Luk 15

1Aṽyeṉ’ipublikan waôdu n’aṉag’aṽe aṽya pyèrè gôre Yesu gô jogw’agambi mè. 2N’alagalag’ifarisi n’irèndisi awulya inè: Ôma wiṉo e bong’aṉag’aṽe, anya na waô. 3Ndô agôviṉi yè waô nkôgô yiṉo inè: 4Mande gôre ṉwè, j’are ni nkam̃a y’adombè, ko yè perô n’im̃ori, arige agôm̃i m’adombè eṉôgôm̃i n’adombè eṉôgôm̃i gw’itôve, ko yè kènda gô buta mènyo ny’averi, kaô adènga nyô? 5Na gô dèngè nyô, e talya nyô gw’ibegi sè, njeṉage mbya na nyô, 6na gô fwinyè gô nagô, e fwey’indegô sè, n’irangaṉô yè, awulinya waô inè: Yeṉaṉi mbya na myè, konde my’are dènga p’idombè nyam̃ ny’apegaga pera pa myè. 7Mi bulinya ṉwè inè: Yeṉo be dwaṉa kè igeṽ’ivôlô g’ôrôṽa g’ômwanja w’ôm’ombe ôm̃ori e kalwa, vyagaṉô n’agôm̃i m’aṉag’aṽya eṉôgôm̃i n’aṉag’eṉôgôm̃i wi re wi zele n’isolo nyi kalwa.

8Ge ômwantô mè mande, j’are n’igôm̃i ny’ifura, ko yè perô ne mori, aṉunge lambi, ayombuṉe nagô, awuta kaô adènga yô? 9Na gô dèngè yô, e fwey’indegô sè n’irangaṉô yè, awulya inè: Yeṉaṉi mbya na myè, konde my’are dènga pe fura y’adiwô pera pa myè. 10Mi bulinya ṉwè inè: Yeṉo dwaṉa kè igeṽa gw’azô m’iyenjèl s’Anyambyè g’ômwanja w’ôm’ombe ôm̃ori e kalwa.

11N’arô bulyi yè inè: Ôma avegagi n’awaṉ’aṉôm̃e aṽaṉi. 12Awulinyi ’mwerumbe reri yè inè: Rera, va myè mbèy y’igumba nyi be jigô myè. N’ageriṉi rerè ageriṉa waô igumbi nyè. 13Intyugu inyèwo pyagaṉa pa, ’mwerumbe alatizi yom̃i yè yôdu ta, agènd’ôgèndo wè gw’iṉongw’ila; gôgô awunji yè yom̃i yè yôdu gw’isam̃u imbe. 14Gw’aliwô yè amaz’igumbi nyè nyôdu, arweṉi njaṉa mpôlô gô ntye mèyoṉo, n’avakilyi yè gô jela. 15N’agèndi yè gô janjiṉ’ôma wi ntye mèyoṉo, n’ôma mèwoṉo arôm̃i yè gw’itôve sè gô nyez’ingôwa. 16N’arô tondi yè gô jôriz’iwum̃u nyè n’inya s’anyenyôgô ingôwa, ndô e pa pô inya n’ôma. 17Ndô gw’awinyi yè g’ôgu wè, awulyi nè: Mongi janja awenge wa reri yam̃ wi re n’inya kwèkwè na vyagaṉô, ndô mi juwa vèṉo ni njaṉa! 18Mi be kum̃aṉa, agènda gôre reri yam̃, awulinyè inè: Rera, my’are janja p’ibe g’ôrôṽa na g’ôzô wo kè, 19my’azele n’inyanga nyèṉè gô fweyô inè, ômwaṉi wo; vanga myè g’ôm̃ori wa mongi janjiṉo. 20N’agum̃aṉi yè, agènda gôre reri yè. Ndô gw’avegagi yè e p’are bô, reri yè ayeṉi yè avôgiṉè, n’avali yè mangô, agôriṉa gô ngori yè, azombè. 21N’awulinyô yè n’ômwaṉa inè: Rera, my’are janja p’ibe g’ôrôṽa na g’ôzô wo kè; my’azele n’inyanga nyèṉè gô fweyô inè, ômwaṉi wo. 22Ndô rerè awuliny’inyôngô sè inè: Ṽagaṉi ngoy mbyamè, ko borizaṉi yè yô; welaṉ’ôm̃ôrô g’ôgo wè, n’intyôzô s’atanga gw’agôlô mè. 23Ko bagaṉi kè mwô’nyare ôvom̃i, ayôṉa wô. 24Azwè ga nye ayeṉe mbya; konde ômwaṉi wam̃ wiṉo apegaga jawa pa, ndô atô tweṉi bo; apegaga pera pa, ndô atô dèngyô. N’avakilyi waô gô jeṉe mbya. 25Ndô ômwaṉ’ôṉèro avegagi gô ntyaga. Gw’aṽyeṉi yè azusa pyèrè ni nagô, ayogyô yè abeka n’iyiṉô. 26Aweyi yè mori avila gôr’inyôngô, aṽambyè inè: Isam̃u nde yiṉo? 27N’awulinyô yè ne nyôngô mè inè: Mwô’ngi yo abyeṉi, ni reri yo are jôṉa pa mwô’nyare ôvom̃i, konde are yè dènga p’ôkuṽa mbyambye. 28Ndô aṽendi, ko ayivira gô jingiṉa. N’agogwi reri yè agwenè inkolo inè, e ga yingiṉe. 29N’awiṉizi yè reri yè inè: Vôna, impum̃’imyenge yiṉo yi re myè janjiṉo pa, ko my’ avav’izômbyô yo, ndô ô pa pa myè ni mori venge mwô’mbôṉi ko mi jeṉe mbya n’indegô sam̃. 30Ndô gw’aby’ômwaṉi wo wiṉo, are bunja p’igumbi nyo ni vôvevôve, w’ajôṉiṉè mwô’nyare ôvom̃i! 31Awulinyô yè ne reri yè inè: ’Mwam̃, ô re na myè egômbe zôdu, ni yom̃a yôdu yi re na myè iyo; 32ndô apegaga kwèkwè gôre zwè gô jeṉe mbya n’igeṽa, konde mwô’ngi yo wiṉo apegaga juwa pa, ndô atô tweṉi bo, konde apegaga pera pa, ndô atô dèngô yè.

Currently Selected:

Luk 15: MYE

Highlight

Copy