Yoosefu, nʉ mwana ʉmwela agonile mwi‑igoma ɨlya‑alɨle ɨngʼombe. 17Lwa bhamʼmwenya ʉmwana ʉyo, bhahabhabhʉʉzya abhantu ɨnongwa ɨzyo ʉnʼtumi zya‑ahabhabhʉzɨɨzye hu nongwa ya mwana ʉyo. 18Bhonti bha bhahʉmvwɨzye ɨnongwa ɨzyo abhadiimi bhaala bhahabhabhʉzɨɨzye, bhahaswiga. 19Leelo ʉmwene ʉMaliya ahazibhɨɨha mu mwoyo gwakwe ɨzyo zyonti, nantele ahazisɨbhɨlɨlaga tee. 20Pamandɨ abhadiimi bhaala bhahaweela sha bhahumʼmwamiha na hunʼsalifye ʉNgʉlʉbhɨ hu zyonti zya bhahʉmvwɨzye na huzilole. Bhahabhombile ɨsho, pɨpo bhahazyajile zili shishiila nanshi ʉnʼtumi sha‑ahabhabhʉzɨɨzye.

Bhahunʼtwala ʉYeesu hu nyumba ɨmfinjile ɨya Ngʉlʉbhɨ

21Lwa lyafiha isiku ɨlya naana afume ʉmwana lwa wapaapwa, ahabhaazyo aha hunʼtende ɨngoola ɨya hwitagaalila ɨyɨ lume hahafiha, bhahamʼpeela itaawa huje yʉ Yeesu. Itaawa ɨlyo ʉnʼtumi ahamʼpiiye ʉnyina waakwe sha‑asɨɨle abhe nʉ lwanda.

22Ahabhaazyo aha Yoosefu nʉ Maliya ahwizelufye lwa haafiha, bhahabhala nʉ mwana hwi‑ibooma ɨlyɨ Yelusaleemu#2:22 Yelusaleemu Bhaazya izwi Yelusaleemu hu Ngalulanyo ɨyɨ Mazwi aMajenu hu malishilo wɨ shitaabu ɨshi. mu lubhaga lwɨ nyumba ɨmfinjile ɨya Ngʉlʉbhɨ huje, bhamʼmɨɨshe mʼfinjile hwa Mwɨnɨ ʉNgʉlʉbhɨ. Bhahabhombile ɨsho, nanshi ʉMwɨnɨ ʉNgʉlʉbhɨ sha‑ahalajiziizye mu ndajizyo zya Moose.#2:22 Moose Bhaazya izwi Moose hu Ngalulanyo ɨyɨ Mazwi aMajenu hu malishilo wɨ shitaabu ɨshi. 23Mu ndajizyo ɨzyo, yahasimbwilwe huje, “Ʉmwana wowonti ʉwɨ shilume ʉwa hwande bhamʼmɨɨhaje huje, abhe mʼfinjile hwa Mwɨnɨ ʉNgʉlʉbhɨ.”#Bhaazya Afume 13:2, 12, 15. 24Nantele, mu ndajizyo ɨzyo, yahasimbwilwe huje, abhapaafi bhabhalaje afumye ɨnsangu,#2:24 ɨnsangu Bhaazya izwi Nsangu hu Ngalulanyo ɨyɨ Mazwi aMajenu hu malishilo wɨ shitaabu ɨshi. ɨnjɨbha zibhɨɨlɨ awe ɨnyaana nkʉnda zibhɨɨlɨ. Ɨsho sha shɨɨsho ʉMaliya nʉ Yoosefu sha bhahabhombile.#Bhaazya ɨMbombo ɨzya Bhalaawi 12:6-8.

Ʉkuwi wa Siimoni

25Hu habhaazyo ɨho hu Yelusaleemu, ahalɨɨho ʉmuntu ʉmo ya bhahagaga Siimoni. Ʉmuntu ʉyo ahali nʼgolosu, ahalongozewaaga nʉ Mʼpepo ʉMʼfinjile, nantele ahanʼtinihaga ʉNgʉlʉbhɨ. Ʉmwene ahasʉbhɨlaga ahwɨnze hwakwe ʉyo ahayihubhafyʉla aBhaizilaeeli. 26ɄMʼpepo ʉMʼfinjile ahamʼmanyiziizye huje, saga anza‑afwe sinta hunʼnole ʉMʼfyʉli wa Mwɨnɨ ʉNgʉlʉbhɨ.

