Ipakilya 25

1N’arô bongi Abraam ômwantô, ini nyè ne Ketura. 2N’ayaṉi yè gôre yè Zimran, ni Yoksan, ni Medan, ni Madyan, ni Yisbak, ni Sua. 3N’ayaṉi Yoksan Seba ni Dedan. N’awaṉ’aṉôm̃e wi Dedan w’avegagi Asurim, ni Letusim, ni Leumin. 4N’awaṉ’aṉôm̃e wi Madyan w’avegagi Efa, n’Efèr, n’Anok, n’Abida, n’Eldaa. Wiṉo waôdu w’avegagi awaṉ’aṉôm̃e wi Ketura.

5Ndô Abraam aveṉ’igumbi nyè nyôdu ny’avegagi na yè gôr’Izaak. 6Aveṉi kè mpagaga gôr’awaṉ’aṉôm̃e w’antô w’alwaṉ’arondi mè, ayè e p’are bo arôm̃i yè waô bô avila gôr’Izaak, y’ômwaṉi wè, gô nkôṽa yi tongwa ni nkômbe, gô ntye yi tongwa ni nkômbe.

7Ndô siṉo n’intyugu s’impum̃a y’em̃èṉo z’Abraam: alwaṉi nkam̃a y’impum̃a mori n’agôm̃i m’impum̃’ôrwageṉô n’impum̃’itaṉè. 8N’azuli Abraam ômwèy, ayuwa, ayè dômbiṉa pa pôlô n’ôṉèro wa mbyambye, jôra pa n’em̃èṉo, n’alatizyô yè gôre mongi yè. 9Ndô awaṉi wè aṉôm̃e Izaak ni Yismaèl w’aṽèṉi yè g’ômpulungu wi Makpela, gô ntyaga y’Efron, y’ômwaṉ’ôṉôm̃e wi Sôar, ya mwô’Èt, swaswo ni Mamre. 10Yô ne ntyaga y’agôlyô ne Abraam gôre mongi Èt. Vovo aṽènyô Abraam ni Sara y’ômwantô wè.

11Abraam juwa pa, Anyambyè azaviṉi Izaak y’ômwaṉi wè. N’alwaṉi Izaak pyèrè n’everô zi Lakayroy.

12Ndô siṉo ne imbamba si Yismaèl, y’ômwaṉ’ôṉôm̃e w’Abraam, w’ayanyô ne Agar w’Egipt, nyôngô nyantô yi Sara, w’ayanyô yè gôr’Abraam.

13Miṉo ne ana m’awaṉ’aṉôm̃e wi Yismaèl, vo ani maô, ga nt’ar’ampôm̃i maô: njalyè yi Yismaèl ne Nebayot, ni Kedar, n’Adbeèl, ni Mibsam; 14ni Misma, ni Duma, ni Masa; 15n’Adar, ni Temar, ni Yetur, ni Nafis, ni Kedma. 16Wiṉo ne awaṉ’aṉôm̃e wi Yismaèl, miṉo ne ani maô ga nt’ar’inkali saô, n’inagô saô s’adô, w’avegagi igôm̃i ny’ivangiṉi n’ivangiṉi mbaṉi y’aṉagi waô.

17Yiṉo ne impum̃a y’em̃èṉo zi Yismaèl, nkam̃a y’impum̃a mori n’agôm̃i m’impum̃’ararô n’impum̃’ôrwageṉô. N’azuli yè ômwèy, ayuwa, n’alatizyô yè gôre mongi yè. 18Awaṉ’aṉôm̃e wiṉo w’alwaṉi avila gw’Avila, kwanga gô Sur, yi re swaswo n’Egipt, gô kènda gw’Asur. N’alwaṉi yè gw’azô m’awareri yè aṉôm̃e waôdu.

19Siṉo ne imbamba s’Izaak, y’ômwaṉa w’Abraam. Abraam ayaṉi Izaak. 20Izaak avegag’agôm̃i m’impum̃a g’ôṉèro gw’ayômbi yè Rebeka y’ômwantô wè, y’ômwaṉ’ômwantô wi Betuèl, ya mwô’Sirya, avila gô Padanaram, na ya mwô’ngwè ômwantô wi Laban, ya mwô’Sirya. 21N’agweni Izaak Yeôva inkolo g’ômwanja w’ômwantô wè, konde avegagi nkele; n’ayogiṉô yè ne Yeôva, avundigi Rebeka, y’ômwantô wè. 22N’aruli awaṉa waô na waô gw’iwum̃u nyè, n’awulyi yè inè: J’adwaṉa yeṉo, ntiṉa nde y’avundigi myè? N’agèndi yè gô bambye Yeôva. 23N’awulinyô yè inè: Aṉongw’ambaṉi mi re gw’iwum̃u nyo, n’aṉag’aṽaṉi wi be keraṉa gô kogwa avila gw’isègè yo, n’ôm’ôm̃ori avila gôre wiṉo e be dwaṉa ni ngulu vyagaṉô n’ôm̃ori; n’ôṉèro e be janjiṉ’erumbe. 24Ndô gw’agek’intyugu sè si jaṉa, vôna, avegag’ampaza gw’iwum̃u nyè. 25N’agogw’ôlônga teṉateṉa, ôkuṽa wôdu ga ngoy mpôlô y’imya; n’aṽèti waô ini nyè inè: Esau. 26Ndô mwô’ngi yè ôṉôm̃e agogwi gô nyum̃i yè, ôgo wè kôta pa gô ntumbu y’Esau. N’aṽèti waô ini nyè inè: Yakob. Ndô Izaak avegag’agôm̃i m’impum̃’ôrôṽa g’ôṉèro gw’ayanyô waô.

27N’avôm̃’awaṉa wiṉo, ndô Esau arweṉ’ômbeṉa w’avôṉô, ôma w’iga; ndô Yakob avegag’ôṉôm̃e wa kendekende, ndwaṉaga gw’inagô s’akuku. 28Ndô Izaak arondagi Esau, konde anyagagi ṽèrè y’ayôṉôgô yè. N’arondi Rebeka Yakob.

29N’aṉambi Yakob ônyagô; n’aṽyeṉi Esau avila gw’iga, ôkuṽa jasa pa pôlô. 30N’awulinyi Esau Yakob inè: Kokolo, riga myè gô ny’ônyagô wa teṉateṉa wiṉo, konde my’akènde ntyèla. Yeṉo aṽètyô ini nyè inè Edom. 31N’awulyi Yakob inè: Gôla na myè ṉèṉo wiṉo inyangi nyo ny’ôṉèro. 32N’awiṉizi Esau inè: Vôna, my’atweṉi pyèrè gô juwa, n’inyanga nyiṉo ny’ôṉèro nyi re n’isolo ande gôre myè? 33N’awulyi Yakob inè: Rangiṉa my’ôrangô ṉèṉo wiṉo. N’arangi yè wô, agôl’inyangi nyè ny’ôṉèro gôre Yakob. 34N’aveṉi Yakob Esau inya n’ônyagô wi ngwala, n’anyeṉi yè, ayonga, avila vovo agum̃aṉi yè agèndaga. Yeṉo avèdy’Esau inyangi nyè ny’ôṉèro.

Currently Selected:

Ipakilya 25: MYE

Highlight

Copy