Ipakilya 24
24
1Abraam avegagi dômbiṉa pa pôlô vyagaṉô gw’em̃èṉo, n’Anyambyè aliwô asaviṉi Abraam gw’isam̃u yôdu.
2Ndô Abraam awulinyi nyôngô yè ônèro yi nagô yè, ôvenjavenji wi yom̃i yè yôdu inè: Kokolo, zôliz’ôgo wo gw’ivèvèṉi nyam̃; 3mi be tangizo ôrangô vo Yeôva, Anyambyè y’ôrôṽa, n’Anyambyè yi ntye, inè, awongiṉa du ômwaṉi wam̃ ôṉôm̃e ômwantô avila gôr’awawantô wi Kanaan wi re myè kômbiṉa pa. 4Ndô gènda gô ntye yam̃, na gô mbuṽe yam̃ gô bong’ômwantô gôr’ômwaṉi wam̃ Izaak. 5N’awiṉizô yè ne nyôngô inè: Vendetwa ômwantô ayivira gô sônga myè gô ntye yiṉo, gambèṉè myè ga ṽag’ômwaṉi wo ôṉôm̃e gô ntye y’avilyô wè? 6N’awulinyô yè ne Abraam inè: Ṽandam̃iṉa, ko awiṉiz’ômwaṉi wam̃ gôgô nyèṉè. 7Yeôva Anyambyè y’ôrôṽa, y’agogunyi myè avila gô nagô ya reri yam̃, n’avila gôre mbuṽe yam̃, y’agambi na myè, na y’arangiṉi myè ôrangô, inè: Mi be pe ntye yiṉo gôr’awaṉi wo, ayèmè e be tôm̃a yenjèl yè gô numbu yô, ko wè bong’ômwantô gôr’ômwaṉi wam̃ avila vovo. 8Ndô j’ômwantô ayivira gô sôngo, gambèṉè ô be dwaṉa yangayanga avila g’ôrangô wiṉo wi re myè tangiṉo pa, kaô dadyè aṽaga du ômwaṉi wam̃ ôṉôm̃e gôgô nyèṉè. 9N’azôlizi nyôngô ôgo wè gw’ivèvèṉi ny’Abraam, ya reri yè, n’arangi yè ôrangô gô penjavenj’isam̃u yiṉo.
10N’awongi nyôngô igôm̃i ny’ikamèli avila gw’ikamèli sa reri yè, n’agèndi yè, konde aṉiva ma reri yè môdu m’avegagi g’ôgo wè; n’agum̃aṉi yè agènda gô Mesôpôtamya gô nkala yi Nakor. 11N’alôṽizi yè ikamèli akotolo g’ôzamba wi nkala pyèrè n’everô z’aṉingô, gw’egômbe zi nkôlô, gw’egômbe zi kogw’antô gô per’aṉingô. 12N’awulyi yè inè: Yeôva, Anyambyè ya reri yam̃ Abraam, vanga myè, kokolo, gô dènga ṉèṉo wiṉo ga nte bela myè, ko tum̃inye nkèngo gôre reri yam̃ Abraam. 13Vôna, mi kum̃aṉa pyèrè n’ôgèy w’aṉingô, ndô awantô w’aṉaga wi nkala wi kogwa gô per’aṉingô. 14Ndô ga rwe inè, ômwaṉ’ômwantô wi be bulinyô myè inè: Zôny’imogi nyo, kololo, ko myè jonga, ko yè fwiṉiza myè inè: Yonga, na mi be jonja kè ikamèli so, ayè ga lwaṉ’ômwantô wi re wè kekiza pa gôre nyôngô yo Izaak; ko myè mya inè, ô re tum̃inya pe nkèngo gôre reri yam̃.
