Rôm̃i 24
24
1Ntyugn ôtaṉè vya, aṽyeṉ’Ananyas yi miṉisè mpôlô, n’aṉèro n’ôkambi ôm̃ori, ini nyè ne Tèrtule. Azozizi waô Pol gôre guvèrnèr.
2Gw’ayogyô Pol, Tèrtule avakilyi gô sozizè, inè:
3Rera Felikisi, gô re nè azw’are n’am̃ènjè ampôlô vo wè, na inè, vo nkenjiṉi yo isam̃u imyenge yi re kenjô pa mbyambye gw’iṉongo nyiṉo, gw’impoṉo sôdu na gw’imbôra sôdu, azwè bong’isam̃u yiṉo n’akeṽ’ampôlô gôre wè. 4Ndô aranga gô jasizo vyagaṉô, kokolo, gô nkèngo yo, vôganyô zwè agamba ma kwè. 5Azw’are dènga p’ônôm̃e wiṉo ôma wi njuke, e sug’anyôm̃aṉô gôr’Iju sôdu si ntye yôdu, ayè kè n’ôma re gw’ewônjô zi nkumba ya mongi Nazarèt, ayè kè agèṉizi gô fwevize nagô y’Anyambyè. 6N’agôti zwè yè. Azw’aṽeli gô jèkèlyè ga nt’ar’ivangi nyazô; 7ndô gw’aṽyeṉi Lizyas, yi kapitèn, awongi yè avila gw’ago mazô ni ngulu mpôlô, nsômbyaga mongi sozizè inè, wi ga ṽye g’ôzô wo. 8Jogo w’akotizè awèmè, ô be jolye kôtiza avila gôre yèmè g’ômwanja w’isam̃u yiṉo yôdu yi soziza zwè yè.
9Iju s’agweṉi gô sozizè n’agamba mèmô, njiviraga inè, isam̃u yiṉo yi re yeṉo.
10Gw’avèpyô yè ne guvèrnèr gô kamba, Pol awiṉizi nè:
Gô re nè my’avôrô inè, ô re dwaṉa p’impum̃’imyenge ôyèkèli gw’iṉongo nyiṉo, mi tonda pôlô gô kaṉ’ôkuṽi wam̃ g’ôzô wo. 11Awè ko mya inè, pa pyagaṉ’ôṉambaṉi w’intyugu, myè ga pande gô Yerusalèm gô saviṉa. 12Wi pa diṽinya myè kè ndôṽage mpaga n’ôma ge njivag’edungu gô nagô y’Anyambyè, ge gô nagô yi soṉo, ge gô nkala. 13Wi pa jolye dwaṉiza kè gôre wè isam̃u yi soziza waô myè vèṉo. 14Ndô igamba nyiṉo nyô mèmô myè gôre wè inè, mi janjiṉ’Anyambyè y’ireri sam̃, ga nt’are mpoṉo yi fweyô waô inè, ôṽangwaṉô mbekelyag’isam̃u yôdu yi re tèndô pa gw’ivanga na gô yangô y’ivogisi. 15My’are kè n’igum̃u nyiṉo gôr’Anyambyè, ga nt’are waô kè, inè, e be dwaṉ’itôngunyô s’aṉag’aṽya n’aṽe. 16Yeṉo kèṉiza myè gô dwaṉa n’ôrèm̃a ntyèmbo fo, g’ôzô w’Anyambyè na gw’azô m’aṉaga. 17Impum̃’imyenge pyagaṉa pa myè gôr’aṉongo, aṽyeṉi myè gô bage mpagaga gw’iṉongo nyam̃, na gô jir’intyagô. 18Gw’ayiragi myè sô, Iju inyèwo s’avili gw’Azya s’aliṽinyi myè jombunyô pa gô nagô y’Anyambyè, aranga ni nkumba y’aṉaga ge n’edungu. 19Mongi mèsoṉo w’avegagi n’inyanga nyi diwô vèṉo g’ôzô wo gô soziza myè, jogo w’adwaṉa ni ndaga na myè. 20Ntyo aṉaga wiṉo wi ga rakilye, ndaga mbe y’alèngyô waô gôre myè, gw’agum̃aṉi myè g’ôzô w’ôvagô, 21kaô du mi kotizô ṉèṉo wiṉo g’ôzô wo g’ômwanja w’igamba mènyoṉo ny’arôngyô myè gw’agum̃aṉi myè gô garegare yaô: Nyô ne g’ômwanja w’itongwa sa mongi wi re juwa pa.
22Gw’agôtizi Felikisi g’ômwanja w’inènja mèsoṉo, awiṉizi waô, awulinya waô inè: Gô be bye Lizyas yi kapitèn, gambèṉè mi be teṉiz’igambi nyaṉi. 23N’azômbyi yè yôfisyè inè, e ga venjavenje Pol, ndô kaô gô ntyôgô y’antyo, ko yè aleg’indegô sè gô bya gô janjiṉè.
24Intyugu sinyèwo vya, aṽyeni Felikisi ni Drusila, y’ômwantô wè, ya mw’Iju, n’aweyi yè Pol. Avôganyô yè g’ômwanja w’ibekelya si Krist‐Yesu. 25Ndô gw’agambi Pol g’ômwanja w’ôgôre, na g’ômwanja w’inim̃iṉa s’ôkuṽa, na g’ômwanja w’ijèkèlya si bya, Felikisi aryeṉi awulya inè: Egômbe ziṉo gèndaga; gô be dènga myè egômb’eṽya, mi be fweyo. 26Avegagi kè n’igum̃u inè, e be pô sika ne Pol gô puruṉè; yeṉo aweyagi yè yè egômbe zôdu, ayir’elombè na yè.
27Impum̃’imbaṉi vya aṽyeṉi Porsyus Festus gw’inyanga nyi Felikisi. Gw’aṽeli Felikisi gô tondy’Iju, alèkizi Pol gô ntyôgô.
Currently Selected:
Rôm̃i 24: MYE
Highlight
Share
Copy
Want to have your highlights saved across all your devices? Sign up or sign in
Published by the British and Foreign Bible Society in 1927.
