Kol 3
3
1Zot finn resisite avek Lekris, rod seki lao, la kot Lekris ete, dan kote drwat Bondie; 2rod seki lao pa lor later. 3Zot finn mor e zot lavi finn kasiet avek Lekris dan Bondie. 4Ler Lekris, ki zot vre lavi, pou manifeste, lerla zot ousi zot pou manifeste dan laglwar ar li.
Nouvo lavi dan Kris
5Tou seki fer parti lavi lor later an zot, fer li mor: move lavi, inpirte, lapasion, bann move dezir ek lamour larzan ki enn form lidolatri. 6Ala seki atir lakoler Bondie, 7ala seki ti zot konportman lontan, seki ti fer parti zot lavi. 8Aster, zot bizin debaras tousala: lakoler, iritasion, mesanste, zoure, bann grosierte ki fransi zot lalev. 9Fode pli ena mansonz ant zot, parski zot finn abandonn “ansien limanite”, avek so bann pratik, 10e zot finn adopte enn “nouvo limanite”, ki pe kontign renouvle so konesans antan ki zimaz Bondie; 11la, pena ni Grek ni Zwif, ni seki sirkonsi ni seki pa sirkonsi, etranze, tribi pa sivilize, esklav, lib, me selman Lekris ki tou, Lekris dan zot tou.
12Zot, zot bann ki Bondie finn swazir, finn sanktifie, finn kontan, alor met dan zot leker bann santiman konpasion, bienveyans, imilite, douser, pasians. 13Siport zot kamarad, e si zot ena kit repros, donn zot pardon; kouma Lesegner finn pardonn zot, zot ousi pardone. 14Pli inportan ki tou, viv dan lamour, samem ki fer linite dan larmoni.
15Ki lape Lekris regn dan zot leker, pou samem ki zot tou inn apele pou form enn sel lekor. Viv dan rekonesans. 16Ki parol Lekris prezan parmi zot dan tou so rises: ansegn zot prosin, fer zot ledikasion ar lasazes; par bann Psom, bann sante e bann kantik inspire par Lespri, sant zot rekonesans pou Bondie 17Tou seki zot kapav dir ou fer, fer li dan nom Segner Zezi, e par li, rann gras Bondie Papa.
Nouvo relasion dan nouvo lavi
18Bann madam, viv dan lakorite ek zot misie kouma bizin viv dan Lesegner.
19Bann misie, kontan zot madam e zame pa maltret li.
20Bann zanfan, viv dan lakorite toultan ar zot paran, ala seki Lesegner atann de zot.
21Bann paran, pa pous zot zanfan abou atansion zot dekouraze.
22Bann esklav, dan tou kiksoz obeir zot bann met ki lor later. Servi zot, pa parski pe vey zot, kouma dir zot pe rod fer plezir bann imin, me ar enn leker ki sinp e ki ena lakrint pou Lesegner. 23Ninport ki travay zot pe fer, fer li debonker, kouma dir pou Lesegner e non pou bann imin. 24Parski zot kone ki leritaz zot pou resevwar an rekonpans ar Lesegner. Se Lekris ki Lemet, e zot pe servi li. 25Si zot fer ditor, li pou ena so konsekans, e pa pou ena preferans pou person.
Currently Selected:
Kol 3: NTKM2009
Highlight
Share
Copy
Want to have your highlights saved across all your devices? Sign up or sign in
Mauritian Kreol New Testament © Bible Society of Mauritius, 2009.
