Luuka 1

Amazwi aga hwande

1Huliiwe wɨ nshɨnshɨ Tiyofiilo. Abhantu abhinji bhasimbile ɨnongwa ɨzya Yeesu ʉKilisiti,#1:1 ɄKilisiti hwa huje ʉmuntu ʉyo ʉNgʉlʉbhɨ anʼsaluuye abhe Mʼfyʉli. Bhaazya izwi Kilisiti hu Ngalulanyo ɨyɨ Mazwi aMajenu hu malishilo wɨ shitaabu ɨshi. nanshi sha zyahabhombɨɨshe huliitɨ. 2Bhasimbile ɨnongwa ɨzi, nanshi sha bhatibhʉzɨɨzye bhaala bha bhahalolile na maaso gaabho na huzilʉmbɨɨlɨle afume hu wandilo waakwe. 3Ɨshi, nanɨ nahabhʉzɨlɨzɨɨzye na‑asimishizye shinza afume hu wandilo huje, ɨnongwa ɨzya Yeesu ɨzi, zyɨ lyoli. Hu nongwa ɨyo, naalola huje shinza ɨʼsimbile zyonti ɨzi mu bhambo. 4Ɨʼsimbiiye ɨzi huje, ʉmanye ɨlyoli ɨzyɨ nongwa ɨzyo zyʉ‑ʉmanyiziiwe.

Ʉkuwi ʉwa‑apaapwe hwa Yoohani ʉMwozi

5Hu habhaazyo ɨho ʉHeloode ʉNʼgoosi#1:5 ʉHeloode ʉNʼgoosi Bhaazya izwi Heloode hu Ngalulanyo ɨyɨ Mazwi aMajenu hu malishilo wɨ shitaabu ɨshi. lwa‑ali mwɨnɨ hu Yudeeya, ahalɨɨho ʉnʼsayi ʉmo wa Ngʉlʉbhɨ ya bhahagaga Zakaliya, afume mu mpʉga ɨya bhasayi ɨya Abiya. Ʉnʼshɨ waakwe bhahagaga Elizabeeti, ahafumile mu shikholo ɨsha bhasayi ɨsha Aaloni.#1:5 ɄAaloni ahali nʼsayi nʼgoosi ʉwa hwande. Bhaazya Afume 28:1-3. Nantele, bhaazya izw Bhasayi bha Ngʉlʉbhɨ hu Ngalulanyo ɨyɨ Mazwi aMajenu hu malishilo wɨ shitaabu ɨshi. 6ɄZakaliya nʉ Elizabeeti bhahali bhagolosu pa maaso ga Ngʉlʉbhɨ, bhahalondolezyaga tee ɨndajizyo zya Mwɨnɨ ʉNgʉlʉbhɨ zyonti sinta mbuno. 7Saga bhahali na bhaana hu nongwa ya‑aje, ʉElizabeeti ahali nʼgʉmba, nantele bhahali bhagogolo.

8-9Hwahali na miiho aga‑atʉʉshe abhombe ɨmbombo aPafinjile mu nyumba ɨmfinjile ɨya Ngʉlʉbhɨ.#1:8-9 nyumba ɨmfinjile ɨya Ngʉlʉbhɨ Bhaazya izwi Nyumba ɨmfinjile ɨya Ngʉlʉbhɨ hu Ngalulanyo ɨyɨ Mazwi aMajenu hu malishilo wɨ shitaabu ɨshi. Ɨshi, mu miiho ɨgo, hahafiha ahabhaazyo ahɨ mpʉga ɨya Abiya aha‑abhombe ɨmbombo mu nyumba ɨmfinjile ɨya Ngʉlʉbhɨ. Isiku limo abhasayi, nanshi sha gahali amiiho gaabho, bhahaduunya ɨnduunya.#1:8-9 bhahaduunya ɨnduunya ABhayahuudi bhahasimbaga amataawa ga bhantu mu mawe amadoodo, na‑abhɨɨshe gonti mu lwɨndɨ. Bhahayinzanyaaga afishe iwe lyeka lifume na‑alagale pa nsi. Ʉmuntu ʉyo iwe lili ni‑itaawa lyakwe lyatala afume, wa bhahagaga ashilile. Ɨnduunya yahanʼgwɨla ʉZakaliya atʉʉshe mu nyumba ɨmfinjile ɨya Ngʉlʉbhɨ, nka‑asushizye pa shipuuto ɨvintu vya vinunshila ʉnunsi ʉwinza. 10Hu habhaazyo ɨho ahali muuhati asushizye, abhantu abhinji bhahali mu lubhaga lwɨ nyumba ɨmfinjile ɨya Ngʉlʉbhɨ, bhahapuutaga.