27Isiku limo, ʉMʼpepo ʉMʼfinjile ahanʼnongozya ʉSiimoni atʉʉshe mu lubhaga lwɨ nyumba ɨmfinjile ɨya Ngʉlʉbhɨ. Ɨshi, lyahali lisiku liliila ʉYoosefu nʉ Maliya lya bhahanʼtwalile ʉYeesu mu lubhaga ʉlwo huje, bhafumye ɨnsangu na humʼmɨɨshe mʼfinjile hwa Mwɨnɨ ʉNgʉlʉbhɨ, nanshi sha zyahalajizyaga ɨndajizyo. 28Ɨshi lwa bhatʉʉha lwene, ʉSiimoni ahamʼmwega ʉmwana ʉla, ahamʼpagatila, ahanʼsalifya ʉNgʉlʉbhɨ ahaga,

29“Ɨshi, Mwɨnɨ waanɨ, ɨhulaabha ʉnɨtɨshɨle nɨmʼmomvi waaho huje,

ɨmbale atʉʉye hwi‑ilongo hu tengaanu

hu nongwa ya‑aje, wabhomba zya wahambʉzɨɨzye.

30Amaaso gaanɨ ganʼnolile ʉMʼfyʉli,

31ʉyo wahamʼmɨɨshɨle abhe Mʼfyʉli wa bhantu abhɨ nsi zyonti.

32Ʉnʉ ahayibha lukhozyo ʉlwa hubhalolesyezye abhantu huje,

aawe we Ngʉlʉbhɨ hwa bhantu bha saga Bhaizilaeeli.

Nantele ahayileetaga ʉmwamu hwa bhantu bhaaho aBhaizilaeeli.”

33Ʉyise nʉ nyina wa Yeesu bhahaswigaga ɨzyo zya‑ahayangaga ʉSiimoni hwa mwana. 34Ɨpo ʉSiimoni ahabhasaya. Nantele ahamʼmʉʉzya ʉMaliya ahaga, “Ʉmwana ʉnʉ abhɨhwɨlwe nʉ Ngʉlʉbhɨ hu nongwa ya bhantu abhinji hu nsi ɨyɨ Izilaeeli. Abhantu bha bhahayihunʼkhaana bhahayiteega, leelo bha bhahayihumʼmwɨtɨha bhahayifyʉlwa. Ʉmwene ahayibha shimanyishizyo, leelo abhantu abhinji bhahayihunʼkhaana. 35Ɨshi, ɨnsɨɨbho ɨzya mu mooyo gaabho zyahayibha pa pazelu. Nawe wahayivwalala tee mu mwoyo gwaho, nanshi ʉlasiilwe nɨ mpalala.”

Ʉkuwi wa Hana

36Nantele, ahalɨɨho ʉnʼshɨ ʉmo ʉnʼkuwi wa‑ahali nʼgogolo tee, wa bhahagaga Hana. Ahali mwalɨ wa Fanueli afume mu shikholo ɨsha Aasheli. ɄHana nʉ nʼnume waakwe bhahali bhakhɨɨye amaaha pʉnga (7) afume ahwegane. Lwa bhaakhala amaaha ɨgo, ʉnʼnume waakwe ahafwa. 37Ahabha mʼfwɨle, ahafisya amaaha amashʉmi naana na ganɨ. Ahabhaazyo honti ahabhanga mu lubhaga lwɨ nyumba ɨmfinjile ɨya Ngʉlʉbhɨ, ahamʼpuutaga pasanya na nʉsiku hwi‑idala ɨlya hunʼnaabhe na hwiyiime alye. 38ɄSiimoni lwa‑ayanga nʉ Yoosefu nʉ Maliya, ʉHana ahɨmɨlɨɨye pa pɨɨpɨ lwene. Ɨpo ahanda hunʼsalifye ʉNgʉlʉbhɨ hu nongwa ya mwana ʉYeesu. Ahamamaga ɨnongwa ɨzya mwana ʉyo hwa bhantu bhonti bha bhahasʉbhɨlaga huje, ʉNgʉlʉbhɨ ahayihubhafyʉla aBhaizilaeeli.#2:38 ahayihubhafyʉla aBhaizilaeeli Mu njango ɨyɨ Shiyunaani ɨsimbwilwe huje, ahayifyʉla Yelusaleemu.

