Kol 1
1
Salitasion
1Mwa Pol, apot Zezi Kris par volonte Bondie, ek frer Timote.
2A bann disip ki dan lavil Kolos, bann frer e bann ser fidel dan Lekris:
Ki labonte ek lape Bondie nou Papa res lor zot.
Aksiondegras
3Dan lapriyer ki nou fer pou zot, nou remersie toultan Bondie, Papa nou Segner Zezi Kris, 4parski nou finn tann koz zot lafwa dan Zezi Kris ek zot lamour pou tou bann disip, 5akoz sa lesperans ki pe atann zot dan lesiel; zot inn tann lanons sa lesperans la avan, par Bonn Nouvel, parol laverite 6ki finn ariv ziska zot; mem fason ki li pe donn so fri e li pe progrese dan lemonn antie, mem fason li pe azir parmi zot depi zour zot finn resevwar li e vremem zot finn konn labonte Bondie. 7Zot finn aprann sa par Epafras, nou kamarad e nou konpagnon dan servis. Li enn minis fidel Lekris ki finn travay dan nou plas. 8Li finn dekrir nou lamour ki anim zot dan Lespri.
9Ala kifer, depi sa zour la, nou pa aret priye pou zot. Nou demann Bondie ki zot gagn foul konesans so volonte avek tou lasazes ek lintelizans spiritiel, 10pouki zot amenn enn lavi dign Lesegner, e ki zot rod fer li plezir. Par tou saki zot pou fer de bon, zot pou prodwir bann fri e zot pou progrese dan vre konesans Bondie. 11Lafors so laglwar pou fortifie zot par tou fason e pou amenn zot ver enn perseverans ek enn pasians ki siport tou. Dan lazwa, 12remersie Bondie Papa ki finn fer zot gagn zot par dan leritaz bann disip dan lalimier. 13Li finn aras nou dan pouvwar teneb e li finn transfer nou dan Rwayom so Garson bieneme; 14li finn delivre nou e li finn pardonn nou pese.
Kris e so travay
15Li rann vizib Bondie ki invizib, Premie-ne parmi tou bann kreatir, 16parski tou seki existe dan lesiel e lor later finn kre an li, bann kreatir vizib ek bann invizib, bann Lespri e bann Lafors. Tou finn kre par li ek pou li, 17li, li avan tou kiksoz e tou existe an li, 18li, li latet lekor Legliz. Li komansman, Premie-ne parmi bann mor, pouki li tenir so premie ran dan tou. 19Bondie finn kontan fer tou repoz an li 20e rekonsilie tou par li e pou li, lor later ek dan lesiel, letan li finn etablir lape par disan so lakrwa.
21E zot, lontan, zot ti etranze e ennmi Bondie, letan zot ti pe komet bann move laksion, 22aster Bondie finn rekonsilie zot par lekor ek laser so Garson, par so lamor, pou fer zot paret devan li, sin, san repros, san fay. 23Me bizin ki, par lafwa, zot res solid ek ferm, san ki zot deporte andeor lesperans ki vinn par Bonn Nouvel ki zot finn tande, ki finn proklame ar tou kreatir anba lesiel. Mwa Pol mo finn vinn serviter sa Bonn Nouvel la.
Pol kouma enn serviter Legliz
24Aster mo trouv mo lazwa dan bann soufrans mo soufer pou zot e mo konplet dan mo laser seki manke dan leprev ki Lekris finn aksepte pou so lekor ki apel Legliz; 25mo finn vinn serviter par sarz ki Bondie finn konfie mwa pou zot: fer konn Parol Bondie, 26sa mister ki ti res kasiet pandan bien lontan e ki aster Bondie finn devwale ar so bann krwayan. 27Li finn anvi fer zot konn rises ek laglwar sa mister la parmi bann pep: Lekris parmi zot, lesperans laglwar!
28Limem ki nou pe anonse; nou pe inform sakenn, nou pe instrir sakenn ek tou lasazes, pou fer li grandi spiritielman dan so relasion avek Lekris. 29Se pou sa ki mo travay, ki mo lite avek tou so lafors ki azir avek pwisans dan mwa.
Currently Selected:
Kol 1: NTKM2009
Highlight
Share
Copy
Want to have your highlights saved across all your devices? Sign up or sign in
Mauritian Kreol New Testament © Bible Society of Mauritius, 2009.