Rôm̃i 20

1Gw’avoṉi edungu, Pol alatiz’iṉèngi, alèkiza waô ôjaṉi, alubwi yè agènda gô Makedônya.

2Avyagaṉi yè intye mèsoṉo, ntevuṉag’iṉèngi pôlô. 3Avila vovo aṽyeṉi yè gô ntye yi Grèk; alwaṉi yè vovo agwèli ararô.

Ndô gw’arweṉi yè pyèrè gô kweṉa g’ôwatanga gô kènda gô Sirya, awèwo gôr’Iju w’am̃og’erungu gô kôtè. Vovo agenji yè gô fwinya ni Makedônya. 4Agèndi gô jirô gw’Azya ne Sôpatèr, y’avili gô Berea, y’ômwaṉa wi Pirus, n’Aristarkos ni Sekundos, w’avili gô Tesalônika, ni Gayos, y’avili gô Dèrba, ni Timôte, ni Tukikôs, ni Trôfimos, y’avili gw’Azya. 5Wiṉo w’aliwô w’akèndi ni bôsô, awônda zwè gô Trôas. 6Intyugu si mpèmba yi re levèn fo vyagaṉô, aluli zwè n’ôwatanga avila gô Filipi aṽya gô Trôas, ntyugu ôtaṉè gô mpoṉo, alwaṉi zwè vovo ntyugu ôrwageṉô.

7Gô ntyugu nônga yi wiki, gw’avegagi zwè dataṉa pa ta gô moguṉe mpèmba. Pol agambiṉ’iṉèngi keka pa gô kènda bunya, n’ gambi yè kwang’ôgwèra ṉengeṉenge. 8N’avegag’ilamb’inyenge gô nontye y’igôṉô, y’avegagi zwè dataṉa pa. 9N’iwanjo im̃ori, ini nyè ne Yutikus, avegagi dwaṉa pa baru gw’isangala; na gw’alingizi Pol ikambiṉa, agôtyô n’antyôviṉô ampôlô, na gw’am̃ègagi yè, avôswi gô ntye avila gô ndèkè yi ntyarô, n’arômbiṉô yè juwa pa. 10Ndô Pol azum̃iṉi, avôswa gôre yè, aviziṉè n’ago mè, awulya inè: Azugyazugyôṉi, konde em̃èṉo zè zi p’are gôre yè. 11Na gw’arô pandi yè, am̃oguṉi mpèmba anya, n’arô kambi yè na waô ôling’ôla kwang’ayenjiṉa. Avila vovo alubwi yè. 12N’aṽagi waô iwanjo bo, n’azindyô waô pôlô.

13Ndô azw’agèndi gô bôsô g’ôwatanga, alula gô kènda gw’Asos, n’eveve gô bonge Pol gôgô, konde aliwô akenji yeṉo, mbelaga gô kènda gôgô ni ntye. 14Gw’alataṉi yè na zwè gw’Asos, azw’awongi yè g’ôwatanga, n’agèndi zwè gô Mitilène. 15Aluli zwè avila vovo, bunya aṽyeṉi zwè swaswo ni Kyos. Bunya azimbi zwè gô Samos, n’avila vovo kè bunya aṽyeṉi zwè gô Milete. 16Pol aliwô akenji gô pyagaṉ’Efèsi ko yè asimba vovo, ko yè averiz’egômbe gw’Azya; konde anegizi gô diwô gô Yerusalèm gô ntyugu yi Pentekôte, j’ajolya.

17Ndô Pol arôm̃i avila gô Milete agènda gw’Efèsi gô fwey’aṉèro wi mandô gôre yè. 18Gw’aṽyeṉi waô gôre yè, awulinyi waô inè:

Avila gô ntyugu nônga y’ayari myè gw’Azya, aṉwèmè aṉw’avôrô nt’alwaṉagi myè na ṉwè egômbe zôdu, 19njanjiṉage Rerè n’isônya s’ôkuṽa sôdu, n’antyoṉi, n’azingô m’aṽyeṉi gôre myè avila gw’imôndo s’Iju. 20Aṉw’avôrô inè, mi pa nimba gô takilya ṉwè agamba môdu m’avegagi na ṉwè isolo, na inè, mi pa tya gô kambiṉa ṉwè ntyangô mbya na gô nènja ṉwè gw’azô m’aṉaga na gw’inagô, 21nènjag’Iju ni Grèk iniga si nkôndi gôr’Anyambyè n’ibekelya gôre Reri yazô Yesu‐Krist.

