Ipakilya 22

1Ndô isam̃u yiṉo vya, Anyambyè agèṉizi Abraam, awulinyè inè: Abraam! N’ayiviri yè inè: Myè wiṉo. 2N’awulyi Anyambyè inè: Wong’ômwaṉi wo, ikiki nyo, nyi tondô wè, inè, Izaak; ko kènda gô ntye yi Môriya, ayirè vovo ntyagô yi pezô, gô nômba yi be teva myè wè.

3N’aṉongwi Abraam ibanga sôdu, aliry’epwe gô buru yè, n’awongi yè nyôngô mbaṉi na yè, n’Izaak y’ômwaṉi wè. N’ayaruṉi yè ikôṉi gô jire ntyagô agèndi yè gô mbôra y’awulinyô yè ne Anyambyè.

4Gô ntyugu yi ntyarô, arômbiṉi Abraam antyo mè, ayeṉe mbôra davadavye. 5N’awulinyi Abraam inyôngô sè inè: Rigaṉaṉi vèṉo ni buru, gambèṉè myè n’ômwaṉa, azwè be kènda kwanga gôgô gô saviṉa, ko zwè tô fwinya gôre ṉwè. 6N’awongi Abraam ikôṉi si ntyagô yi pezô, aralya sô gôr’Izaak y’ômwaṉi wè, n’arwaṉi yè ôgôṉi ni swaka g’ôgo wè. N’agèndi waôdu aṽaṉi mpo mô. 7N’awulinyi Izaak Abraam ya reri yè, inè: Rera! N’ayiviri yè inè: Myè wiṉo, ômwam̃. N’awulyi Izaak inè: Vôna, ôgôṉi n’ikôṉi, ndô ômwaṉa w’idombè wi jirô gô ntyagô yi pezô wi re na gweṉi? 8N’awiṉizi Abraam inè: Anyambyè ayèmè e be pôn’ômwaṉa w’idombè wi ntyagô yi pezô. N’agèndi waôdu aṽaṉi mpo mô.

9Gw’aṽyeṉi waô gô mbôra y’awulinyô yè ne Anyambyè, Abraam aṉôgi vovo mbôra yi jirô intyagô n’agenji yè ikôṉi. N’aliryi yè Izaak, y’ômwaṉi wè, aralyè gô mbôra yi jirô intyagô, g’ôlômba w’ikôṉi. 10Avila vovo Abraam anyonyuṉ’ôgo wè, awonge swaka gô jôṉ’ômwaṉi wè. 11N’aweyi yenjèl yi Yeôva avila g’ôrôṽa inè: Abraam! Abraam! Ayiviri yè inè: Myè wiṉo. 12N’awulyi yenjèl inè: Anyonyuṉ’ôgo wo gôr’ômwaṉa ge gô dendiṉè ôsam̃u edu, konde vèṉo my’avôrô inè, ô ty’Anyambyè, na inè, ô pa nim̃iṉa myè ômwaṉi wo, ikiki nyo. 13N’arômbiṉi Abraam antyo mè, ayeṉa; n’ayeṉi yè gô nyum̃i yè idomb’iṉôm̃e jaka pa n’imengô sè gw’ibaka; n’agèndi Abraam gô bong’idombè, ayiri yè nyô gô ntyagô yi pezô gw’inyanga ny’ômwaṉi wè ôṉôm̃e. 14N’aṽèti Abraam ina nyi mbôra mèyoṉo inè: Yeôva‐Yire. (Yeôva e be nunguṉa.) Yeṉo ga nte bulyô ṉèṉo wiṉo inè: Gô nômba yi Yeôva yi be jeṉô.

15N’aweyi yenjèl yi Yeôva Abraam avila g’ôrôṽa nyongo yi mbaṉi inè: 16My’are tanga p’ôrangô g’ôkuṽi wam̃, awulyi Yeôva inè: Gô re nè, ô re denda p’ôsam̃u wiṉo, ko wè anim̃iṉa myè ômwaṉi wo, ikiki nyo, 17mi be saviṉo mi be buṉiz’awaṉi wo ga igègèṉi y’ôrôṽa, n’egolaṉi ga ôzègè wi re g’ôzamba wi ntyuṽa, n’awaṉi wo wi be niv’ômpômbala w’ilôvalôvi. 18N’aṉongo mi ntye môdu mi be saviṉô gôr’awaṉi wo, konde nè ô re jogiṉô p’inyôy nyam̃. 19N’awinyi Abraam gôr’inyôngô sè, n’agum̃aṉi waô agènde mpo mô gô Beèr‐Seba, konde Abraam alwaṉagi gô Beèr‐Seba.

20Ndô isam̃u yiṉo pyagaṉa pa, Abraam awulinyô inè: Vôna, Milka kè are jaṉa p’awaṉ’aṉôm̃e gôre Nakor, ya mwô’ngi yo ôṉôm̃e. 21Uz, yi njalyè yè, ni Buz, ya mwô’ngi yè ôṉôm̃e, ni Kemuèl, rerè y’Aram, 22ni Kesèd, n’Azô, ni Pildas, ni Yidlaf, ni Betuèl. 23Ndô Betuèl ayaṉi Rebeka. Awaṉ’aṉôm̃e wiṉo eṉanay w’ayanyô ne Milka gôre Nakor, ya mwô’ngwè ôṉôm̃e w’Abraam. 24Ndô irondi nyè, ini nyè ne Reuma, ayè kè ayaṉi Teba ni Gaam, ni Taas, ni Maaka.

Currently Selected:

Ipakilya 22: MYE

Highlight

Copy