15N’arweṉi ayè e pe kamba, Rebeka, y’ayanyô gôre Betuèl, y’ômwaṉ’ôṉôm̃e wi Milka, y’ômwantô wi Nakor, ya mwô’ ngwè w’Abraam, agogwi talya p’imogi nyè g’ôṽega. 16Ndô ayè avegag’ôlèngwaṉi w’ômwantô wi mèpe jeṉô pôlô; ayè avegag’izali nyi re nyi pa dèwa n’ôṉôm̃e ni mori, ge yè myô n’ôṉôm̃y’edu; n’azum̃iṉi yè gw’everô ayôny’imogi nyè, avanda. 17N’avali nyôngô mangô gô dataṉa na yè, awulinyè yè inè: Kokolo, yonja myè aṉingô gw’imogi nyo. 18N’awulyi yè inè: Yonga, rera; n’azunge sônyi yè imogi nyè g’ôgo wè, ayonjè. 19Ndô gw’amazi yè gô jonjè awulyi nè: Mi be per’aṉingô kè gw’ikamèli so, kaô s’ajôra gô jonga. 20N’aṉègizi yè gô bôṉ’imogi nyè gw’iṽemba, n’arô pali yè mangô gô per’aṉingô gw’everô, n’ayonji yè ikamèli sôdu.
21N’avônô yè n’ôṉôm̃e mamaga, alwaṉa do gô mya vendetwa Yeôva are kèndyè pa ôgènd’ômbya, ntyo ômbe. 22N’arweṉi gw’amazi ikamèli ni jonga, ôṉôm̃e awongi ôm̃ôrô wi sika ya teṉateṉa w’avisi ereṉe zi sikèl, n’ilông’imbaṉi gw’ago mè, y’avisi igôm̃i ny’isikèl si sika ya teṉateṉa. 23N’awulinyè yè inè: Awè, ômwantô wa mande? Wulinya myè, kokolo; re mbôra gô nagô ya reri yo yi re myè gô dèwa? 24N’awulinyè yè inè: Myè ômwaṉ’ômwantô wi Betuèl, y’ômwaṉ’ôṉôm̃e wi Milka, w’ayanyô yè gôre Nakor. 25Arô bulinyi yè kè inè: Azwè re n’am̃aṉi n’imba sinyenge, ni mbôra yi dèwô kè. 26N’avuraṉi ôṉôm̃e mbè, azaviṉe Yeôva. 27N’awulyi yè inè: Ôzaviṉô gôre Yeôva, Anyambyè ya reri yam̃ Abraam, yi re e pa tômbe nkèngo yè n’ôrèti wè gôre reri yam̃; vangaṉe myè, Yeôva are kèndya pa myè gô nagô ya mwô’ngwè ôṉôm̃e wa reri yam̃.
28N’avali ôlèngwaṉi w’ômwantô mangô gô takily’agamba miṉo gô nagô yi ngi yè.
29Ndô Rebeka avegagi na mwô’ngwè ôṉôm̃e, ini nyè ne Laban, n’agogwi Laban ni mangô gôr’ôṉôm̃e gw’everô. 30N’arweṉi gw’ayeṉi yè ôm̃ôrô n’ilônga gw’ago ma mwô’ngi yè ômwantô, na gw’ayogyô yè agamba mi Rebeka, ya mwô’ngi yè, inè: Yeṉo akamb’ôṉôm̃e na myè, aṽyeṉi yè gôr’ôṉôm̃e; ndô vôna, w’avegagi kum̃aṉa pa pyèrè n’ikamèli gw’everô. 31N’awulyi yè iṉè: Yôgô, awè yi saviṉô ne Yeôva! Ntiṉa nde yi kum̃aṉo gw’igala? My’are kekiza pe nagô ni mbôra y’ikamèli. 32N’ayingiṉ’ ôṉôm̃e gô nagô. N’avuruṉi Laban ikamèli, n’aveṉi yè am̃aṉi n’imba gôr’ikamèli, n’aṉingô gô jôvuṉ’intyôzô s’ôṉôm̃e, n’intyôzô s’aṉaga w’avegagi na yè. 33N’alôṽyô inya gôre yè gô nya. Ndô awulyi nè: Mi pa nya, kaô my’abuly’igambi nyam̃. N’awulyi Laban inè: Gamba. 