11Ɨpo ʉnʼtumi wa Mwɨnɨ ʉNgʉlʉbhɨ ahanʼnoleshela ʉZakaliya. Ʉnʼtumi ʉyo ahɨmɨɨlɨla hunshɨnjɨ ɨya hu lɨɨlo pa shipuuto ɨsha‑asushizye. 12ɄZakaliya lwa wanʼnola ʉnʼtumi,#1:12 ʉnʼtumi Bhaazya izwi Bhantumi hu Ngalulanyo ɨyɨ Mazwi aMajenu hu malishilo wɨ shitaabu ɨshi. ʉwooga wahanʼkhata tee. 13Leelo ʉnʼtumi ʉla ahamʼmʉʉzya ahaga, “Zakaliya, ʉgandi ahwogope! ɄNgʉlʉbhɨ ayʉmvwɨzye ɨmpuuto zyaho. Ʉnʼshɨ waaho ʉElizabeeti ahayihupaapila ʉmwana. Ʉmwana ʉyo wahayihumʼpeela itaawa ɨlya Yoohani. 14Ɨpo wahayibha nʉ luseshelo ʉlugoosi tee, nantele abhantu abhinji bhahayisha lwa wapaapwa ʉmwana, 15pɨpo ahayibha muntu nʼgoosi pa maaso ga Mwɨnɨ ʉNgʉlʉbhɨ. Ʉmwana ʉyo saga ahwanziwa amwele ɨdivaayi#1:15 Ɨdivaayi shimwelo sha bhalɨngaanya afume mu zabiibu, nantele shahamanyiishe hwa Bhayahuudi. Ɨdivaayi lwa yaalʉla, ɨbha nanshi ɨhombwa shɨ‑ɨli. Bhaazya izwi Divaayi hu Ngalulanyo ɨyɨ Mazwi aMajenu hu malishilo wɨ shitaabu ɨshi. awe hohonti ha hagamʼmɨɨha huje akholwe. Nantele ahayilongozewaaga nʉ Mʼpepo ʉMʼfinjile#1:15 Mʼpepo ʉMʼfinjile Bhaazya izwi Mʼpepo ʉMʼfinjile hu Ngalulanyo ɨyɨ Mazwi aMajenu hu malishilo wɨ shitaabu ɨshi. afume hu habhaazyo lwa‑ali mu vyanda mwa nyina waakwe. 16Ahayihubhagalusya aBhaizilaeeli abhinji hwa Mwɨnɨ ʉNgʉlʉbhɨ, ʉNgʉlʉbhɨ waabho. 17Nantele ahayihunʼtagaalila ʉMwɨnɨ,#1:17 ʉMwɨnɨ Ɨpa ɨbhonesya ʉYeesu ʉKilisiti. ahayibha ni‑ikhone nʉ mwoyo nanshi sha‑ahali ʉnʼkuwi wa Ngʉlʉbhɨ ʉwɨ mandɨ ʉEliya.#1:17 ɄEliya ahali nʼkuwi wa Ngʉlʉbhɨ ʉwɨ mandɨ wa‑ahafumiiye hu habhaazyo aha bhamwɨnɨ abha hu nsi ɨyɨ Izilaeeli. Bhaazya 1 aBhamwɨnɨ 17-2 aBhamwɨnɨ 2. ABhayahuudi bhahasʉbhɨlaga huje, ahayɨnza nantele ʉnʼkuwi wa Ngʉlʉbhɨ ʉEliya, alɨngaanye ahwɨnze hwa Kilisiti. Bhaazya Malaaki 4:5-6. Ʉmwene ʉYoohani ahayileeta ʉlwʉmvwano hwa bhapaafi na bhaana bhaabho, nantele ahayihubhaweezezya abhabhomba mbiibhi ʉgolosu ʉwɨ mooyo. Ahayibhomba ɨgo gonti huje, abhalɨngaanye abhantu humʼmwambɨɨlɨle ʉMwɨnɨ.”

