Luk 19

1Ayingiṉi Yesu avyagaṉa gô Yerikô. 2N’avegagi vovo ekiti z’ôma, ini nyè ne Zake, avegagi kè gw’ewônjô z’ipublikan; 3awutagi gô jeṉa nt’are Yesu, ndô e pa jolya g’ômwanja w’ibuṉa s’aṉaga, konde avegagi ôpe. 4N’avali yè mangô gô bôsô, avanda gw’erere gô jeṉè, konde avegagi gô pyagaṉa gô mpoṉo mèyoṉo. 5Gw’aṽyeṉi Yesu gô mbôra mèyo, avôni antyo mè gw’igôṉô, na gw’ayenyè yè, awulinyi yè inè: Zake, zunge sum̃iṉa; konde ṉèṉo wiṉo, myè ko dwaṉa gô nagô yo. 6N’azunge sum̃iṉi Zake, awongè ni mbya. 7Gw’ayeṉi waô yeṉo, waôdu w’alagalagi, awulya inè: Are kènda pa gô dwaṉ’ôgènda w’ôm’ombe. 8Ndô Zake agum̃aṉi gô bôsô ya Rerè, awulinyè inè: Vôna, Rera, mi pe mbèy y’igumbi nyam̃ gôr’ikuge, na ja my’are bongiṉa p’ôma ezom̃a n’ipita, mi fwiṉiza zô gôre yè nyongo nay. 9Awulinyô yè ne Yesu inè: Ṉèṉo wiṉo nagô yiṉo y’abyeṉô n’isungiṉa, konde ayè kè ômwaṉa w’Abraam. 10Konde Ômwaṉa w’ôma are bya pa gô buta azungiṉa ezom̃a zi re pera pa.

11Gw’avôganyôgô waô isam̃u yiṉo, Yesu agundi nkôgô kè, konde avegagi pyèrè ni Yerusalèm, na konde w’avikilyi nè, iṉongo ny’Anyambyè nyi be sunge bôm̃unya pelè. 12Yeṉo awulyi yè inè:

Enam̃i z’ôma agèndi gô ntye ya bô, gô bong’inyanga nyi penda, ko yè tô fwinya. 13Aweyi yè igôm̃i ny’inyôngô sè, ava waô igôm̃i ny’imina, awulinya waô inè: Gôlaṉi ôkita na sô, kaô my’afwinya. 14Ndô aṉaga wi ntye yè w’aṽiki yè, n’arôm̃i waô igende gôre yè, gô bulya inè: Azwè pa bel’ôma wiṉo gô pangiṉa zwè. 15N’arweṉi ayè pô p’inyanga nyi penda, gw’awinyi yè, azômbyi nè, inyôngô mè s’avenyô yè sika, si ga weyô gôre yè, ko yè mya nt’adiwô dèng’ôm’edu n’ikôla. 16N’aṽyeṉ’ôlônga, awulya inè: Rera, mini yo yi re dènga p’igôm̃i ny’imina. 17N’awulinyè yè inè: Mbyambye, nyôngô mbya, gô re nè, ô re dwaṉa pa n’inyanga nyi bekelyô g’ôsam̃u ômwangô, lwaṉa n’inyanga nyi pangiṉ’igôm̃i ny’inkala. 18N’aṽyeṉi waṽaṉi, awulya inè: Rera, mini yo yi re dènga pe min’ôtaṉè. 19N’awulinyè yè inè: Lwaṉ’awè kè n’inyanga nyi pangiṉe nkal’ôtaṉè. 20N’aṽyeṉ’ôm̃ori, awulya inè: Rera, vône mini yo ye yiṉo, y’avenjavenjô myè kôra pa ni tôlô; 21konde my’aryeṉi wè, konde awè ôm’ôyoli; ô bong’ezom̃a zi re wè pa dimbiṉa, ô teṉ’ezom̃a zi re wè pa bèṉa. 22N’awulinyè yè inè: Awè nyôngô mbe, mi jèkèlyo n’agamba mi re kogwa pa avila g’ôgwaṉi womè; w’amyeṉi nè, myè r’ôm’ôyoli, mbongag’ezom̃a zi re myè pa dimbiṉa, ni nteṉag’ezom̃a zi re myè pa bèṉa; 23sambô ntiṉa nde y’ayasi wè gô fwele siki yam̃ gôre mongi wi pendakaṉe sika, ko gw’afwinya myè, mi bonga yô n’ôba ta? 24N’awulinyi yè w’avegagi vovo inè: Wongiṉaṉi yè mina mè, ava yô gôre yè yi re n’igôm̃i ny’imina. 25Awulinyi waô yè inè: Rera, are n’igôm̃i ny’imina. 26Mi bulinya ṉwè inè: Ôm’edu are dènga pa gôre yè be pô, ndô ayè yi re e zele dènga pa vangaṉ’ezom̃a zi re na yè zi be bongiṉô yè. 27Ndô ilôvalôvi yam̃ mèyo, yi re yi pa bela myè pangiṉa waô, ṽagaṉi yô guṉu, ko jôṉaṉi yô g’ôzô wam̃.