34N’awulyi yè inè: Myè nyôngô y’Abraam. 35Ndô Yeôva are saviṉa pe reri yam̃ pôlô, ko yè penda pôlô. Are pè p’adombè, n’inyare, ni sika ya pupu, ni sika ya teṉateṉa, n’inyôngô iṉôm̃e, n’inyôngô inyantô, n’ikamèli, n’iburu. 36Ndô Sara, y’ômwantô wa reri yam̃, ayaṉi ômwaṉ’ôṉôm̃e gô mbôlô yè, ndô are pè pa yom̃a yôdu yi re na yè. 37Ndô reri yam̃ arangizi my’ôrangô inè: Awongiṉa du ômwaṉi wam̃ ôṉôm̃e ômwantô avila gôr’awaṉ’antô wi Kanaan gô ntye yaô yi dwaṉô myè. 38Ndô gènda gô nagô ya reri yam̃, na gôre mbuṽe yam̃, ko bong’ômwantô gôr’ômwaṉi wam̃. 39Ndô my’awulinyi reri yam̃ inè: Vendetwa ômwantô ayivira gô sônga myè. 40N’awulinyè myè inè: Yeôva, y’agangaṉô myè g’ôzô wè, e be tôm̃e yenjèl yè na wè, ko yè pang’ôgèndo wo mbyambye, ko wè bong’ômwantô gôr’ômwaṉi wam̃ avila gôre mbuṽe yam̃ n’avila gô nagô ya reri yam̃. 41Gambèṉè ô be dwaṉa yangayanga avila g’ôrangô wi re wè tangiṉa pa myè. 42Ndô gw’aṽyeṉi myè ṉèṉo gw’everô, my’awulyi nè: Yeôva, Anyambyè ya reri yam̃ Abraam, kokolo, j’aw’abel’ ôgèndo wam̃ gô kènda mbyambye, 43vôna, mi kum̃aṉa pyèrè n’everô z’aṉingô; gambèṉè ôlèngwaṉi w’ômwantô wi be kogwa gô per’aṉingô, ko mi bulinyè nè: Yonja myè, kokolo, yom̃’ aṉingô avila gw’imogi nyo, 44ko yè fwiṉiza myè inè: Yong’awèmè, na mi be perea kè ikamèli so, ôlèngwaṉi w’ômwantô mèwoṉo e ga lwaṉ’ômwantô wi re kekizô pa ne Yeôva gôr’ômwaṉa wa reri yam̃. 45Ndô myè mazaga ro gô kamba n’ôrèm̃i wam̃, vôna, Rebeka abya, talya p’imogi nyè g’ôṽega, azum̃iṉa gw’everô, aver’aṉingô, abulinya myè yè inè: Kokolo, yonja myè aṉingô. 46N’azunge sônyè imogi nyè avila g’ôṽegi wè, awulya nè: Yonga, ko mi jonja kè ikamèli so. My’ajongi, n’ajonji yè kè ikamèli. 47N’aṽambyi myè yè inè: Awè, ômwantô wa mande? Ajivirè inè: Myè, ômwaṉ’ômwantô wi Betuèl, y’ômwaṉ’ôṉôm̃e wi Nakor, w’ayanyô ni Milka gôre yè. N’aweli myè ôm̃ôrô g’ômpômbô wè n’ilônga gw’ago mè. 48N’apuraṉi myè mbè azuminye Yeôva, azaviṉe Yeôva, Anyambyè ya reri yam̃ Abraam, y’akèndya myè gô mpoṉo ya rèti ko mi bong’ômwaṉ’ômwantô wa mwô’ngwè ôṉôm̃e wa reri yam̃ gôr’ômwaṉi wè ôṉôm̃e. 49Ndô vèṉo j’aṉw’abele dènde nkèngo n’ôrèti gôre reri yam̃, wulinyaṉi myè; ndô ja e zele yeṉo, wulinyaṉi myè kè, gambèṉè mi be kegwa gô nkôṽa y’ôg’ôṉôm̃yè ntyo gô nkôṽa y’ôg’ônyantwè.
