Luk 20

1Arweṉi nè, ntyugu mori gw’aṉènjagi Yesu aṉaga gô nagô y’Anyambyè awunguṉe ntyangô mbya, imiṉisè impôlô n’irèndisi, n’aṉèro w’aṽyeṉi gôre yè awulinyè inè: 2Wulinya zwè, ô dend’isam̃u yiṉo n’inyanga nde, ge mande aveṉi wè inyanga nyiṉo? 3Awiṉizi waô inè: Mi be bambya ṉwè kè igamb’im̃ori. 4Wulinyaṉi myè, ibatiza zi Yôan s’avili g’ôrôṽa mbè gôr’aṉaga? 5Ndô w’agambagi waô na waô inè: J’azw’ajivira inè, s’avili g’ôrôṽa, gambèṉè e be bulya inè: Ntiṉa nde yi re ṉwè e pa bekelye yè? 6Ndô j’azw’ajivira inè, s’avili gôr’aṉaga, gambèṉè aṉaga waôdu wi be punga zwè adô, konde w’aṽekelyi nè, Yôan ôvogisi. 7N’awiṉizi waô inè, azwè pa mye nkôṽa y’avili sô. 8N’awulinyô waô ne Yesu inè: Myè kè my’awulinye ṉwè n’inyanga nde nyi denda myè isam̃u yiṉo.

9Avakilyi yè gô kôviṉ’aṉaga nkôgô yiṉo inè: Ôma aṽèṉi ntyaga y’igoli, ariga yô gôr’aṉaga gô penjavenjô, n’agèndi yè gô ntye nyèṉè ôling’ôla. 10Gw’egômbe z’ilônda, arôm̃i yè nyôngô gôr’aṉaga mè, inè, wi ga ve yè mbèy y’ilônda yi ntyaga y’igoli. Ndô aṉaga mè w’awôli yè, awiṉizè ôrevô. 11N’arô tôm̃i yè nyôngô nyèṉè, n’awôli waô yè, aroṽè, awiṉizè kè ôrevô. 12N’arô tôm̃i yè yi ntyarô; n’awonji waô yè vôra, azugè avila gô ntyaga. 13N’awulyi ôṉivi wi ntyaga inè: Mi be denda sèṉi? Mi be tôm̃’ômwaṉi wam̃ wi tondô myè, vendetwa gô be jeṉa waô yè wi be dubè. 14Ndô gw’ayenyô yè ne mongi wi penjavenje ntyaga, w’awulyaṉi nè: Wiṉo n’ôyigisi, azwè ga yôṉeṉi yè, ko ijiga dwaṉ’isazô. 15N’arômbi waô yè avila gô ntyaga y’igoli, ayôṉè. Sambô ôṉivi wi ntyaga e be dendiṉ’aṉaga mè sèni? 16E be bya gô jôṉ aṉ ga mèwoṉo, ave ntyaga y’igoli gôr’aṉag’awèṉè.

Gw’ayogyô waô yeṉo, w’awulyi nè: Alwaṉe yeṉo! 17Ndô Yesu azindiṉi waô ngolongolo, awulya inè: Sambô igamba nyi re sèṉi nyi re tèndô pa inè: Idô ny’aṽikyô n’iṉôgisi ny’atweṉi gw’ewônjô zi ntulungu? 18Ôm’edu e be pôswa gw’idô nyiṉo e be jarwayarwa simbèy, ndô ôm’edu e be pôsunyô ne nyô nyi be nyigè ga ntyèngè.

19Imiṉisè impôlô n’irèndisi w’awutagi gô kôtè igwèra mènyoṉo, ndô w’aryeṉi aṉaga. W’agôtizi nè, Yesu agôvi nkôgô mèyoṉo gô sira waô.

