Luk 16

1Yesu awulinyi kè iṉèngi yè inè: Ekiti z’ôma avegagi n’ôma w’avenjavenjag’igumbi nyè; azozizô gôre yè inè, e bundakaṉe yom̃i yè. 2Aweyè yè, awulinyè inè: Ôsam̃u nde wiṉo wi jogo myè g’ômwanji wo? Vare myè ntangô nt’ar’eṽilô zo, konde w’ayolye tô dwaṉe nyèṉè gw’ewônjô z’igumbi nyam̃. 3N’awulyi ôma w’azozizô g’ôrèm̃i wè inè: Mi be denda sèṉi, gô re nè reri yam̃ e tômba myè avila gô pangiṉ’igumbi nyè? Gô janja gô ntye? mi ze ni ngulu. Na gô nègira? mi jeṉe ntyoṉi. 4My’avôrô nte be denda myè, gô be tômbô myè avila gw’eṽilô zam̃, ko aṉaga bonga myè gw’inagô saô. 5N’aweyi yè ôm’edu w’aṉwani reri yè, n’awulinyi yè ôlônga inè: Ô nwane reri yam̃ ntangô sèṉi? 6Ayiviri yè inè: Nkam̃a y’inkulu s’agali. N’awulinyè yè inè: Wong’ezangô zo, ko sunge dwaṉa baru, arènd’agôm̃i ataṉè. 7Vovo awulinyi yè ôm̃ori inè: Awè kè ô nwane ntangô sèṉi? Ayiviri yè inè, nkam̃a yi gara y’ibile. N’awulinyè yè inè: Wong’ezangô zo, ko tènda agôm̃i eṉanay. 8Rerè y’ôm’ombe mèwoṉo azum̃inyi yè konde ayanji n’ôkeli. Konde awaṉa w’ivôm̃a nyiṉo wi re n’ôkeli gw’ivôm̃i nyaô vyagaṉô n’awaṉa w’ôzange.

9Ndô mi bulinya ṉwè inè: Vangiṉaṉ’ikuṽi yaṉi indegô n’agumb’ambe mi ntye, inè, gô be maṉa mô gôre ṉwè, ko waô bonga ṉwè gw’alwaṉô ma koṉako. 10Ayè yi bekelyô gw’isam̃u imyangômè, e be bekelyô kè gw’isam̃u impôlô, n’ayè yi kènda règo gw’isam̃u imyangômè, e be kènda règo gw’isam̃u impôlô. 11Sambô j’aṉw’azele dwaṉa pa aṉaga wi re ko bekelyô gw’agumb’ambe mi ntye, mande be jegiṉa ṉwè agumba ma rèti? 12Na j’aṉw’azele dwaṉa pa n’inyanga nyi bekelyô gô yom̃a yi ngaṉi, mande be pa ṉwè yom̃i yaṉimè? 13E zele nyôngô yi re ko janjiṉe rerè mbaṉi. Konde e be bike mori, ko yè tonde mori; e be diṽa ni mori, ko yè pèdye mori. Aṉw’ayolye janjiṉ’Anyambyè ni Mamon ta.

14Ifarisi w’avegagi n’ôgasô w’aṉiva, w’ayogyô kè isam̃u yiṉo yôdu, n’azelyagi waô yè. 15Awulinyô waô ne Yesu inè: Aṉwè buta gô dwaṉ’aṽya gw’azô m’aṉaga, ndô Anyambyè avôrô irèm̃i yaṉi; konde ezom̃a zi pendyô pôlô gôr’aṉaga zô n’ezom̃a zi bikô gw’antyo m’Anyambyè.

16Ivanga n’ivogisi y’alwaṉi kwanga gw’egômbe zi Yôan; avila gw’egômbe mèzoṉo iṉongo ny’Anyambyè nyi kambiṉô, n’ôm’edu e jingiṉa gô nyô ni ngulu. 17Are dèla gôr’ôrôṽa ni ntye gô pyagaṉa, vyagaṉô na g’ôrèndo ôm̃ori w’ivanga gô tômbô.

18Ôm’edu e tômb ômwantô wè ayômb’ômwèṉè, e bela wi ngaṉi; n’ôm’edu e jômb’ômwantô mè wi re tômbô pa n’ôṉôm̃u wè, e bela wi ngaṉi.

19Avegagi ekiti z’ôma, z’aworagi nkèmbo ya gelô na yi lyamba mbya, n’anyeṉagi yè ntyugw’edu ayeṉe mbya. 20Elèngèlè z’ôma, ini nyè ne Lazare, alimbinyô gw’evungu zè, ôkuṽi wè ralye n’ilôsô, 21n’aṽelagi yè gô jôrizô ni nkizi y’avôswagi avila gô tavulu y’ekiti; n’aṽyeṉig’imbwa anèmbag’ilôsô yè. 22N’arweṉi nè, elèngèlè z’ayuwi, n’arwanyô yè ne iyenjèl gô ntôṉô y’Abraam. N’ayuwi kè ekiti, aṽènyô yè. 23Gw’avegagi yè gw’azingô gw’ilômbô, arômbiṉi antyo mè, ayeṉ’Abraam davadavye ni Lazare gô ntôṉô yè. 24Arôngi yè inè: Rera Abraam, yeṉa my’ ekèṽa, ko tôm̃e Lazare, inè, e ga luṽye ntyay y’ôm̃eṉô wè gw’aṉingô avoṉiza myè ôṉèm̃è wam̃, konde mi jeṉ’azingô g’ôgôṉi wiṉo. 25Ndô Abraam awiṉizi nè: ’Mwam̃, yônginya inè, gw’avegagi wè bo w’alèngi yom̃i yo ṽya, ndô Lazare alwaṉi kaô n’injuke; ndô vèṉo e jeṉe mbya, n’awè ô jeṉizô azingô. 26Na vyagaṉô n’isam̃u yiṉo yôdu, are dwaṉizô pa mbôra y’ôrong’ômpôlô ntyo zwè ntyo ṉwè; yeṉo waô w’arô pyagaṉi avila vèṉo agènda gôre ṉwè, ntyo avila gôgô aṽya gôre zwè w’ayolye nogaṉe. 27N’awiṉizi ekiti inè: Sambô, kokolo, Rera Abraham, rôm̃e Lazare gô nagô ya reri yam̃; 28konde my’are n’awarerè ataṉè. Ko yè myeza waô isam̃u yiṉo, waô vende bya gô mbôra y’azingô yiṉo. 29Abraam awiṉizi nè: Wi re ni Môsès n’ivogisi; wi ga yogiṉô waô. 30N’awulyi yè inè: Nyawè, rera Abraam, ndô jog’ôma are juwa pa akènda gôre waô, gambèṉè wi be kalwa. 31N’awulinyô yè n’Abraam inè: Ja w’ayogiṉô Môsès n’ivogisi, gambèṉè ôm’ayolye pange waô jivira, vang’atôngwa ôma avila gw’ijuwa.

Currently Selected:

Luk 16: MYE

Highlight

Copy