Luk 14

1Arweṉi gw’ayingiṉi Yesu gô nagô y’ôma w’inyanga gôr’ifarisi gô ny’inya, gô ntyugu yi soṉo, ifarisi s’aṽèmbagi yè. 2Na vôna, avegagi swaswo na yè ôma w’ayogyô nkaṉi y’eṉingô. 3N’agambi Yesu, awuliny’iṉèngi y’ivanga n’ifarisi inè: Are mbya gô jinga gô ntyugu yi soṉo mbè are mbe? 4W’alwaṉi dodo. N’awongi Yesu ôma mè w’avegagi ni nkaṉi, ayingè, arigè gô kènda. 5Avila vovo awulinyi yè waô inè: Mande gôre ṉwè, j’ômwaṉi wè ge buru yè y’apôswa gw’iṽemba, arômbe yô pelè gô ntyugu yi soṉo? 6Ndô wi pa jolya gô fwiṉiz’igamba gw’isam̃u mèyoṉo.

7N’agôviṉi yè waô w’aweyô gw’inya nkôgô, gw’ayeṉi yè nt’avinji waô alwaṉô mi ṉam̃i; n’awulinyi yè waô inè: 8Gô be fweyô wè n’ôma g’ôgeṽe w’ijômbaṉa, alwaṉa baru gw’epwe z’eṉam̃i, vendetwa are fweyô p’ôma re n’inyanga vyagaṉô na wè, 9ko ôma mè w’afweya ṉwè bya gô bulinyo inè: Ve mbôra gôr’ôma woṉo. Gambèṉè ô be pakilya gô jeṉe ntyoṉi gô ke bonge mbôra yi re jam̃iṉa pa. 10Ndô gô be fweyô wè, ge dwaṉe baru gw’ilwaṉô nyi re jam̃iṉa pa, na gô be by’ôma w’afweyo, awulinyo inè: Ndeg’wam̃, vandiṉare kwè. Gambèṉè ô be dwaṉa n’ôlubô gw’azô ma waôdu wi re baru na wè gô tavulu. 11Konde ôm’edu e pendy’ôkuṽi wèmè e be sônyô, n’ôm’edu e sôny’ôkuṽi wè e be pendyô.

12N’awulinyi yè ôma w’aweyi yè inè: Gô pango inya si nkômbenyôndô ntyo si nkôlô, awey’indegô so, ge awongi yo, ge mongi wi re na wè ijaṉô, ge irangaṉô yo yi re paga pa, wi vende tô fweyo gw’inya, awiṉizo mbela mèmô. 13Ndô gô be pango ôgeṽe, wey’ikuge, ni ṉèm̃a, ni bôke, n’apoku. 14Gambèṉè ô be jeṉe mbya konde wi zele n’ezom̃a zi re waô ko fwiṉizo; ndô ô be fwiṉizô gw’itôngwa s’aṉag’aṽya.

15Gw’ayogyô ôm̃ori gôre waô w’avegagi baru na yè gw’inya ayogw’agamba miṉo, awulinyi Yesu inè: Ôzaviṉô gôre yè yi be ny’inya gw’iṉongo ny’Anyambyè. 16Ndô Yesu awiṉizi yè inè: Ôma avangi ôgeṽe ômpôlô, awey’aṉag’awenge. 17N’arôm̃i yè nyôngô yè, gw’igwèra nyi nyô n’inya, gô bulinya mongi w’aweyô inè: Yôgôṉi, konde yom̃a yôdu y’akeki. 18Ndô waôdu w’avakilyi n’ôrèm̃’ômô gô fwiz’intyongwè. Ôlônga awulinyi yè inè: My’are kôla pe ntyaga, my’are n’isolo gô kènda gô jeṉa yô; kokolo, e ga nyeze myè. 19Ôm̃ori awulyi nè: My’are kôla p’igôm̃i ny’inyare si janja, mi ke kèṉiza sô; kokolo, e ga nyeze myè. 20Ôm̃ori awulyi nè: My’are jômba p’ômwantô, yeṉo my’ayolye gô bya. 21N’awinyi nyôngô mè arakily’isam̃u yiṉo gôre reri yè. N’aṽendi ôṉivi wi nagô, awulinyi yè nyôngô yè inè: Gènde ngwambe gw’agala na gw’impoṉo si nkala, ko bagare guṉu ikuge, ni ṉèm̃a, n’apoku, n’ibôke. 22N’awulyi nyôngô inè: Rera, are dendô pa nt’asômbyo, ndô mbôra yi p’are. 23N’awulinyi rerè nyôngô inè: Gènda gw’impoṉo na gw’impindi ko bangatya waô gô bya, ko nagô yam̃ jônya ralye. 24Konde, mi bulinya ṉwè inè, e zel’ôma vangaṉ’ôm̃ori gôre waô w’aweyô e be demb’ôgeṽe wam̃.

25Agèndi aṉag’awenge ni Yesu. N’agegwi yè awulinya waô inè:

26Jog’ôma abya gôre myè, ko yè aṽike reri yè, ni ngi yè, n’ômwantô wè, n’awaṉi wè, n’awôngi yè aṉôm̃e, ni yombi yè, n’em̃èṉo zèmè kè, ayolye dwaṉ’ôṉèngi wam̃! 27N’ôm’edu are agumbe krosi yè, azônga myè, ayolye dwaṉ’ôṉèngi wam̃.

28Konde mande gôre ṉwè e bele nôge nagô mpôlô y’adô ko yè alônge dwaṉa baru avikilye njôni, twa pa are n’igumba kwèkwè gô maza yô, 29vendetwa ayè fwela p’adô mi ntiṉa, ko yè alènge ngulu yi sukiza yô, gambèṉè waôdu wi be jeṉa yô wi be pakilya gô sèlya, 30awulya inè: Ôma wiṉo avakilyi gô nôga, ndô e re pegege ni ngulu yi sukiza?

31Ge ôga mè mande, j’akènda gô nw’igoṽi n’ôg’ômwèṉè, ko yè alônge dwaṉa baru awônde môndo, twa pa are ni ngulu n’igôm̃i ny’intozèny s’isozè, gô nwa na yè yi bya gôre yè n’agôm̃i m’intozèny ambaṉi? 32J’ayolye ôm̃ori e p’are bô, e tôm̃’ivovi gôre yè, aṽambya nt’are waô ko pang’am̃ènjè.

33Sambô, ôm’edu gôre ṉwè are ayivira gô tige yom̃a yôdu yi re na yè ayolye dwaṉ’ôṉèngi wam̃.

34Ezanga zi r’ezom̃’eṽya; ndô j’ezanga z’aperiz’ôṉigi wè, zô ko tô dèng’ôṉigi na gweṉi? 35Zi zele n’isolo nyèṉè ge gô ntyaga ge gw’inyela; ndô zi falô nfalôgô. Ayè yi re n’arôy gô jogo e ga yogo.

Currently Selected:

Luk 14: MYE

Highlight

Copy