18Ɨpo ʉZakaliya ahamʼmʉʉzya ʉnʼtumi huje, “Ɨshi, anɨ nʉ nʼshɨ waanɨ tili bhagogolo. Wɨlɨ, hantu heenu ha haganaavwa amanye huje, amazwi ɨga gɨ lyoli?” 19Ʉnʼtumi ahamʼmwamula ahaga, “Anɨ nɨ Gabiliyeeli wɨ‑ɨhwɨmɨɨlɨla pa maaso ga Ngʉlʉbhɨ. Yʉʉyo wa‑ahansonteleziizye anɨ ahubhʉʉzye aawe ɨnongwa ɨnyinza ɨzi. 20Ɨshi, tejeelezya! Ʉnza‑abhe mʼbwibwi hu nongwa ya‑aje, saga wɨɨtɨha ɨnongwa zyɨ‑ɨʼbhʉzɨɨzye. Saga ʉnza‑ayanje afishe isiku lwa‑ahayipaapwa ʉmwana. Ɨzyo zyonti zyahayibhombeha, ahabhaazyo haakwe lwa haafiha!”

21Ahabhaazyo hahaala, abhantu bhaala bha bhahali mu lubhaga lwɨ nyumba ɨmfinjile ɨya Ngʉlʉbhɨ, bhahanʼgʉlɨlaga ʉZakaliya. Ɨpo bhahaswiga hu nongwa ya‑aje, ʉZakaliya wakhaabha tee mu nyumba ɨmfinjile ɨya Ngʉlʉbhɨ. 22Lwa‑afuma mu nyumba ɨyo, ahapootwa ayanje nabho. Ʉmwene ahalolesyaga nɨ nyoobhe zya‑ahwanza ayanje. Ɨpo abheene bhahamanya lwene huje, ʉNgʉlʉbhɨ anʼnolesiizye ɨndoleshelo#1:22 ɨndoleshelo Bhaazya izwi Ndoleshelo hu Ngalulanyo ɨyɨ Mazwi aMajenu hu malishilo wɨ shitaabu ɨshi. lwa‑ali mu nyumba ɨmfinjile. Ahajendeelela shɨɨsho abhe mʼbwibwi. 23Ɨnsiku zyakwe ɨzya‑abhombe ɨmbombo ɨzyɨ shisayi lwa zyamaliha, ahaweela hu khaaya.

24Pamandɨ ʉnʼshɨ waakwe ʉElizabeeti ahabha nʉ lwanda, ahabha ahwʉbha mu nyumba hu habhaazyo ahɨ meezi gasaanu. Ahahwiyangaga yʉʉyo aje, 25“Ɨli lya‑ambombɨɨye anɨ ʉMwɨnɨ ʉNgʉlʉbhɨ, lyɨ nkʉmbʉ. Andolile na hunefwezye ɨnsoni pa maaso ga bhantu.”

Ʉkuwi ʉwa‑apaapwe ʉKilisiti

26Lwa gwafiha ʉmwezi ʉgwa nʼtanda ʉElizabeeti lwa‑ali nʉ lwanda, ʉNgʉlʉbhɨ ahanʼsonteelezya ʉnʼtumi ʉGabiliyeeli hwi‑ibooma ɨlyɨ Nazaleeti, hu mukowa ʉgwɨ Galilaaya.#1:26 Galilaaya Bhaazya izwi Galilaaya hu Ngalulanyo ɨyɨ Mazwi aMajenu hu malishilo wɨ shitaabu ɨshi. 27Ahabhala hwa nʼnɨndu ʉnʼduvya ya bhahagaga Maliya. Ʉnʼnɨndu ʉyo ahazinjiliilwe nʉ nʼsahaala ʉmo wa bhahagaga Yoosefu, ʉwa mu shikholo ɨsha mwɨnɨ ʉDaudi.#1:27 ʉDaudi Bhaazya izwi Daudi hu Ngalulanyo ɨyɨ Mazwi aMajenu hu malishilo wɨ shitaabu ɨshi. 28Ʉnʼtumi lwa waafiha hwa Maliya, ahaga, “Mwagona, aawe wʉ‑ʉsayiiwe tee! ɄMwɨnɨ ʉNgʉlʉbhɨ ali naawe.”

