Luk 18

1Agôviṉô waô nkôgô ne Yesu gô teva waô inè, aṉaga wi ga gambiṉeg’egômbe zôdu, ko w’ayasa. 2Awulyi yè inè: Avegag’ôyèkèli gô nkala, are pa ty’Anyambyè ge bimby’aṉaga. 3Avegagi kè gô nkala mèyoṉo ôtika w’ômwantô, w’aṽyeṉigi gô bulinyè inè: Reṉiza my’ôzozo n’ôlôvalôvi wam̃. 4Ndô e pa jivira v’ôling’ôla. Ndô kwè awulyi g’ôrèm̃i wè inè: Venge gôre myè e pa ty’Anyambyè ge bimby’aṉaga, 5ndô gô re nè ômwantô wiṉo e sokolya myè, mi be sèr’ôzozo wè, ayè vende jasiza myè n’ibyaṽyagi sè. 6N’arô bulyi Rerè inè: Yogoṉi nt’abuly’ôyèkèli ômbe. 7Ngo, Anyambyè agaṉe mongi yè yi re yè pinja pa, wi dagiṉè ôm̃anda n’ôgwèra, e be dinga gô nunguṉa waô? 8Mi bulinya ṉwè inè, e be kaṉa waô pelè. Ndô gô be by Ômwaṉa w’ôma, e be dèng’ibekelya ôṉongo mè gô ntye?

9Arô kôvi yè kè nkôgô yiṉo, g’ômwanja w’awèwo w’aṽekelyag’ikuṽi yaô inè, wi r’aṽya, ko waô pèdy’am̃ori inè: 10Aṉôm̃e aṽaṉi w’avandi gô nagô y’Anyambyè gô kambiṉa, ôm̃ori farisi n’ôm̃ori publikan. 11Farisi agum̃aṉi agambiṉa g’ôkuṽi wèmè inè: Akeṽa, Anyambyè, gôre myè e zele g’aṉag’am̃ori, mongi wi pita, arègo, belaṉi, ge vangaṉe ga publikan yiṉo; 12mi peng’esônge nyongo mbaṉi gô wiki, mi pe mbèy mori avila gw’igôm̃i gô yom̃a yôdu yi dèngô myè. 13Ndô publikan agum̃aṉi davadavye, e pa jivira vangaṉe gô tômbiṉ’antyo mè gw’igôṉô, ndô awôli ntôṉô yè, awulya inè: Anyambyè, vôgiṉa myè y’ôm’ombe. 14Mi bulinya ṉwè inè, wiṉo agèndi gô nagô yè nyezô pa, n’aranga mèwoṉo. Konde ôm’edu e pendy’ôkuṽi wè e be sônyô, n’ayè yi sôny’ôkuṽi wè e be pendyô.

15Aṽagi waô kè kèykèy yaô gôre yè, inè, e ga wate yô. Ndô gw’ayeṉ’iṉèngi yeṉo, w’azèmbi waô. 16N’aweyô waô ne Yesu gôre yè, awulya inè: Yiviraṉi yawaṉa bya gôre myè, ko alegaṉi waô, konde iṉongo ny’Anyambyè nyi re gôre waô wi re mbela ga waô. 17Giligili mi bulinya ṉwè inè: Ôm’edu are awong’iṉongo ny’Anyambyè ga ’mwerumbe ayingiṉe du gô nyô.

