માર્ક 15

પિલાતુસ નેં હામેં ઇસુ

(મત્તિ 27:1-2,11-14; લુક. 23:1-5; યૂહ. 18:28-38)

1ફટક થાતં હાતેં મુખી યાજકંવેં, અનેં અગુવએં, અનેં મૂસા નું નિયમ હિકાડવા વાળેં અનેં આખી મુટી સભા ન મનખંવેં સલા કરેંનેં ઇસુ નેં બંદાડ્યો, અનેં હેંનેં લેં જાએંનેં પિલાતુસ હાકીમ ન હાથં મ હુંપેં દેંદો. 2પિલાતુસેં ઇસુ નેં પૂસ્યુ, “હું તું યહૂદી મનખં નો રાજા હે?” ઇસુવેં હેંને જવાબ આલ્યો, “તું ઠીક કેં રિયો હે, હૂં હે.” 3મુખી યાજક ઇસુ ઇપેર ઘણી વાતં નો દોષ લગાડતા હેંતા. 4પિલાતુસેં ઇસુ નેં ફેંર પૂસ્યુ, “હું તારી કન કઇ જવાબ નહેં, ભાળ આ તાર ઇપેર કીતરી વાતં નો દોષ લગાડે હે?” 5ઇસુવેં ફેંર કઇ જવાબ નેં આલ્યો. આં તક કે પિલાતુસ ઘણો વિસાર કરતો થાએંજ્યો.

ઇસુ નેં મોત ની સજ્યા

(મત્તિ 27:15-26; લુક. 23:13-25; યૂહ. 18:39-19:16)

6દર વરહેં ફસહ ના તેવાર ન દાડં મ પિલાતુસ હમેશા કઇનાક એક કેદી નેં સુંડ દેંતો હેંતો, ઝેંનેં મનખં સાહતં હેંતં હેંનેં વેયો સુંડ દે. 7હેંનં દાડં મ બરઅબ્બા નામ નો એક માણસ હેંતો, ઝી બીજં હુંમલો કરવા વાળં નેં હાતેં જેલ મ હેંતો, ઝેંનવેં રોમી સરકાર ના વિરુધ મ હુંમલો કરેંનેં અમુક મનખં નેં માર દડ્ય હેંતં. 8ભીડ ન મનખં પિલાતુસ કન આય અનેં હેંનેં કેંદું, “ઝેંવું તું હમારી હારુ કરતો આયો હે હેંવુંસ તું કર.” 9પિલાતુસેં હેંનનેં પૂસ્યુ, “હું તમું સાહો હે કે હૂં તમારી હારુ યહૂદી મનખં ના રાજા નેં સુંડ દું?” 10કેંમકે પિલાતુસ જાણતો હેંતો કે મુખી યાજકંવેં ઇસુ નેં બળતરા થી હવાડ દેંદો હેંતો. 11પુંણ મુખી યાજકંવેં મનખં નેં સુહી સડાય કે વેય પિલાતુસ કન ઇસુ નેં સુંડવા કરતં બરઅબ્બા નેં સુંડ દેંવા ની માંગણી કરે. 12વેયુ હામળેંનેં પિલાતુસેં હેંનનેં પાસું પૂસ્યુ, “તે ઝેંનેં તમું યહૂદી મનખં નો રાજા કો હે, હેંનેં હૂં હું કરું?” 13ભીડ ન મનખં ફેંર સિસાય, “હેંનેં ક્રૂસ ઇપેર સડાવ દો!” 14પિલાતુસેં હેંનનેં કેંદું, કેંમ એંને હું ગુંનો કર્યો હે, પુંણ ભીડ ન મનખં ફેંર વદાર સિસાય, “એંનેં ક્રૂસ ઇપેર સડાવ દો!” 15તર પિલાતુસેં ભીડ ન મનખં નેં ખુશ રાખવા ની આહ થકી બરઅબ્બા નેં હેંનં હારુ સુંડ દેંદો. અનેં ઇસુ નેં કોડા વવાડેંનેં રોમી સેનાનેં હુંપેં દેંદો કે હેંનેં ક્રૂસ ઇપેર સડાવા મ આવે.