29ɄMaliya lwa wʉmvwa amazwi ɨgo aga nʼtumi, ahaswiga tee mu mwoyo. Ahahwibhʉzɨlɨzyaga huje, “Ɨndamushizyo ɨzi hwa huje wɨlɨ?” 30Ɨpo ʉnʼtumi ahaga, “Maliya, ʉgandi ahwogope, pɨpo ʉNgʉlʉbhɨ apiiye ɨmpyana. 31Enya, ʉbhala‑abhe nʉ lwanda, wahayipaapa ʉmwana ʉwɨ shilume. Wahayihumʼpeela itaawa lyakwe, abhe yʉ Yeesu. 32Ʉmwana ʉyo ahayibha nʼgoosi. Nantele, itaawa lyakwe bhahayihunʼkwizyaga huje, Mwana wa Ngʉlʉbhɨ wa‑ali Nʼgoosi hu vintu vyonti. ɄMwɨnɨ ʉNgʉlʉbhɨ ahayihumʼmɨɨha abhe Mwɨnɨ, nanshi sha‑ahali ʉmwɨnɨ ʉDaudi ʉmaama waakwe. 33Nantele, ahayihubhalongozyaga aBhaizilaeeli#1:33 aBhaizilaeeli Mu njango ɨyɨ Shiyunaani ɨsimbwilwe huje, ɨnyumba ya Yaakobo. ɨnsiku zyonti. Ʉwumwɨnɨ waakwe saga wahayibha nʉ malishilo.”#Bhaazya 2 Samweli 7:13, 16; Yesaaya 9:7; Daniyeeli 7:14.

34ɄMaliya ahamʼmʉzɨɨlɨzya ʉnʼtumi ahaga, “Anɨ ɨndi nʼduvya. Ɨshi, ɨzi zinza‑abhe wɨlɨ?” 35Ʉnʼtumi ahamʼmwamula ahaga, “ɄMʼpepo ʉMʼfinjile ahayihuhwishila hwi‑ikhone lya Ngʉlʉbhɨ wa‑ali Nʼgoosi hu vintu vyonti na hukwinshile nanshi izyʉngʉʉzi. Ɨshi, ʉmwana ʉyo ya wahayipaapa, ahayibha mʼfinjile, ʉyo bhahayihunʼkwizyaga Mwana wa Ngʉlʉbhɨ.#1:35 Mwana wa Ngʉlʉbhɨ Bhaazya izwi Mwana wa Ngʉlʉbhɨ hu Ngalulanyo ɨyɨ Mazwi aMajenu hu malishilo wɨ shitaabu ɨshi. 36Nantele, enya! Ʉholo waaho ʉElizabeeti wa bhahagaga nʼgʉmba, wope ali nʉ lwanda ʉlwɨ meezi nʼtanda mu gogolo waakwe, 37pɨpo nahamo ahantu hohonti ha hagamʼmena ʉNgʉlʉbhɨ.” 38Ɨpo ʉMaliya ahaga, “Enya, anɨ ɨndi mʼmomvi wa Mwɨnɨ ʉNgʉlʉbhɨ. Ɨshi zibhe shɨɨsho huliinɨ nanshi sha wayanga.” Ɨpo ʉnʼtumi ahasogola.

ɄMaliya abhala hunʼnamushe ʉElizabeeti

39Lwa zyashila ɨnsiku nyishe, ʉMaliya ahasogola, ahakhalaganya abhale hwi‑ibooma limo lya lyahali mu nsi ɨya hu magamba aga hu Yudeeya. 40Lwa waafiha ʉhwo, ahatʉʉha mu nyumba ya Zakaliya, ahanʼnamuha ʉElizabeeti. 41ɄElizabeeti lwa‑ahwʉmvwa ɨndamuho ya Maliya, ʉmwana ahashima mu vyanda vyakwe. Ɨpo ʉElizabeeti sha‑alongozewa nʉ Mʼpepo ʉMʼfinjile, 42ahayanga hwi‑izwi igoosi ahaga, “Ʉsayiiwe aawe ashile abhashɨ bhonti, nantele asayiiwe nʉ mwana ʉyo wa wahayihumʼpaapa. 43Anɨ nɨ naanu huje, ʉnɨnzɨle aawe wʉnyina wa Mwɨnɨ waanɨ?#1:43 Mwɨnɨ waanɨ Ɨpa ɨbhonesya huje yʉ Mʼfyʉli. 44Lwʉnʉʉlwo lwa nʉmvwa ɨndamuho yaaho, ʉmwana ahashima mu vyanda vyanɨ hu nseho. 45Ʉsayiiwe aawe wʉ‑ʉzyɨtɨɨshe ɨzyo ʉMwɨnɨ ʉNgʉlʉbhɨ zya‑aʼbhʉzɨɨzye huje, zibhala‑abhombeshe.”

Ʉluteelo lwa Maliya ʉlwɨ nsalifyo hwa Ngʉlʉbhɨ

46Ɨpo ʉMaliya ahaga,

“Ʉmwoyo gwanɨ gwonti guhumʼmwamiha ʉMwɨnɨ ʉNgʉlʉbhɨ.