18N’aṽambyô Yesu n’ôvangiṉi ôm̃ori, inè: Ôṉènji ômbya, mi ga lend’ande gô niv’em̃èṉo z’egômbe zôdu? 19Awiṉizô yè ne Yesu inè: Ntiṉa nde yi fweyo myè nè, ômbya? E zel’ôm’ombya kaô ôm̃ori, ayè ne Anyambyè. 20W’avôrô ampanga, inè: Alèwa na wi ngaṉi; ayôṉa; ayufa; aṽèrinya; lube reri yo ni ngi yo. 21N’awulyi yè inè: Agamba miṉo môdu my’are mô penjavenja pa avila gw’erumbe zam̃. 22Gw’ayogyô Yesu yeṉo, awulinyi yè inè: Ôsam̃u ôm̃ori wi re wè pèṉa pa: gôle yom̃a yôdu yi re na wè, ko kera yô gôr’ikuge, gambèṉè ô be dwaṉa n’igumba g’ôrôṽa. Avila vovo, awè ko bya, azônga myè. 23Gw’ayogyô yè isam̃u yiṉo, agôtyô n’ekèṽ’evôlô, konde avegagi ekiti evôlô. 24Gw’ayeṉi Yesu inè, akôtyô n’ekèṽ’evôlô, awulyi nè: E be dwaṉe jola gôre waô wi re n’igumb’inyenge gô jingiṉa gw’iṉongo ny’Anyambyè! 25Konde are dèla gôre kamèli gô sôlya zôli gw’igola nyi ntômbô, vyagaṉô na gôr’ekiti gô jingiṉa gw’iṉongo ny’Anyambyè. 26Waô w’ayogyô nyô w’awulyi nè: Sambô mande ko jolye sungiṉô? 27Ndô Yesu awiṉizi nè: Isam̃u yi re y’ayolyô n’aṉaga, yô ko jolyô n’Anyambyè.

28Vovo awulyi Pyère inè: Azw’are tiga pe yom̃i yazô yôdu, azôngo. 29N’awulinyô waô ne Yesu inè: Giligili, mi bulinya ṉwè inè, e zel’ôma re tiga pe nagô yè, ge izombi yè, ge awôngi yè aṉôm̃e, ge ômwantô wè, ge awaṉi wè g’ômwanja w’iṉongo ny’Anyambyè, 30are awonge vyagaṉô pôlô gw’egômbe ziṉo, na gô ntye yi bya, em̃èṉo z’egômbe zôdu.

31Awongi Yesu igôm̃i n’aṽaṉi, awulinya waô inè: Vônaṉi, azwè panda gô Yerusalèm̃, n’isam̃u yôdu yi re tèndô pa n’ivogisi g’ômwanja w’Ômwaṉa w’ôma yi be dendô. 32Konde e be pô gôre mongi wi ntye, ko waô sèlyè, aroṽè, arônyè igwaṉa; 33wi be siṽè kè ni mpava, ayôṉè; na gô ntyugu yi ntyarô e be tôngwa. 34Ndô wi pa kôtiz’isam̃u yiṉo; n’agamba mè m’avegagi jumbuṉô pa avila gôre waô, ko w’agôtiz’isam̃u y’agambyô.

35N’arweṉi gw’aṽyeṉi Yesu pyèrè ni Yerikô, avegag’ipoku dwaṉa pa baru g’ôzamba wi mpoṉo, nègiraga. 36Gw’ayogyô yè aṉag’awenge wi pyagaṉa, aṽambyi nè, ôsam̃u nde wiṉo? 37Awulinyi waô yè inè: Yesu, yi Nazarèt, ayè pyagaṉa. 38N’arôngi yè inè: Yesu, y’Ômwaṉa wi David, yeṉa my’ekèṽa! 39N’aṉaga w’agèndi ni bôsô w’alegi yè ko yè dwaṉa dodo; ndô arôngi pôlô vyagaṉô inè: Awè, ômwaṉa wi David, yeṉa my’ekèṽa! 40N’agum̃aṉi Yesu gôre, azômbya inè e ga vagô gôre yè; na gw’arweṉi yè pyèrè, aṽambyi yè inè: Ô bela myè gô dendiṉo ande? 41N’awiṉizi yè inè: Rera, mi ga yeṉe. 42N’awulinyô yè ne Yesu inè: Yeṉa; ibekelyi so si re wè sungiṉa pa. 43N’ayeṉi yè pelè, azônge Yesu, nsum̃inyag’Anyambyè. N’aṉaga waôdu gw’ayeṉi waô yeṉo, w’azum̃iny’Anyambyè.

Currently Selected:

Luk 18: MYE

Highlight

Copy