Rôm̃i 19

1Gw’avegag’Apôlos gô Kôrinti, Pol, pyagaṉa pa gô lele y’ôlômba y’Azya, aṽyeṉi yè gw’Efèsi. Gw’aliṽinyi yè vovo iṉèngi, 2aṽambyi yè waô inè: Aṉw’avenyô Iṉiṉ’Iṽya, gw’aṽekelyi ṉwè? Awiṉizi waô yè inè: Vangaṉe gw’ijogo azwè pa jogo nè, ar’Iṉiṉ’Iṽya. 3N’awulyi yè inè: Sambô aṉw’aṽatizô gw’ibatiza sa mande? Ayiviri waô inè: Gw’ibatiza si Yôan. 4N’awulyi Pol inè: Yôan aṽatizi n’ibatiza s’iniga si nkôndi, mbulinyag’aṉaga inè, wi ga ṽekely’ôma wi be bya gô nyum̃i yè, ayè ne Yesu. 5Gw’ayogyô waô agamba miṉo, w’aṽatizyô gw’ina nya Rerè Yesu. 6Na gw’aralyi Pol ago mè gôre waô, Iṉiṉ’Iṽya ny’aṽyeṉi gôre waô, n’agambi waô inkambiṉi s’aṉongw’am̃èṉè avoga. 7W’avegagi pyèrè n’igôm̃i ny’aṉaga n’aṉag’aṽaṉi.

8N’ayingiṉi Pol gô nagô yi soṉo, n’agambi yè ni nkagandè. Vo agwèli ararô aṽènguṉag’isam̃u y’iṉongo ny’Anyambyè, mbelaga gô pang’aṉaga w’avôganyôgô yè gô jivira. 9Ndô gw’ayolizyô awèwo, ko w’ayogiṉô, nkambage mbe g’ômwanja wi mpoṉo ya Rerè gw’azô m’aṉaga, alubwi Pol avila gôre waô, alôṽ’iṉèngi nkumba ni yaô, aṉènjage ntyugw’edu gô nagô y’aṉènjagi Tiranus. 10N’alendagi yè yeṉo impum̃’imbaṉi; yeṉo waôdu w’alwaṉagi gw’Azya, Iju ni Grèk ta, jogw’igamba nya Rerè. 11N’ayanjag’Anyambyè lemba vôlô n’ago mi Pol; 12vèlèsè n’iṉamba y’arwanyô avila g’ôkuṽa wi Pol, agènda gôre mongi w’ayogyôgô inkaṉi, n’alubw’inkaṉi avila gôre waô, n’aṉiṉ’ambe kè m’agogwi.

13Aganga w’abambô w’Iju awèwo w’agangaṉagi mbôry’edu w’agèṉizi gô teta gôre waô w’avegagi n’aṉiṉ’ambe ina nyi Yesu, mbulyaga inè: Mi sômbya ṉwè vo Yesu yi kambiṉô Pol! 14Waô w’alendagi yeṉo w’avegag’awaṉ’aṉôm̃e ôrwageṉô wa mw’Iju, ini nyè ne Seva, yi miṉisè mpôlô. 15Awiṉizyô waô n’iṉiṉ’iṽe inè: My’avôrô Yesu, ni Pol kè my’avôrô yè; ndô aṉwè mande? 16N’ôṉôm̃e w’avegagi n’iṉiṉ’iṽe aṉweṉi na waô, ageṽa waô; yeṉo agogwi waô avila gô nagô mèyoṉo nfangaga tele ni bonjaṉa pa. 17N’igamba nyiṉo ny’amyenyô ne Iju waôdu ni Grèk waôdu w’alwaṉagi gw’Efèsi; n’agôtyô waôdu n’itya, n’ina nya Rerè Yesu ny’avendyô. 18Awenge gôre waô w’aliwô w’abekelyi w’aṽyeṉi gô mèma na gô takilya nt’are waô denda pa. 19N’awenge gôre waô w’alendag’isam̃u yi mamô n’avôṉô m’inôka, w’aṽagi yangô yaô, aveza yô gw’azô m’aṉaga waôdu: arangi waô njôni ya yô, alènga yô agôm̃i m’intozèny s’imbèy si sika ataṉè.

20Yeṉo avend’igamba nya Rerè pôlô ageṽe nkeṽaga.

21Isam̃u yiṉo vya, Pol agenji n’ôrèm̃i wè gô kènda gô Yerusalèm, mpyagaṉaga gô Makedônya n’Akaya. Awulyi yè inè, myè pila pa gôgô, mi ga yeṉe kè Rôma. 22N’arôm̃i yè gô Makedônya aṉag’aṽaṉi avila gôre waô w’aṉunguṉagi yè, Timôte n’Eraste, ndô ayèmè alèki mw’egômbe gw’Azya.