સેનિક ઇસુ નો ઠઠ્ઠો કરે હે

(મત્તિ 27:27-31; યૂહ. 19:2-3)

16તર પિલાતુસ ના સેનિક ઇસુ નેં મેલ ના આંગણા મ લેં જ્યા ઝી પ્રીટોરિયુમ કેંવાએ હે. અનેં તાં હેંનવેં બદ્દ સેનિકં ની ટુકડી નેં બુંલાવી. 17તર હેંનવેં ઇસુ નેં જાંબુડી રંગ નો ઝભ્ભો ઇયો નાટક કરવા હારુ પેરાયો ઝેંમ કે વેયો એક રાજા હે અનેં હેંનો ઠઠ્ઠો કરવા મંડ્યા. અનેં હેંનવેં કાટં નો મોંગટ હુંદો બણાયો અનેં રાજા ના રુપ મ હેંનો ઠઠ્ઠો કરવા હારુ હેંના મોંગટ નેં હેંના મુંણકા ઇપેર મેંલ દેંદો. 18તર હેંનવેં હેંનું અવકાર કરવું સલુ કર દેંદું, એંમ વતાડતા જાએંનેં કે વેયા હેંનું માન કરે હે જુંર-જુંર થી સિસાવા મંડ્યા, “હે યહૂદી મનખં ના રાજા નમસ્તે!” 19વેયા ઘડી-ઘડી ઇસુ ના મુંણકા મ પાતળી હુટી વાતા હેંતા, હેંનવેં હેંનું અપમાન કરવા હારુ કીતરી વાર હેંનેં ઇપેર થુંક્યા, અનેં વેયા હીની આરાધના કરવા નું નાટક કરતા જાએંનેં ઢેંસુંણ માંડેંનેં હેંનેં નમસ્કાર કરતા રિયા. 20ઝર વેયા ઇસુ નો ઠઠ્ઠો કરેં સુક્યા, તર હેંનેં ઇપેર હો જાંબુડી રંગ નો ઝભ્ભો કાડેંનેં એંનસ સિસરં પેરાયં. અનેં તર હેંનેં ક્રૂસ ઇપેર સડાવા હારુ સેર મહા બારતં લેં જ્યા.

ઇસુ નેં ક્રૂસ ઇપેર સડાવવો

(મત્તિ 27:32-44; લુક. 23:26-43; યૂહ. 19:17-27)

21ઝર વેયા સેર મહા બારતં જાએં રિયા હેંતા તે શમોન નામ નો એક માણસ ગામડા મહો યરુશલેમ સેર મ આવેં રિયો હેંતો. વેયો કુરેન ગામ નો રેંવાસી હેંતો, અનેં વેયો સિકંદર અનેં રુફૂસ નો બા હેંતો. સેનિકંવેં હેંનેં હોકમ કર્યુ કે વેયો ક્રૂસ નેં તુંકેંનેં હીની જગ્યા તક લેં જાએ ઝાં વેયા ઇસુ નેં ક્રૂસ ઇપેર સડાવહે. 22સેનિક ઇસુ નેં ગુલગુત્તા નામ ની જગ્યા મ લેં જ્યા, ઝેંનો અરથ હે ખોપડી ની જગ્યા. 23તર સેનિકંવેં ઇસુ નેં ગંધરસ નામ ની દવા મળાવેંલો દરાક નો રસ પીવા હારુ આલ્યો એંતરે કે હેંનેં થકી દુખાવો નેં થાએ. પુંણ હેંને હેંનેં પીવા હારુ ના પાડ દેંદું. 24તર હેંનવેં ઇસુ નેં ક્રૂસ ઇપેર સડાયો, અનેં હેંનં સિસરં ઇપેર સિઠ્ઠી નાખેંનેં, કે કેંનેં હું મળે, હેંનવેં વાટ લેંદં. 25હેંના ટાએંમેં હવેંર ના નો વાગ્યા હેંતા, ઝર ઇસુ નેં ક્રૂસ ઇપેર સડાયો. 26સેનિકંવેં એક બોડ માર્યો. હેંના બોડ મ હેંનેં ક્રૂસ ઇપેર સડાવાનું કારણ આલેંલું હેંતું, કે યહૂદી મનખં નો રાજા. 27હેંનવેં ઇસુ નેં હાતેં બે ડાકુવં નેં, એક ઇસુ ની જમણી પાક્તી અનેં એક ડાબી પાક્તી ક્રૂસ ઇપેર સડાયા. 28ઇવી રિતી થી પવિત્ર શાસ્ત્ર નું વેયુ વસન પૂરુ થાએંજ્યુ, ઝી મસીહ ના બારા મ કે હે, હેંનેં એક ગુંનેંગારનેં જેંમ ગણવા મ આવહે. 29અનેં વાટેં જાવા વાળં મુંણકું હલાવેં હલાવેંનેં અનેં એંમ કેં નેં ઇસુ ની નિંદા કરતં હેંતં, “વાહ! મન્દિર નેં પાડવા વાળા અનેં તાંણ દાડં મ બણાવા વાળા! 30ક્રૂસ ઇપેર હો ઉતરેંનેં પુંતાનેં બસાવ લે” 31હીવી રિતી થી મુખી યાજક હુંદા, મૂસા નું નિયમ હિકાડવા વાળા હાતેં, એક બીજા નેં ઠઠ્ઠા મ કેંતા હેંતા, “એંને બીજંનેં બસાય, પુંણ પુંતે નેં બસાવેં સક્યો. 32આ માણસ ઝી ઇસરાએંલ દેશ નો રાજા, મસીહ થાવા નો દાવો કરે હે, હાવુ ક્રૂસ ઇપેર હો ઉતરી આવે કે હમું ભાળજ્યે અનેં હેંનેં ઇપેર વિશ્વાસ કરેં સકજ્યે કે ઇયો હમારો રાજા હે.” અનેં ઝી ઇસુ નેં હાતેં ક્રૂસ ઇપેર સડાવેંલા હેંતા, વેયા હુંદા હીની નિંદા કરતા હેંતા.

