Kol 2
2
1Mo le ki zot kone ki kalite lite mo pe lite pou zot, pou bann ki Laodise, e pou tou bann lezot ki zame pa finn trouv mwa personelman. 2Mo anvi zot leker pran kouraz e reyni dan lamour, pouki zot gagn rises, konpreansion ek enn konesans total mister Bondie: sa mister la se Lekris limem; 3tou bann trezor lasazes ek konesans, zot kasiet an li.
4Mo dir zot sa pouki personn pa tronp zot avek bel-bel koze. 5Li vre ki mo lekor absan, me mo lespri ar zot e mo kontan trouv zot fidel e ferm dan zot lafwa pou Lekris.
Lavi konplet dan Kris
6Kontign viv zot lavi selon seki finn transmet zot lor Lekris Zezi Lesegner, 7gard zot rasinn plante an li, tenir ferm dan lafwa, dan manier ki finn ansegn zot, e les zot rekonesans deborde. 8Pran gard ki personn pa piez zot dan bann bel lide, sa bann tronpri ki imin finn invante, anba lanpriz bann lafors ki dan liniver, e ki pena okenn lien avek Lekris. 9Parski totalite ladivinite res dan li, dan so lekor, 10e ou trouv ou lakonplisman dan Lekris ki dominn tou bann Lespri e tou bann Lafors.
11Dan Lekris, zot finn resevwar enn sirkonsizion ki pa fer par bann imin e ki finn anlev pese ki ti dan zot limanite: se sa sirkonsizion la ki dan Lekris. 12Zot finn plonze ar li dan batem, ar li zot finn resisite parski zot finn krwar dan lafors Bondie ki finn resisit li depi bann mor. 13Zot ti finn mor akoz zot bann fot ek zot leker pa sirkonsi; aster Bondie finn donn zot lavi ar Lekris; li finn pardonn tou nou bann fot, 14li finn anil sarz ki bann komannman ti pe fer pez lor nou; li finn fer li disparet, li finn kloue li lor lakrwa. 15Li finn depouy bann Lespri e bann Lafors, tou dimoun trouve ki li finn dezarm zot, li finn trenn zot dan kortez laviktwar so lakrwa.
16Asterla, personn pa kapav kondann zot pou bann kestion manze bwar, akoz fet, nouvel linn ou bien saba. 17Tousala nek lonbraz bann realite ki pou vini e ki sorti depi Lekris. 18Pa les personn kokin zot laviktwar par bann devosion, par lapriyer ar bann anz lor baz vizion e lintelizans imin ki gonfle ar pretansion. 19Pa les personn detas zot ek Lekris ki latet, ki mintenir ansam lekor antie, ki gard li ini avek bann artikilasion ek bann ligaman, pou li grandi gras a Bondie.
Mor ek viv avek Kris
20Zot finn mor avek Lekris, zot ne pli soumi anba bann lafors sa lemonn la; kifer zot pou obeir bann regleman kouma dir zot lavi depann lor la: 21“Pa pran, pa goute, pa touse”? 22Tousala pou bann kiksoz ki pou dekonpoze letan itilize; samem ki apel komannman ek doktrinn imin sa! 23Zot bon rod pran laparans lasazes: relizion personel, devosion, privasion; tousala pena okenn valer pou metriz bann dezir nou prop natir.
Currently Selected:
Kol 2: NTKM2009
Highlight
Share
Copy
Want to have your highlights saved across all your devices? Sign up or sign in
Mauritian Kreol New Testament © Bible Society of Mauritius, 2009.