22Na vèṉo, vônaṉi, mi kènda gô Yerusalèm, kôrô pa n’Iṉiṉa, ko my’amya isam̃u yi be twa gôre myè gôgô; 23dadyè Iṉiṉ’Iṽya nyi siṉa myè inè, mi bôndô n’igôrô n’azingô gô nkaly’edu. 24Ndô mi pa tang’emèṉo zam̃ ezom̃a, ge panga zô njôni gôre myè, kaô dadyè inè, mi ga zukiz’ôlembyaṉô wam̃ n’igeṽa, n’eṽilô zam̃ zi miṉisè z’avenyô myè ne Rerè Yesu, gô kambiṉe ntyangô mbya y’imèpiṉô s’Anyambyè.

25Na vèṉo, my’avôrô inè, aṉwèdu y’agèndiṉô myè nkambiṉag’iṉongo ny’Anyambyè, aṉwè ze tô jeṉ’ôzô wam̃ nyèṉè. 26Yeṉo mi takilya gôre ṉwè ṉèṉo wiṉo inè, my’are pupu avila gô ntyiṉi yaṉi aṉwèdu; 27konde my’are kambiṉa pa ṉwè igamba ny’Anyambyè nyôdu, ko my’aṉimb’ezom̃a. 28Sambô ṽandam̃iṉaṉ’ikuṽi yaṉimè, n’ôlemba wôdu wi re ṉwè dôṽyô pa n’Iṉiṉ’Iṽya ivenjavenji, gô nyeze mandô ya Rerè, y’agôlyô yè ni ntyiṉi yèmè. 29My’avôrô inè, myè kènda pa, inyam̃’imbendi si be jingiṉa gôre ṉwè, si re si ze tig’ôlemba gô tôla, 30na gôre ṉwèmè kè e be nongw’aṉaga wi be nènj’isam̃u imbe gô dur’iṉèngi gô sônga waô. 31Sambô ṽandam̃iṉaṉi, ko jônginyaṉi nè, vo impum̃’irarô, mi pa tiga gô tevuṉ’ôm’edu gôre ṉwè n’antyoṉi ôgwèra n’ôm̃anda.

32Na vèṉo, mi tiga ṉwè gôr’Anyambyè na gw’igamba ny’imèpiṉô sè, nyi re ni ngulu yi jolya ṉwè aṉiviza ṉwè ta na waôdu wi re mèpizô pa. 33Mi pa jônguṉe sika ya pupu ge ya teṉateṉa, ge ingoy s’ôm’edu. 34Aṉwèmè aṉw’avôrô inè, ago mam̃ miṉo m’ayanjiṉi myè, na waô w’avegagi na myè, yom̃a y’avegagi na zwè isolo. 35Gw’isam̃u yôdu my’arevi ṉwè nt’are ṉwè gô janja na gô nunguṉ’alèli, na gô jônginy’agamba ma Rerè m’awulyô yèmè inè: Gô pa yi re n’ôzaviṉô vyagaṉô na gô pô.

36Ayè kamba pa yeṉo, alôṽi akotolo, agambiṉa na waôdu. 37N’aleṉi waôdu pôlô ayèza g’ômpele wi Pol, azombè, 38njeṉag’ekèṽa pôsô g’ômwanja w’igamba ny’awulyô yè inè, wi ze tô jeṉ’ôzô wè nyèṉè. N’ayiri waô yè kwanga g’ôwatanga.

Currently Selected:

Rôm̃i 20: MYE

Highlight

Copy