28Yesu kamba pa yeṉo, agèndi gô bôsô y’aṉaga gô panda gô Yerusalèm.

29Arweṉi gw’azusi Yesu pyèrè ni Bètfaze ni Betani, gô nômba yi fweyô inè, nômba yi yôlivi, arôm̃i aṽaṉi avila gôr’iṉèngi yè, awulya inè: 30Gèndaṉi gô nkala yi re swaswo na ṉwè; gô be jingiṉa ṉwè gôgô, aṉwè be diṽinyô mwô’buru diryô pa, wi re wi pa pandô ôma ni mori; vuruṉaṉi wô, ko bagaṉi wô. 31J’aṉw’abambyô n’ôma inè: Ntiṉa nde yi puruṉa ṉwè wô? ko fwiṉizaṉi yè inè: Rerè ar’isolo na wô.

32N’agèndi waô w’arôm̃yô, aliṽiny’isam̃u ga nt’awulinyô waô ne Yesu. 33Gw’avuruṉagi waô mwô’buru, mongi w’aṉivi wô w’awulinyi waô inè: Ntiṉa nde yi puruṉa ṉwè mwo’buru? 34Awiṉizi waô inè: Rerè ar’isolo na wô. 35N’aṽagi waô mwô’buru gôre Yesu, n’aralyi waô ingoy saô gô wô, avandize Yesu gô wô. 36Gw’agèndagi yè, aṉaga w’ayany’ingoy saô gô mpoṉo. 37Gw’aṽyeṉi yè pyèrè ni Yerusalèm, g’ôlonga wi nômba yi yôlivi, nkumba y’iṉèngi yè yôdu y’avakilyi gô jeṉe mbya azum̃iny’Anyambyè n’inyôy ivôlô g’ômwanja wi lemba yôdu y’ayenyô waô. 38Awulyi waô inè: Ôzaviṉô gôr’ôga wi bya gw’ina nya Rerè! Am̃ènjè g’ôrôṽa n’ivenda gw’igôṉômè!

39Ifarisi sinyèwo gô nkondo w’awulinyi Yesu inè: Ôṉènji, leg’iṉèngi yo. 40N’awiṉizi yè inè: Mi bulinya ṉwè inè, ja wiṉo w’adwaṉa do, adô mi be tônga.

41Gw’aṽyeṉi Yesu pyèrè ni nkala, ayeṉa yô, aleṉi g’ômwanja wa yô, awulya inè: 42Gavoṉo w’amyeṉi, awè kè, gô ntyugu yiṉo isam̃u yi pang’am̃ènjè mo! Ndô vèṉo yi re jumbuṉô pa gw’antyo mo. 43Konde intyugu si be bya gôre wè, si be kômbiṉô wè n’ilôvalôvi yo n’ôgômba vingôvingô, aṉunjo ngwa g’ôzamby edu; 44yi be jilizo, awè n’ômwaṉi wo gô garegare yo, yi ze tige gôre wè idô gw’idô, konde ô pa mya egômbe z’aṽyeṉi Anyambyè gô belo.

45N’ayingiṉi yè gô nagô y’Anyambyè, avakilya gô kogunya waô w’agôlag’agôlô; 46awulinyi yè waô inè: Are tèndô pa inè: Nagô yam̃ yi be dwaṉe nagô y’ikambiṉa. Ndô aṉw’are panga pa yô ômpulungu w’ifwe.

47Aṉènjagi yè ntyugw’edu gô nagô y’Anyambyè. Ndô imiṉisè impôlô, n’irèndisi, n’ayôgô w’aṉaga w’awutagi gô jôṉè; 48ndô wi pa mya nt’are waô ko kôtè, konde aṉaga waôdu w’azôngagi gô pôganyô yè.

Currently Selected:

Luk 19: MYE

Highlight

Copy