ઇસુ નું મોત

(મત્તિ 27:45-56; લુક. 23:44-49; યૂહ. 19:28-30)

33બફોર ના બાર વાગ્યે આખા દેશ મ ઇન્દારું થાએંજ્યુ, અનેં બફોર ના લગ-બગ તાંણ વાગ્યા તક ઇન્દારું થાએંલું રિયુ. 34બફોર ના લગ-બગ તાંણેંક વાગ્યે ઇસુવેં જુંર થી સિસાએં નેં કેંદું, “ઈલોઈ-ઈલોઈ, લમા શબક્તની?” ઝેંનો અરથ એંમ હે, “હે મારા પરમેશ્વર, હે મારા પરમેશ્વર, તેં મનેં હુંકા સુંડ દેંદો?” 35હેંનં મનખં મહં અમુકેં ઝી ઇસુ કન ઇબં હેંતં, હેંનવેં હેંનેં હામળ્યુ, પુંણ હેંનં મનખંવેં એંમ હમજેંનેં “એક-બિજાનેં કેંદું, હામળો વેયો ભવિષ્યવક્તા એલિય્યાહ નેં હરગ થી પુંતાની મદદ હારુ બુંલાવે હે.” 36હેંનં મનખં મહો એક માણસ દોડેંનેં જ્યો અનેં એક રુહ લાયો અનેં હેંનેં દરાક ના ખાટા રસ મ ડબુંળ દેંદું. પસી હેંને રુહ નેં એક પાતળી હુટી ઇપેર પુંએં દેંદું, અનેં ઇસુ ના મોડા કન લેંજ્યો એંતરે કે વેયો હેંનેં મહો વેયો ખાટો રસ સુહેં સકે. અનેં હેંને કેંદું ઇબા રો કઇ નહેં કરો આપડે ભાળવું જુગે કે ભવિષ્યવક્તા એલિય્યાહ એંનેં બસાવા હારુ આવે હે કે નેં. 37તર ઇસુવેં જુંર થી સિસાએં નેં જીવ કાડ દડ્યો. 38અનેં વેયો મુંટો પડદો ઝી મંદિર મ ટાંગેંલો હેંતો, ઝી બદ્દ મનખં નેં પરમેશ્વર ની હાજરી મ ભરાવા થી રુંકતો હેંતો, ઇપેર થી નિસં તક ફાટેંનેં બે ટુકડા થાએંજ્યો. 39એક રોમી સેના નો અધિકારી ઝી ઇસુ નેં હામો ઇબો હેંતો, ઝર હેંને હેંનેં એંમ સિસાએં નેં મરતં ભાળ્યુ, તે હેંને કેંદું, “હાસેં હાસ આ માણસ, પરમેશ્વર નો બેંટો હેંતો!”