39ɄYoosefu nʉ Maliya lwa bhaamala abhombe zyonti, nanshi sha zyahali mu ndajizyo zya Mwɨnɨ ʉNgʉlʉbhɨ, bhahaweela hu khaaya yaabho ya yahali mwi‑ibooma ɨlyɨ Nazaleeti hu mukowa ʉgwɨ Galilaaya. 40Wope ʉmwana ahonjeelela akule, ahonjela abhe ni‑ikhone nɨ njeele, yope ɨmpyana ya Ngʉlʉbhɨ yahali peeka nawo.

ɄYeesu mu lubhaga lwɨ nyumba ɨmfinjile ɨya Ngʉlʉbhɨ

41Abhapaafi bha Yeesu bhahabhalaga shila mwaha hwi‑ibooma ɨlyɨ Yelusaleemu hu habhaazyo ahɨ shikulukulu ɨshɨ Paasaka.#2:41 shikulukulu ɨshɨ Paasaka Bhaazya izwi Paasaka hu Ngalulanyo ɨyɨ Mazwi aMajenu hu malishilo wɨ shitaabu ɨshi. 42ɄYeesu lwa‑ali na maaha ishʉmi na gabhɨɨlɨ, ahabhala na bhapaafi bhaakwe hu Yelusaleemu hu shikulukulu ɨshɨ Paasaka, nanshi amiiho gaabho sha gahali. 43Ɨnsiku ɨzyɨ shikulukulu ɨshɨ Paasaka lwa zyamaliha, abhapaafi bhaakwe bhahanda aweele hu khaaya. Saga bhahamɨɨnye huje, ʉmwana ʉYeesu asyalile hwi‑ibooma ɨlyɨ Yelusaleemu. 44Lwa bhaweela hu khaaya, bhahasɨɨbhaga huje, bhali peeka nʉ Yeesu mu mpʉga, bhahashʉʉla isiku lyonti. Ɨpo bhahanda humʼmwanze mu bhaholo na mu bhamwabho, 45leelo saga bhahamʼmwaga. Ɨpo bhahaweela hu Yelusaleemu humʼmwanze.

46Lwa zyahashila ɨnsiku zitaatu, bhahamʼmwaga mu lubhaga lwɨ nyumba ɨmfinjile ɨya Ngʉlʉbhɨ, akhɨɨye. Ahakhɨɨye peeka na bhamanyizyi abhɨ ndajizyo zya Moose, ahabhatejelezyaga na hubhabhʉzɨɨlɨzye amabhʉzɨɨlɨzyo. 47Bhonti bha bhahʉmvwaga amazwi gaakwe, bhahaswigaga tee hu manyiihanyi na magamulo gaakwe. 48Abhapaafi bhaakwe lwa bhanʼnola, bhahaswiga tee. Ɨpo ʉMaliya ʉnyina waakwe ahamʼmʉʉzya ahaga, “Mwana waanɨ, yeenu watibhomba ɨsho? Enya! Anɨ nʉ yise waaho tayɨmba tee huhwanze.” 49ɄYeesu ahabhaamula ahaga, “Yeenu muhunanza? Saga mwahamɨɨnye huje, anɨ ɨhwanziwa abhe mu nyumba ya Yise waanɨ?”#2:49 ɄYise waanɨ hwa huje, ʉNgʉlʉbhɨ ʉwa hu mwanya. 50Leelo abhapaafi bhaakwe saga bhahazyaganya ɨzyo ʉYeesu zya‑ahabhabhʉʉzya.

51Ɨpo ahaweela na bhapaafi bhaakwe hwi‑ibooma ɨlyɨ Nazaleeti, nantele ahabhatinihaga. Ʉnyina waakwe ahazibhɨɨha mu mwoyo gwakwe ɨzyo zyonti, nantele ahazisɨbhɨlɨlaga tee. 52ɄYeesu ahonjeelela akule ʉmʼbɨlɨ nɨ njeele, nantele ahanʼkhondezyaga ʉNgʉlʉbhɨ na bhantu.

Currently Selected:

Luuka 2: SBK

Highlight

Copy