Luk 17
17
1Awulinyi Yesu iṉèngi yè inè: Ayolye dwaṉe inè, isogiza s’aṽye; ndô azile gôre yè yi baga sô! 2Ko dwaṉe mbya gôr’ôma mè gô diryô idw’ivôlô nyi kiliṉ’iputu g’ômpele wè, ko yè falô gô ntyuṽa, vyagaṉô na gô sogiz’ôm̃ori gôr’awangô wiṉo.
3Ṽandam̃iṉaṉ’ikuṽi yaṉi. Ja mwô’ngi yo ajanj’ibe, revuṉè; na j’anige nkôndi, nyezè. 4Na j’ajanjiṉo mbe nyongo ôrwageṉô g’ôwenja, ko yè tô fwinya gôre wè nyongo ôrwageṉô, awulya inè: My’aṉigi nkôndi, gambèṉè ko nyezè.
5Awulinyi rôm̃i Rerè inè: Gunda zwè ibekelya. 6N’awulyi Rerè inè: J’aṉw’adwaṉa n’ibekelya ga intyo nyi mutardi, aṉwè tô buliny’erere ziṉo inè: Rôduṉô, ko bèṉô gô mbeṉe; zi be jogiṉô ṉwè.
7Mande gôre ṉwè are ni nyôngô yi tumbe ntye ntyo yi penjavenj’ilemba y’adombè, e be bulinyè, gw’abyè avila gô ntyaga, inè: Yôgô pelè, ko dwaṉa baru gw’inya? 8Aranga nè e be bulinyè inè: Gekiz’inya si be nyô myè, ko nwaṉ’ôṉambi wo, avengiṉa myè, kaô my’anya ni jonga; avila vovo awè tô nya ayonga? 9E be bulinye nyôngô mèyoṉo inè, akeṽa, konde are denda p’isam̃u y’asômbyô yè? 10Yeṉo kè aṉwè, gô be denda ṉwè isam̃u yôdu yi re ṉwè sômbyô pa, wulyaṉi nè: Azwè inyôngô s’isolo fo; azw’are denda pa nt’avegagi eṽilô gô denda.
11Arweṉi nè gw’agèndagi Yesu gô Yerusalèm, avyagaṉi gô garegare ntyo Samarya ntyo Galile. 12Gw’ayingiṉi yè gô nkala mori, alataṉi n’igôm̃i ny’aṉaga w’avegagi ni nkaṉi ya gelô. Agum̃aṉi waô davadavye; 13n’arômbiṉi waô anyôy maô, awulya inè: Rera, Yesu, yeṉa zwè ekèṽa! 14Gw’ayeṉi yè waô, awulinyi waô inè: Gèndaṉi gô tum̃iny’ikuṽi yaṉi gôr’imiṉisè. N’arweṉi gw’agèndagi waô w’ayingyô. 15N’ôm̃ori gôre waô gw’ayeṉi yè inè, atôlizô, awinyi, azum̃iny’Anyambyè n’inyôy ivôlô. 16Avôswi yè g’ôzô wè gw’agôlô mi Yesu, awiṉizè akeṽa. Avegagi mwo’Samarya. 17Awiṉizi Yesu, awulya inè: E pa tôlizô igôm̃i? Ndô eṉôgôm̃i zi re na gweṉi? 18E pa dèng’ôma wi fwinya gô sum̃iny’Anyambyè, kaô wiṉo w’iṉongw’im̃ori? 19Avila vovo awulinyè yè inè: Gum̃aṉa, ko kènda, ibekelyi so si re wè sungiṉa pa.
20Aṽamby’ ifarisi Yesu egômbe zi be by’iṉongo ny’Anyambyè. N’ayiviri yè waô inè: Iṉongo ny’Anyambyè nyi pa bya ni mpônôgô. 21W’awulya kè inè: Nyi re guṉu, ntyo nyi re voṉo. Konde vôna, iṉongo ny’Anyambyè nyi re gô gare yaṉi.
22N’awulinyi yè iṉèngi inè: Intyugu si be bya si be bela ṉwè gô jeṉe mori gw’intyugu s’Ômwaṉa w’ôma, ko ṉw’ayeṉa yô. 23Wi be bulinya ṉwè inè: Vôna, are guṉu; vôna, are voṉo. Agèndaṉi gô sônga waô. 24Konde ga nt’ar’iṉônyingwèmbôlô, gô kèm̃iṉ’ôwenja gô nkôṽa mori y’ôrôṽa, yeṉo be dwaṉa kè Ômwaṉa w’ôma gô ntyugu yè. 25Ndô e ga lônge sindiṉ’isam̃u imyenge, ko yè bikô ne mongi w’ivôm̃a nyiṉo.
26Ga nt’arweṉi gw’intyugu si Nôa, yeṉo be dwaṉa kè gw’intyugu s’Ômwaṉa w’ôma. 27Aṉaga w’anyeṉagi, ayongaga, ayômbagi ayômbizaga kè awaṉi waô, kwanga gô ntyugu y’ayingiṉi Nôa g’ôwatanga; n’aṽyeṉi eṉingô evôlô ayiliza waôdu. 28Ga nt’arweṉi gw’intyugu si Lot, yeṉo be dwaṉa kè. Aṉaga w’anyeṉagi, ayongaga, w’aṉivagi agôlaga, w’avèṉagi, w’aṉôgag’inagô; 29ndô gô ntyugu y’alubwi Lot avila gô Sôdoma, y’aṉogi ningô y’ôgôṉi na yi sufur avila g’ôrôṽa, ayiliza waôdu. 30E be dwaṉa kè mbela mô gô ntyugu yi be bôm̃uny’Ômwaṉa w’ôma.
31Gô ntyugu mèyoṉo, ayè yi be diwô g’ômwanjamwanja wi nagô, n’igumbi nyè gô nagô, e ga rig’azum̃iṉa gô bonga nyô; n’ayè yi be diwô gô ntyaga, e ga rig’awinya gô nagô yè. 32Yônginyareṉi ômwantô wi Lot. 33Ôm’edu e buta gô sungiṉ’em̃èṉo zè e be periza zô, ndô ayè yi periz’em̃èṉo zè e be dènga zô. 34Mi bulinya ṉwè inè, ôgwèra mèwoṉo aṉag’aṽaṉi wi diwô dèw’ôdô ômô, ôm̃ori e be bongô ko ôm̃ori tigô; 35antô aṽaṉi wi be diwô wi kil’imba mbôra mô, ôm̃ori e be bongô ko ôm̃ori tigô. 36[Aṉôm̃e aṽaṉi wi be dwaṉa gô ntyaga, ôm̃ori e be bongô ko ôm̃ori tigô.]
37Awulinyô yè n’iṉèngi inè: Rera, isam̃u yiṉo yi be dwaṉa na gweṉi? N’awiṉizi yè inè: Mbôra yi r’ebende, vovo be dataṉ’inkungu.
Currently Selected:
Luk 17: MYE
Highlight
Share
Copy
Want to have your highlights saved across all your devices? Sign up or sign in
Published by the British and Foreign Bible Society in 1927.
