Ipakilya 23
23
1Ndô em̃eṉo zi Sara z’avegagi nkam̃a y’impum̃a mori n’agôm̃i m’impum̃’ambaṉi n’impum̃’ôrwageṉô; yiṉo ne impum̃a y’em̃èṉo zi Sara.
2Ndô Sara ayuwi gô Kiryat‐Arba, yi re gw’Ebron, gô ntye yi Kanaan; n’aṽyeṉi Abraam gw’iwoga nyi Sara na gô deṉè. 3N’agum̃aṉi Abraam avila g’ôzô w’ebende zè, agamba na mongi Èt inè: 4My’ôgènda n’ôlwaṉi gôre ṉwè, vaṉi myè gô niv’ôrôngiṉ’ôm̃ori avila gôre ṉwè, ko mi bèṉ’ebende zam̃, arômba zô avila g’ôzô wam̃. 5Ndô mongi Èt w’awiṉizi Abraam awulinyè inè: 6Vôganyô zwè, reri yazô! Awè ne ôvangiṉi w’Anyambyè gô garegare yazô; ṽèṉ’ebende zo gw’irôngiṉô yazô gô wô wi be pinjô wè; e zel’ôma gôre zwè wi be nim̃iṉô ôrôngiṉô wè gô bèṉ’ebende zo. 7N’agum̃aṉi Abraam avuraṉa mbè gôr’aṉaga wi ntye, gôre mongi Èt. 8N’agambi yè kè na waô inè: J’aṉw’ajivira inè, mi ga ṽèṉ’ebende zam̃ ko mi tômba zô avila gw’antyo mam̃, vôganyôṉi myè ko kambiṉaṉ’Efron, y’ômwaṉ’ôṉôm̃e wi Sôar, g’ômwanji wam̃, 9ko yè pa myè ômpulungu wi Makpela, g’ôm̃ôndô wi ntyagi yè, ko yè pa myè wô vo njôṉi yi sika, kô wô dwaṉ’iwam̃ gô niv’ôrôngiṉô gô garegare yaṉi. 10Ndô Efron alwaṉi gôre mongi Èt; n’Efron, ya mwô’Èt, awiṉizi gôr’Abraam, gw’azô mi Èt na gôre waôdu w’ayingiṉi g’ômpômbala wi nkali yè, inè: 11Nyawè, reri yam̃, vôganyô myè! Mi po ntyaga, mi po ômpulungu wi re gô yô. Mi po yô gw’antyo m’awaṉa w’aṉagi wam̃; ṽèṉ’ebende zo. 12Ndô Abraam avuraṉi mbè gw’azô m’aṉaga wi ntye. 13N’agambi yè n’Efron kè gw’azô m’aṉaga wi ntye, inè: Vôganyô myè, kokolo! Mi po igôlô nyi ntyaga, wonga nyô avila gôre myè, ko mi bèṉ’ebende zam̃ gô yô. 14N’awiṉizi Efron gôr’Abraam, awulinyè inè: 15Rera, yogiṉô myè, ntyaga yi jôṉe inkam̃a s’isikèl nay si sika ya pupu, ndô ntyo myè ntyo wè ezande mèzo? Ṽèṉ’ebende zo. 16N’ayogiṉô Abraam Efron, n’avisiṉi Abraam Efron sika y’agambyô yè, gw’azô mi Èt, inkam̃a s’isikèl nay si sika ya pupu, mpisiṉi yi pisô gôre mongi wi kôla.
17Ntyaga y’Efron y’avegagi gô Makpela, swaswo ni Mamre, ntyaga, n’ômpulungu y’avegagi gô yô, ni rere yôdu yi re gô ntyaga na gw’im̃ôndô yôdu ya yô vingôvingô. 18Abraam aṉivi yô gw’antyo mi Èt na waôdu w’ayingiṉi n’ômpômbala wi nkali yè. 19Isam̃u yiṉo pyagaṉa pa, Abraam aṽèṉi Sara, y’ômwantu wè, g’ômpulungu wi ntyaga yi Makpela, swaswo ni Mamre, yô ne Ebron, gô ntye yi Kanaan. 20Ntyaga n’ômpulungu yi re gô yô y’alwaṉi gôr’Abraam gô niv’ôrôngiṉô avila gôre mongi Èt.
Currently Selected:
Ipakilya 23: MYE
Highlight
Share
Copy
Want to have your highlights saved across all your devices? Sign up or sign in
Published by the British and Foreign Bible Society in 1927.