47Nantele ʉmwoyo gwanɨ gusha hu nongwa ya Ngʉlʉbhɨ ʉMʼfyʉli waanɨ,#Bhaazya 1 Tiimoti 2:3; Tiito 2:10; Yuuda 1:25.

48pɨpo anenyiizye anɨ hu nkʉmbʉ nɨmʼmomvi waakwe ʉwa pa nsi tee.

Enya, afume sanyʉʉnʉ abhantu bhonti abhɨ mpaapo zyonti bhahayihunkwizyaga nʼsayiwa.

49ɄNgʉlʉbhɨ ʉwi‑ikhone lyonti ambombɨɨye ɨngoosi ɨzya‑aswijizye,

ʉmwene mʼfinjile.

50Ɨnkʉmbʉ yaakwe yɨ wiila na wiila

hwa bhantu bhonti bha bhahunʼtiniha.

51Ʉnʼkhono gwakwe ʉgwi‑ikhone gubhombile ɨmbombo ɨngoosi,

bha bhali na mashento mu mooyo gaabho, abhanyampɨɨnye.

52Abhefwizye abhagoosi mu longozi waabho ʉwɨ shimwɨnɨ,

na hubhazʉvye bha bhahwiyiisya.

53Abhapiiye bha bhali nɨ nzala ɨvintu ɨvinza ɨvya‑alye,

leelo abhatabhazi abhashɨmbɨzɨɨzye makhoono.

54Abhavwizye abhabhomvi bhaakwe aBhaizilaeeli,

lwa‑ahwizuha ɨnkʉmbʉ yaakwe.

55Abhombile ɨsho, nanshi sha‑ahabhalapiiye abhamaama bheetu,

hwa huje ʉAbulahaamu#1:55 ʉAbulahaamu Bhaazya izwi Abulahaamu hu Ngalulanyo ɨyɨ Mazwi aMajenu hu malishilo wɨ shitaabu ɨshi. nɨ shikholo shaakwe shonti wiila.”#Bhaazya 1 Samweli 2:1-10.

56ɄMaliya ahakhala nʉ Elizabeeti ameezi gataatu ɨshi, pamandɨ ahaweela humwabho.

Apaapwe hwa Yoohani ʉMwozi

57Ahabhaazyo aha‑apaape lwa haafiha, ʉElizabeeti ahapaapa ʉmwana ʉwɨ shilume. 58Abhapalamani na bhaholo bhaakwe lwa bhʉmvwa huje, ʉMwɨnɨ ʉNgʉlʉbhɨ wanʼnolela ɨnkʉmbʉ tee, bhahasha peeka nawo.

59Isiku ɨlya naana afume ʉmwana lwa wapaapwa, bhahɨnza hunʼtende ʉmwana ɨngoola ɨya hwitagaalila ɨyɨ lume.#1:59 hunʼtende ʉmwana ɨngoola ɨya hwitagaalila ɨyɨ lume Hwa Bhayahuudi nkashele ʉmwana ʉwɨ shilume wapaapwa, isiku ɨlya naana afume lwa wapaapwa, bhahanʼtendaga ɨngoola ɨya hwitagaalila ɨyɨ lume. Bhaazya izwi Atende ɨngoola ɨya hwitagaalila ɨyɨ lume hu Ngalulanyo ɨyɨ Mazwi aMajenu hu malishilo wɨ shitaabu ɨshi. Nantele, bhaazya ʉWandilo 17:9-14. Bhahanzaga humʼpeele ʉmwana itaawa lya Zakaliya ʉyise waakwe, 60leelo ʉnyina wa mwana ahabhabhʉʉzya ahaga, “Ndaadi! Itaawa lyakwe abhe yʉ Yoohani.” 61Abheene bhahamʼmʉʉzya bhahaga, “Mu shikholo sheenyu saga alɨɨho ʉmuntu wa‑ali ni‑itaawa nanshi ɨlyo.” 62Ɨpo bhahamʼmʉzɨɨlɨzya ʉZakaliya ʉyise waakwe huje, “Ʉhwanza humʼpeele ʉmwana itaawa abhe yʉ naanu?” 63ɄZakaliya ahalolesya aje, ahwanza ahabampa aha‑asimbile, ahasimba huje, “Itaawa lyakwe abhe yʉ Yoohani.” Abhantu bhonti bhahaswiga. 64Pɨnɨɨpo ʉZakaliya ahanda ayanje nantele, na humʼmwamishe ʉNgʉlʉbhɨ. 65Ɨpo ʉwooga wahabhakhata abhapalamani bhonti abha Zakaliya. Ɨnongwa ɨzyo zyahanyampaana mu nsi yonti ɨya mu magamba aga hu Yudeeya. 66Abhantu bhonti bha bhahʉmvwɨzye ɨnongwa ɨzyo, bhahasɨɨbhaga mu mooyo gaabho huje, “Ʉmwana ʉyo ahayibha nanshi bhʉlɨ bhʉlɨ?” Bhahasɨɨbhaga shɨɨsho hu nongwa ya‑aje, bhahamɨɨnye huje, ikhone lya Mwɨnɨ ʉNgʉlʉbhɨ lyahali peeka nawo.