23Egômbe mè arweṉ’edungu evôlô g’ômwanja wi mpoṉo ya Rerè. 24Ôṉôm̃’ôm̃ori, ini nyè ne Demetryus, y’ôvangisi wi yom̃a yi sika ya teṉateṉa, avangagi golaṉi yi sika ya pupu yi nagô y’azaviṉôgô Dyana, alèngiṉaga mongi w’ayanji na yè ôb’ômpôlô mè. 25N’alatizi yè waô na mongi w’ayanjagi eṽilô mèmô, awulya inè: Aṉôm̃e, aṉw’avôrô inè, azwè dèng’igumbi nyazô n’eṽilô ziṉo: 26aṉwè jeṉa ayogo kè inè, aranga dadyè gw’Efèsi, ndô gô mbèy mpôlô y’Azya, Pol yiṉo are panga p’aṉag’awenge gô jivira agegunya waô, mbulyaga inè, inyambyè si pangô n’ago m’aṉaga arang’inyambyè; 27igamba nyi re nè, aranga dadyè inè, eṽilô zazô zi bele tw’ezom̃a zi pèdyô, ndô nagô kè yi saviṉô anyambyè nyantô mpôlô Dyana yi bele twa kè ôsam̃u wa nyawènyawè, ko yè tômbô avila gw’ivendi nyè, ayè yi saviṉô gw’Azya yôdu na gô ntye yôdu.

28Gw’ayogyô waô agamba miṉo, w’ayônyi n’eguṉu, avakilya gô bôgiṉa inè: Ômpôlô ne Dyana y’Efèsi!

29N’arweṉ’edungu gô nkala yôdu. N’ayiraṉi waôdu n’ôrèm̃’ôm̃ô gô nagô mpôlô yi fweyô inè, teatèr, n’agôti waô Gayos n’Aristarkos, aṉôm̃e wi Makedônya, irangaṉô yi Pol. 30Aṽeli Pol gô jingiṉa gôgô gôr’aṉaga, ndô iṉèngi y’alegi yè; 31n’aṉag’awèwo kè w’anyanga w’Azya, w’avegag’indegô sè, w’avung’ikamba gôre yè, agwenè inkolo inè, e ga rig’ayingiṉa gô teatèr. 32Awèwo w’arông’igamb’im̃ori, n’am̃ori igamb’inyèṉè, n’arweṉi mandô ôtog’ôrevô, ni mbèy mpôlô yi re mye ntiṉa y’avegagi waô dataṉa pa. 33Vovo agogunyi waô Alekisandri avila gô nkumba y’aṉaga, Iju nsinkègè, gô dôṽyè gw’azô m’aṉaga; n’avèpi Alekisandri ôgo gô bela gô kamba gôr’aṉaga. 34Ndô gw’amyeṉi waô inè, ayè mw’Iju, waôdu w’awôgiṉi mpo mô pyèrè n’agwèra mi nkola ambaṉi inè: Ômpôlô ne Dyana y’Efèsi!

35Ndô gw’avoṉiz’ôrèndisi wi nkala avoṉiz’aṉaga, awulyi nè: Aṉw’aṉôm̃e w’Efèsi, mande re pa mya inè, nkala y’Efèsi yi penjavenje nagô yi saviṉô Dyana mpôlô n’egolaṉi zè z’avôswi gô ntye avila g’ôrôṽa? 36Gô re nè isam̃u yiṉo y’ayolye dandô, sambô aṉwè ga lwaṉe dodo, ko ṉw’alend’ezom̃a n’etata. 37Konde aṉw’are baga p’aṉôm̃e wiṉo guṉu, wi re wi zele n’ôgara ge bundaṉ’inagô s’isaviṉa, ge pèdy’Anyambyè yazô nyantô. 38Sambô ja Demetryus na mongi janja na yè, wi re n’ôzozo n’ôma, intyugu s’ôzozo si re, na mongi wi teṉiz’izozo wi re; wi ga weyaṉe g’ôzozo. 39Ndô j’aṉw’are n’isam̃u imyèṉè, yi be teṉizô g’ôlataṉô wi re ga nt’ar’ivanga. 40Konde rèti azwè vènde sozizô g’ômwanja w’edungu z’apôswa ṉèṉo wiṉo, konde zi zele ni ntiṉa, n’azw’ ayolye teve ntiṉa y’ôlataṉô wiṉo. 41Ayè kamba p’agamba miṉo, azômby’aṉaga gô pazangaṉa.

Currently Selected:

Rôm̃i 19: MYE

Highlight

Copy