40કઇક બજ્યેરેં હુદી સિટી રેંનેં ભાળતી હીતી, હીની બજ્યેરં ના ટુંળા મ મરિયમ હુદી હીતી ઝી મગદલા ગામ ની રેંવાસી હીતી, અનેં સલોમી અનેં મરિયમ ઝી નાના યાકૂબ અનેં યોસેસ ની આઈ હીતી. 41એંનેં થી પેલ ઝર ઇસુવેં ગલીલ પરદેશ મ સ્યારેં બાજુ પરવાસ કર્યો, તે ઇન્યી તાંણ બજ્યેરેં હીની સેવિકા ના રુપ મ હેંનેં હાતેં જાત્યી હીત્યી, અનેં હેંનેં મદદ કરત્યી હીત્યી. અનેં ઘણી બીજી બજ્યેરેં હુદી ગલીલ થી હેંનેં હાતેં યરુશલેમ સેર મ આવજ્યી હીત્યી. વેયે હુદજ્યી સિટી રેંનેં ભાળત્યી હીત્યી.

ઇસુ નેં ડાટવું

(મત્તિ 27:57-61; લુક. 23:50-56; યૂહ. 19:38-42)

42-43યૂસુફ નામ નો એક માણસ હેંતો, ઝી અરિમતિયા ગામ નો રેંવાસી હેંતો. વેયો મુટી સભા મ મુખી માણસ હેંતો, અનેં વેયો પુંતે હુંદો પરમેશ્વર ના રાજ ની વાટ જુંવતો હેંતો. વેયો હિમ્મત કરેંનેં પિલાતુસ હાકીમ કન જ્યો, અનેં ઇસુ ની લાશ માંગી એંતરે કે હેંનેં ડાટેં સકે. હેંને એંમ એંતરે હારુ કર્યુ કેંમકે ઇયો તિયારી નો દાડો હેંતો, અનેં હાંજ પડવા કરતી હીતી. આ યહૂદીય ના આરમ ના દાડા નેં પેલ વાળો દાડો હેંતો ઝર કે હેંનનેં લાશ નેં ડાટવા હારુ લેં જાવું ના હેંતું. 44ઝર પિલાતુસેં હામળ્યુ કે ઇસુ એંતરો જલ્દી મરેંજ્યો હે, તે વેયો વિસાર કરતો થાએંજ્યો. હેંને રોમી સેના ના અધિકારી નેં પૂસ્યુ કે “હું આ હાસી વાત હે કે ઇસુ એંતરો જલ્દી મરેંજ્યો?” 45ઝર હેંને રોમી સેના ના અધિકારી દુવારા પૂરી જાણકારી લેં લીદી તે પિલાતુસેં યૂસુફ નેં કેંદું કે તું ઇસુ ના શરીર નેં ડાટવા હારુ લેં જાએં સકે હે. 46તર યૂસુફેં હુંણ થી બણાવેંલી એક સાદેર વેંસાતી લીદી. અનેં હેંને ઇસુ ના શરીર નેં ક્રૂસ થી નિસં ઉતાર લેંદું અનેં હેંનેં યહૂદી રિવાજ ના પરમણે અસલ ની સાદેર મ ફુંતેં લેંદું, અનેં ઇસુ ના શરીર નેં ડાટવા હારુ કબર મ મેંલ દેંદું ઝી મુટી ભડભેટ મ કુંરેંનેં બણાવેંલી હીતી. ફેંર હેંને એક મુંટો ગુંળ ભાઠો ગગડાવેંનેં હીની કબર ને બાએંણે બંદ કર દેંદો. 47મગદલા ગામ ની રેંવાસી મરિયમ અનેં યોસેસ ની આઈ મરિયમ ભાળત્યી હીતી કે ઇસુ નેં કાં ડાટ્યો હે.

Currently Selected:

માર્ક 15: GASNT

Highlight

Copy