20Aṽèmbagi waô Yesu, n’arôm̃i waô aṉaga w’avondagi nè, waô aṉag’aṽya, gô sotè mbelaga gô kôt’agambi mè, avè gô ngulu na gw’inyanga nyi guvèrnèr. 21N’aṽambyô yè n’aṉaga mèwoṉo kotè yiṉo inè: Ôṉènji, azw’avôrô inè, ô kamba aṉènja kè nt’are kwèkwè, na inè, ô ze n’ôma wa sim̃osim̃o, ndô ô nènje mpoṉo y’Anyambyè nt’are rèti. 22Are kwèkwè gôre zwè gô pe mpagô gôre Sezar, mbè azwè ga rig’ava? 23Yesu amyeṉi avôṉô maô, n’awiṉizi yè waô inè: 24Revaṉi myè fura. Yi re n’ôzô wa mande n’irèndo kè ya mande? Awiṉizi waô inè, yi Sezar. 25N’awulinyi yè waô inè: Sambô, vaṉi Sezar yom̃a yi Sezar, n’Anyambyè yom̃a y’Anyambyè. 26Yeṉo wi pa jolya gô kôt’agambi mè gw’azô m’aṉaga, ndô w’am̃ami g’ômwanja wi njiviri yè, n’alwaṉi waô dodo.

27Awèwo w’isadusi wi bulya nè, e zel’itôngwa, w’aṽyeṉi gôre Yesu, aṽambyè kotè yiṉo inè: 28Ôṉènji, vôna nt’arèndinyô zwè ne Môsès inè: Ja mwô’ gwè w’ôma ajuwa, arig’ômwantô wè, ndô e pa tig’awaṉa, gambèṉè mwô’ngi yè e ga yômb’ômwantô mè, ko yè jaṉ’awaṉa gôre mwô’rgi yè. 29Avegagi ngwè mori y’aṉôm̃e ôrwageṉô. Ayômbi ôlônga ômwantô, n’ayuwi yè awaṉa fo. 30Yeṉo kè w’aṽaṉi na w’ararô w’ayômbi ôtika; 31egolaṉi mèmô kè waô ôrwageṉô w’ayômbi yè, ayuwa kè awaṉa fo. Gô num̃uṉa ayuwi kè ômwantô. 32Sambô gw’itôngunyô e be dwaṉ’ômwantô wa mande gôre waô? 33Konde waô ôrwageṉô w’ayômbi yè. 34N’awiṉizô waô ne Yesu inè: Awaṉa wi ntye yiṉo wi jômba ayômbizô kè; 35ndô waô wi be jeṉô n’inyanga nyi dènge mbôra gô ntye mèyo yi bya na gw’itôngunyô avila gw’ijuwa w’ayômbe ge jômbizô. 36Konde w’arô jolye juwe nyèṉè, konde wi be dwaṉa ga iyenjèl, ko waô dwaṉa kè awaṉa w’Anyambyè, n’awaṉa w’itôngunyô. 37Ndô inè, mongi wi re juwa pa wi tôngunyô, vangaṉe Môsès e myeza g’ômwanja wa mw’erere, gô fweyè Rerè inè, Anyambyè y’Abraam, n’Anyambyè y’Izaak, n’Anyambyè yi Yakob. 38Anyambyè arang’ Anyambyè ya mongi wi re juwa pa, ndô ya mongi wi re bo; konde waôdu wi dwaṉa bo vo yè. 39N’awèwo w’irèndisi w’awiṉizi awulya inè: Ôṉènji, ô re kamba pa mbyambye. 40Na wi re tô jolye nyèṉè gô bambyè kotè.

41N’awulinyô waô ne Yesu inè: Wi bulya nè, Krist ômwaṉa wi David sèṉi? 42David ayèmè e bulya gw’ezangô z’Ijembô inè: Rerè awulinyi Reri yam̃ inè: Lwaṉa baru g’ôgo wam̃ ôṉôm̃yè, 43kaô my’apang’ilôvalôvi yo iyariṉô ny’agôlô mo. 44Sambô David e fweyè inè, Rerè; ayè ko dwaṉ’ômwaṉi wè sèṉi?

45Gw’avôganyôgô yè n’aṉaga waôdu awulinyi iṉèngi yè inè: 46Gelimaṉi gôr’irèndisi, yi tonde kangaṉa n’irôgôsambala, na gô sanguṉô gw’agôliṉô; na gô dwaṉa gô bôngô y’ayôgô gw’inagô si soṉo, na gw’alwaṉô mi njôni gw’igeṽe; 47wi ny’inagô s’itika, agambiṉ’ikambiṉ’ida mpondyaga. Wiṉo wi be p’ôgara vyagaṉô.

Currently Selected:

Luk 20: MYE

Highlight

Copy