Ʉluteelo lwa Zakaliya

67Ɨpo ʉZakaliya, ʉyise wa mwana sha‑alongozewa nʉ Mʼpepo ʉMʼfinjile, ahanda akuwe ahaga,

68“Asayiwaaje ʉMwɨnɨ ʉNgʉlʉbhɨ, ʉNgʉlʉbhɨ weetu tiBhaizilaeeli,

hu nongwa ya‑aje, ayɨnzɨle hubhafyʉle abhantu bhaakwe.

69Atipiiye ʉMʼfyʉli ʉwi‑ikhone#1:69 ʉMʼfyʉli ʉwi‑ikhone Mu njango ɨyɨ Shiyunaani ɨsimbwilwe huje, ɨmpeeta ɨyɨ fyʉli. Mu Nsimbo ɨMfinjile, ɨmpeeta ɨyɨ hanu holanyo ya muntu ʉwi‑ikhone igoosi.

afume mu shikholo ɨsha mʼmomvi waakwe ʉDaudi.

70Abhombile nanshi sha‑ahayanjile afume halɨ

ashilile hwa bhakuwi bhaakwe abhafinjile.

71Ahayanjile huje, ahayihutifyʉla hwa bhalʉgʉ bheetu,

na huteefwe mu makhono ga bhantu bhonti bha bhahutiviitilwa.

72Ahayanjile huje, wɨnzaga hubhalolele ɨnkʉmbʉ abhamaama bheetu,

na hwizushe ilagano#1:72 ilagano Bhaazya izwi Ilagano hu Ngalulanyo ɨyɨ Mazwi aMajenu hu malishilo wɨ shitaabu ɨshi. lyakwe ifinjile.#Bhaazya ʉWandilo 17:7; ɨNsalifyo 105:8; 106:45.

73Ahanʼnapiiye ʉAbulahaamu ʉmaama weetu huje, ahayihutaavwa atɨ.

74Ahayihutifyʉla afume mu makhono ga bhalʉgʉ bheetu huje,

timʼmombelaje ʉmwene sinta wooga,

75tibhanje bhasangalusu nantele bhagolosu

mu nsiku zyonti ɨzyɨ wʉʉmi weetu.

76Ɨshi aawe wʉmwana waanɨ,

bhahayihukwizyaga nʼkuwi wa Ngʉlʉbhɨ wa‑ali Nʼgoosi hu vintu vyonti.

Wahayihunʼtagaalila ʉMwɨnɨ,

hunʼnɨnganyizizye idala.

77Wahayihubhabhʉʉzya abhantu bhaakwe huje,

bhahayifyʉlwa hwi‑idala ɨlya‑akhobhoshelwe ɨmbiibhi zyabho.

78ɄNgʉlʉbhɨ weetu wa‑ali nɨ nkʉmbʉ tee huliitɨ,

ʉlukhozyo lwakwe afume hu mwanya lwahayihutilawushila.

79Lwahayihutilawushila tenti ta tili mu hiisi ɨngoosi ɨya‑afwe.#Bhaazya Yesaaya 9:1-2.

Nantele lwahayihutilongozya mwi‑idala ɨlyɨ tengaanu.”

80Ɨpo ʉYoohani ahonjeelela akule, na‑abhe ni‑ikhone igoosi mu mwoyo gwakwe. Ɨshi lwa waakula, ahabhala akhale mu lʉʉgwa afishe lwa haafiha ahabhaazyo aha hwilolesye pa pazelu na hwande hubhalʉmbɨɨlɨle aBhaizilaeeli.

Currently Selected:

Luuka 1: SBK

Highlight

Copy