Rôm̃i 23

1Avôni Pol ôvagô ngolongolo, awulya inè: Awarera, my’are dwaṉa pa ga nt’are kwèkwè g’ômwanja w’ivanga ny’Anyambyè kwanga ṉèṉo wiṉo.

2Miṉisè mpôlô Ananyas azômbyi waô w’avegagi kum̃aṉa pa pyèrè na yè inè, wi ga wôle yè g’ôgwaṉa. 3Vovo Pol awulinyi yè inè: Anyambyè e be bôlo, awè ôgômba kembô pa pupu! Ô dwaṉa baru gô jèkèlya myè ga nt’ar’ivanga, ko wè tô sômbya myè gô bôlô ga nt’are zele swaswo n’ivanga? 4Waô w’avegagi kum̃aṉa pa pyèrè na yè w’awulyi nè: Ô toṽe miṉisè mpôlô y’Anyambyè? 5N’awulyi Pol inè: Awarera, mi pa mya inè, ayè miṉisè mpôlô, konde re tèndô pa inè: Agamb’igamb’iṽe g’ômwanja w’ôvangiṉi w’aṉagi wo.

6Gw’amyeṉi Pol inè, nkumba mori y’isadusi ni nkumba mori y’ifarisi, arôngi g’ôvagô inè: Awarera, myè farisi, n’ômwaṉa wi farisi; mi sozizô ṉèṉo wiṉo g’ômwanja w’igum̃u na g’ômwanja w’itôngwa sa mongi wi re juwa pa. 7Gw’awulyi yè yeṉo, arweṉ’inyôm̃aṉô gôr’ifarisi n’isadusi, n’ayarwaṉi ôvagô. 8Konde isadusi si bulya inè, e zel’itôngwa, ge yenjèl, ge iṉiṉa, ndô ifarisi si mème yom̃a mèyoṉo yôdu. 9N’arweṉ’ôtogo ômpôlô, n’irèndisi imyèwo yi nkumba y’ifarisi, y’agum̃aṉi azoza inè: Azwè pa dènge ndaga mbe gôr’ôma wiṉo; twa pa iṉiṉa ntyo yenjèl yi re kamba pa na yè. 10Gw’arweṉ’inyôm̃aṉô mpendaga, kapitèn aryeṉi nè, Pol e vende jaruṉô imbèy n’aṉaga mèwoṉo; yeṉo azômbyi yè isozè gô ke bongè ni ngulu avila gôre waô, agèndyè gô nagô y’adô.

11Ôgwèra wi ntyugu mèyoṉo, awôm̃unyi Rerè gôre Pol awulya inè: Zindy’ôrèm̃a, konde ga nt’are wè takilya pa g’ômwanji wam̃ gô Yerusalèm, ô be takilya kè yeṉo gô Rôma.

12Gw’ayenj’ôwenja, Iju s’am̃og’erungu, avangaṉa n’ôrangô inè, w’anye ge jonga kaô w’ajôṉe Pol. 13Waô w’am̃og’erungu ziṉo w’avegagi vyagaṉô n’agôm̃i m’aṉag’anay; 14n’agèndi waô gôr’imiṉisè impôlô n’aṉèro, awulinya waô inè: Azw’are taga p’ikuṽi yazô n’ôrangô ômpôlô inè, azw’alemb’ezom̃a z’inya kaô azw’ajôṉe Pol. 15Sambô, aṉwè n’ôvagô ṽambyaṉi kapitèn gô bagè gw’azô maṉi, mpaṉi ga ṉwè bele jèkèlye ndagi yè mbyambye vyagaṉô; n’azwè, ayè zusaga ro pyèrè, azw’are keka pa gô jôṉè.

16Ndô mwô’ndakô wi Pol ayogyô erungu zaô, n’agèndi yè gô nagô y’adô gô myeze Pol. 17N’aweyi Pol yôfisyè mori gôre yè, awulya inè: Gèndiz’iwanjo nyiṉo gôre kapitèn, konde are ni ndaga gô bulinyè. 18Yeṉo awongi yôfisyè iwanjo mè, agèndizè gôre kapitèn, awulya inè: Ôkôte Pol afweya myè, aṽègya myè gô bag’iwanjo nyiṉo gôre wè, are ni ndaga gô bulinyo. 19N’agôti kapitèn agôt’iwanjo g’ôgo, alurè nkôṽa, aṽambyè ntyorya inè: Ezom̃a nde zi re wè gô bulinya myè? 20Ayiviri yè inè: Iju si re kenja pa gô bambyo gô bage Pol mèṉè g’ôzô w’ôvagô, mpaṉi ga wi bele jèkèlya mbyambye vyagaṉô g’ômwanji wè. 21Sambô avôganyô waô, konde e kondô vyagaṉô n’agôm̃i m’aṉag’anay, wi re taga p’ikuṽi yaô n’ôrangô inè, w’any’ezom̃a ge jonga kaô w’ajôṉe Pol; na vèṉo wi re keka pa, wi bônda kaô ijiviri so. 22N’arigi kapitèn iwanjo gô kènda, n’awulinyè yè inè, awuliny’ôma inè, ô re myeza pa myè isam̃u yiṉo.

23N’aweyi yè yôfisyè mbaṉi, awulya inè: Gekizaṉi nkam̃a s’isozè mbaṉi, n’aṉaga wi panda gw’ikaṽala agôm̃i ôrwageṉô, na mongi wi kôt’agonga nkam̃a mbaṉi, gô kènd’agwèr’eṉôgôm̃i m’ôgwèra kwanga gô Sezare. 24Azômbyi yè waô kè gô kekiz’inyam̃a si be fwela waô Pol, ko waô bagè mbyambye gôre Felikisi, yi guvèrnèr. 25N’arèndi yè ezangô inè:

26Klôdyon Lizyas gôre guvèrnèr mbyamè Felikisi, mbôlô!

27Ôṉôm̃e wiṉo agôtyô n’Iju, arô jônyô ne waô, yeṉo aṽyeṉi myè n’isozè gôre yè, avaruṉè gôre waô, myè kôtiza pa inè, ayè mwô’Rôma. 28N’aṽeli myè gô mye ntiṉa y’azozizi waô yè; yeṉo aṽagi myè yè g’ôzô w’ôvagô waô. 29N’alèngi myè inè, e sozizô g’ômwanja w’impaga s’ivangi nyaô, ndô e pa dende ndaga mbe yi re yè n’inyanga nyi juwa ge gô fwelô gô ntyôgô. 30Gw’amyezô myè inè, Iju s’abôndiṉi yè ebônda, my’asunge tôm̃è gôre wè, azômbye mongi sozizè inè, wi ga gènde gô sozizè g’ôzô wo. Mbyambye.

31Yeṉo awong’isozè Pol ga nt’azômbyô waô, agèndizè ôgwèra gw’Anti’patris. 32Ndô bunya, w’arigi mongi wi panda gw’ikaṽala gô kènda na yè, awinya gô nagô y’adô. 33Gw’aṽyeṉi waô gô Sezare, mongi wi panda gw’ikaṽala w’aveṉi ezangô gôre guvèrnèr, alôṽye Pol kè g’ôzô wè. 34Guvèrnèr tanguṉa p’ezangô, aṽambyi yè Pol elele z’avilyô yè. Gw’agôtizi yè inè, avili gô Kilikya, awulyi yè inè: 35Mi be pôganyô ôzozo wo gô be bye mongi wi sozizo. N’azômbyi yè inè, Pol e ga venjavenjô gô nagô mpôlô y’Erod.

Currently Selected:

Rôm̃i 23: MYE

Highlight

Copy