50N’awiṉizi Laban ni Betuèl awulya inè: Ôsam̃u wiṉo w’apila gôre Yeôva, azwè aze ni ngulu yi kamba na wè mbe ge mbya. 51Vôna, Rebeka are g’ôzô wo, wongè ko kèndaga, ko yè dwaṉ’ômwantô w’ômwaṉa wa reri yo, ga nt’abulye Yeôva. 52N’arweṉi gw’ayogyô nyôngô y’Abraam agambi maô, azaviṉi gô ntye g’ôzô wi Yeôva. 53Ndô nyôngô agogunyi yom̃a yi sika ya teṉateṉa, ni yom̃a yi sika ya pupu, n’ingoy, ava sô gôre Rebeka; aveṉi kè ya yi njôni gôre mwô’ngi yè ôṉôm̃e na gôre ngi yè. 54N’anyeṉi waô ayonga, ayè n’aṉôm̃e w’avegagi na yè, n’alèwi waô, n’aṉongwi waô ibanga; n’awulyi nyôngô inè: Rigaṉi myè gô fwinya gôre reri yam̃. 55Mwô’ngi yè ôṉôm̃e ni ngi yè w’awulyi nè: Ômwaṉa e ga rô dwaṉe na zwè, ôṉambaṉi w’intyugu; avila vovo awè tô kènda. 56N’awiṉizi yè waô inè: Azimbyaṉi myè, konde Yeôva are panga p’ôgèndo wam̃ mbyambye; rigaṉi myè gô kènda, ko mi kènda gôre reri yam̃. 57N’awiṉizi waô inè: azwè ga weyeṉ’ ômwaṉa ko zwè bambyè ayèmè. 58N’aweyi waô Rebeka awulinyè inè: Ô bela gô kènda n’ôṉôm̃e wiṉo? N’ayiviri yè inè: Mi be kènda na yè. 59N’arigô waô Rebeka, ya mwô’ngi yaô ômwantô, n’ômwantô w’avari yè, ni nyôngô y’Abraam n’aṉagi wè. 60N’azaviṉi waô Rebeka, awulinyè inè: Awè, mwô’ngi yazô, lwaṉe ngwè yi ntozèny y’igôm̃i ny’intozèny, n’awaṉi wo wi ga niv’ ômpômbala w’ilôvalôvi yaô. 61N’agum̃aṉi Rebeka n’azali mè, avanda gw’ikamèli, n’azôngi waô ôṉôm̃e. Ni nyôngô awongi Rebeka agèndaga.
62N’aṽyeṉ’Izaak avila gw’everô zi Lakayroy, konde alwaṉi gô ntye yi nkôṽa yi Sud. 63Nkôlô y’avegag’ Izaak kogwa pa gô pikilyaga gw’intyaga; n’arômbiṉi yè antyo ayeṉa; ndô vôna, ikamèli s’aṽyagagi. 64N’arômbiṉi Rebeka antyo, ayeṉe Izaak, n’azum̃iṉi yè avila gô kamèli yè. 65N’awulinyi yè nyôngô inè: Ôma woṉo mande, wi bya gô ntyaga gô dataṉa na zwè? N’awinyô yè ne nyôngô, inè: Ayè ne reri yam̃. N’awongi Rebeka evèlèsi, aliziṉ’ôzô wè. 66N’arakilyi nyôngô Izaak isam̃u yôdu y’alendyô yè. 67N’agèndyi Izaak Rebeka gô nagô y’ikuku yi Sara, yi ngi yè; n’awongi yè Rebeka, n’arweṉi yè ômwantô wè; arondyè yè pôlô. Yeṉo azindyô Izaak ngi yè juwa pa.
Currently Selected:
Ipakilya 24: MYE
Highlight
Share
Copy
Want to have your highlights saved across all your devices? Sign up or sign in
Published by the British and Foreign Bible Society in 1927.
