Rôm̃i 22

1Awarerè n’irerè, vôganyôṉi nte kamba myè vèṉo na ṉwè gô kaṉ’ôkuṽi wam̃.

2Gw’ayogyô waô inè, e kamba na waô ni nkambiṉi y’Ebèr, w’arô dwaṉi dodo pôlô. N’awulyi Pol inè:

3Myè mw’Iju, my’ayanyô gô Tarsis, gô ntye yi Kilikya, ndô my’avôm̃yô vèṉo gô nkala yiṉo, gw’agôlô mi Gamalyèl, aṉènjô mbyambye ga nt’ar’ivanga ny’ireri sazô, n’alwaṉi myè ni mpyô g’ôzamba w’Anyambyè, ga nt’are ṉwè du ṉèṉo wiṉo. 4Agombizi myè eṽilô ziṉo kwanga gw’ijôṉ’aṉaga, ntagaga waô ni nfwelaga waô gô ntyôgô aṉôm̃e n’antô ta. 5Ga nt’are miṉisè mpôlô n’aṉèro waôdu ko takilya g’ômwanji wam̃. W’aveṉi myè kè yangô gôr’awarerè wi Damas, ko mi kènda gôgô gô baga waô w’avegagi gôgô gw’eṽilô zi Krist aṽaga waô taga pa gô Yerusalèm gô jeṉizô azingô.

6N’arweṉi nè, gw’agèndagi myè gô mpoṉo azèvya pyèrè ni Damas, nkômbenyôndô, aṽamb’ôzang’ômpôlô pelè gôre myè vingôvingô avila g’ôrôṽa. 7Avôswi myè gô ntye, n’ayogyô myè inyôy nyi bulinya myè inè: Sol! Sol! ntiṉa nde yi kombizo myè? 8N’awiṉizi myè inè: Awè mande, Rera? N’awulinyi yè myè inè: Myè ne Yesu yi Nazarèt, yi kombizô wè. 9Waô w’avegagi na myè w’ayeṉi rèti ôzange, ndô wi pa jogw’inyôy ny’ôma w’agambi na myè. 10Vovo awulyi myè inè: Mi ga lende sèṉi, Rera? N’awulinyô myè ne Rerè inè: Ṉongwa, ko kènda gô Damas, vovo ô be bulinyô isam̃u yôdu yi re kenjô pa gôre wè gô denda. 11Gw’avegagi myè mi pa jolya gô jeṉa g’ômwanja w’ônjèlènjèlè mèwoṉo, waô w’avegagi na myè w’agôti myè g’ôgo agènda na myè gô Damas.

12N’aṽyeṉi gôre myè ôma, ini nyè ne Ananyas, ôma w’azaviṉag’Anyambyè ga nt’ar’ivanga, avegagi kè n’in’iṽya gôr’Iju sôdu s’alwaṉagi gô Damas, 13aṽyeṉi gôre myè agum̃aṉa pyèrè na myè, awulya inè: Mwarera, Sol, yeṉa. Ayeṉi myè gw’igwèra mènyoṉo. 14N’awulyi yè inè: Anyambyè y’ireri sazô are pinjo pa gô mye ntondiṉi yè, na gô jeṉ’Ôma w’ôgôre, na gô jogw’agamba m’ôgwaṉi wè; 15konde ô be dwaṉ’ôyeṉi wè gôr’aṉaga waôdu, gô takilya isam̃u yi re wè jeṉa pa ni jogo pa. 16Na vèṉo, ô pengiṉ’ande? Ṉongwa, ko batizô ayôvuṉô ibe so, ndagiṉag’ina nya Rerè.

17Myè fwinya pa gô Yerusalèm, gw’agambiṉagi myè gô nagô y’Anyambyè, my’arweṉi egolaṉi g’ôma re gw’antyôviṉô, 18n’ayeṉi myè Rerè e bulinya myè inè: Zunge dubwe ngwambè avila gô Yerusalèm, konde wi ze bong’agamba g’ômwanji wam̃ avila gôre wè. 19N’awulyi myè inè: Rera, waômè w’avôrô inè, my’aweli gô ntyôgô aziṽa gw’inagô si soṉo sôdu waô w’aṽekelyi wè, 20na gw’avôvizyô ntyiṉa y’ôyeṉi wo Stefan, my’avegagi vovo, ayivir’igamba, mpenjavenjag’ingoy sa mongi w’ayôṉi yè. 21Vovo awulinyi yè myè inè; Gènda, konde mi be tôm̃o bô gôr’aṉongo.

22Avôganyô waô yè kwanga gw’igamba mènyoṉo. Ndô w’arômbiṉ’anyôy maô, awulya inè: Rômb’ôma ôṉongo wiṉo avila gô ntye! E zele n’inyanga nyi dwaṉa bo. 23N’awôgiṉi waô, avung’ingoy saô, anyèny’iroy gw’igôṉô. 24N’azômbyi kapitèn inè, Pol e ga yinginyô gô nagô y’adô, ko yè kotizô n’iziṽô, ko yè mye ntiṉa y’awôgiṉi waô yeṉo gôre yè. 25Waô tagè pa gô siṽè, Pol awulinyi yôfisye y’avegagi vovo gôre inè: Ivanga nyi pa ṉwè inyanga nyi siṽa mwô’Rôma, gôre yè pa p’ôgara? 26Gw’ayogyô yôfisyè agamba miṉo, agèndi gôre kapitèn gô myezè, awulya inè: Ô bela gô dend’ande vèṉo? Ôṉôm̃e wiṉo mwô’Rôma. 27N’aṽyeṉi kapitèn, awulinye Pol inè: Wulinya myè, awè mwô’Rôma? Ayiviri yè inè, èñ. 28Awiṉizi kapitèn inè: My’agôl’inyanga nyiṉo nya mwô’ntye ni sika nyenge. N’awulyi Pol inè, ndô myè my’ayanyô mwô’Rôma. 29Vovo azunge tigi waô w’arô kotizi yè arigè dyè, gw’amyeṉi kapitèn inè, Pol mwô’Rôma, aryeṉi konde aliwô atagi yè.

30Bunya, gw’aṽeli kapitèn gô mye ntiṉa rèti y’azozizyô yè n’Iju, avuruṉi yè, azômby’imiṉisè impôlô n’ôvagô w’Iju gô dataṉa; avila vovo aṽagi yè Pol, alôṽyè gw’azô maô.

Currently Selected:

Rôm̃i 22: MYE

Highlight

Copy